Read Punu Mambu Mamungo Diela 2 Bible Online

Mambu Mamungo Diela 2 - Punu bible

Mambu Mamungo Diela 2

¹Nyimavosa o tsi murima ami rie: Tʼwendi! Nyugulasa nsangu na ndeʼ gusangila. Laba, adina wandi digaa na divindugulu.

²Mu diambu di-ureka, nyimavosa rie: Ka muna buduka bu! Mu diambu dinsangu, nyimawivula rie: Yi nyudila mu jionyi?

³Nyimatabula diambu na murima ami unuanganga malamu novaganga buduka, diuleba nyisamatsiemusa matasa. Nyimaronda bu-ulaba amavu na batu vava tsi mu yitsingu yiogu yiotsu.

⁴Nyimasala bisalu bineni: nyimarungisa mandagu na nyimavarisa manungi marayisan.

⁵Nyimaliomisa mambura maneni na nyimavara miri amiburi milunda mimunongu na munongu.

⁶Nyimatima matanga maneni utsatsilanga miri mieni.

⁷Nyimasumba baviga bababaala na babagetu va julu abamaleba nami. Nyimadila migamba mibangombi na mibindombu uviolila jogu botsu abamateyila o Jerusalem.

⁸Nyimakegukiyila lora jivema na lora na busina bubakaga na bumalongu. Nyimakerombila bawimbitsi bababaala na babagetu na bagetu bapuela bapuela.

⁹Nyimakaluga mutu muneni ne uviolila botsu abamateyila o Jerusalem. Ne nana diela disamatsiemuga.

¹⁰Motsu ama nyimaromba nyisamamavinda; nyisamakewimina ne diambu dimosi mu mbari nyimarondanga bisalu biami biotsu abimapeganga nsangu.

¹¹Mbana nyimagengila bisalu biotsu abi nyimasala na utsoga agu nyimatsoga ubisala. Nyimalaba motsu mana mavu nderi ubinga punga; motsu mevioyi yika uvioga.

¹²Nyimamuetasa diela na buduka bumunongu na munongu. Mutu agupinga kaga, yisalu yi osala? Biotsu bimasalu kala.

¹³Mbana nyimalaba yiri diela di violili buduka dedi mosi nana yijalala yiviolili pisama.

¹⁴Mungo diela esalisi misu mandi umuwendisa tumba yiduka ubembatana eyenabembatana. Nyimajaba wandi yiri botsu babeji bavu na disukusulu dimosi.

¹⁵Nyimavosa o tsi murima ami rie: Disukusulu diami diuba dedi na yiduka; dibandu yi nyimadilila diela dineni? Nyimamuevosa o tsi murima ami yiri adina wandi digaa na divindugulu.

¹⁶Vagaa yirangumunu ayitsingi mutubu mu mbari mua pesu temu motsu mamalibunu. Ka yia, mungo diela na yiduka botsu difuila!

¹⁷Nyimavina nsanunu jiyilumbu na yilumbu mu mbari motsu amevagu vava tsi magendasi ubueji; motsu magaa na divindugulu motsu yika nderi ubinga punga.

¹⁸Nyimavina bisalu biotsu abi nyimasala vava tsi mu mbari vengu nyubisila ombu jandi agupinga.

¹⁹Anyi ejabi yeri oba mungo diela vo yiduka? Ne nana oba fumu jibisalu biami biotsu, nesi biotsu abi nyimasala na diela diami vava tsi. Adina wandi digaa na divindugulu.

²⁰Kabogu nyimatoga mu bisalu biotsu abi nyimasala vava tsi.

²¹Diwendi rie: Dibaala amasala na diela na dujabu na amadila; mbana amasila biotsu ombu mutu susu agusamabisala! Adina wandi digaa na divindugulu na digaa diwelimina.

²²Tumba mutu eni yi edili mu bisalu biandi biotsu abi amaketsoyisila vava tsi?

²³Yitsingu yiandi yiotsu yivu yika maguga na maguga na elabingi munyongu; nesi mukolu agaa na yivumu. Adina wandi digaa na divindugulu.

²⁴Kabogu mutu elabingi ubueji yika ujanganga nonuanganga nokelasanga ubueji na bisalu biandi. Nyimajaba adina diruyili ombu Nsambi,

²⁵anyi orungula uji biguji nolaba nsangu pa Nsambi agedisingi?

²⁶Mu mbari Nsambi eveyi diela na dujabu na nsangu ombu jandi oyimulasi ubueji; tumba eveyi muvayitsi masumu yisalu ugukiga abi eveyi ombu jandi oyilasi Nsambi ubueji. Adina wandi digaa na divindugulu yika nderi ubiriga punga.