Read Punu Mambu Mamungo Diela 5 Bible Online

Mambu Mamungo Diela 5 - Punu bible

Mambu Mamungo Diela 5

¹Guyasundila uvosa, guyasundila uvangana pangini na Nsambi; Nsambi avu o julu na ndeʼ guvu vava tsi: posulu tsiagu tsiyafunanga.

²Bisalu bipuela birombisi mandosi na posulu tsipuela tsilasi buduka buyiduka.

³Pa gumavangana pangini na Nsambi guyatsikadana ujidugusu, agerondi biduka la dibandu dugusu pangini aji gumavangana.

⁴Uviolila ubueji ubusa uvangana pangini tsiri ukonda udugusu pangini.

⁵Guyasingisa munu agu ugurombisa mukilu na guyavosa va gusu yilumbi yiNsambi rie: Nyisamavangana; mbe Nsambi ogunyoyila na posulu tsiagu na osingisa yisalu yiagu ubiva.

⁶Mandosi mapuela mapuela dedi mosi na posulu tsipopopu tsigaa na mavindugulu. Kabogu duma Nsambi.

⁷Pa guilabi yijaga agumakambulu na pa guilabi vagaa dusungugu na dululu dumigaga guyakambulu mu mbari mutu muneni avu o tsi durumu dumutu ususu oyimuviolili na vavu ususu aguibaviolili jogu botsu babeji buneni.

⁸Ne nana divu diwelimina uba na kaga ajikipingi bulongu.

⁹Jandi oyirondi mbongu agetoyi mbongu na jandi oyirondi busina agedili biwelimina. Adina wandi digaa na divindugulu.

¹⁰Pa bima bifuni abebisalisi befuni wandi; aguibidili, yi edili mu dionyi? Tsiri yika ubulaba?

¹¹Yilu yimusalitsi yivu yiboti ne pa amaji mua pesu vo puela; tumba yisina ne pa amagukuru tindi ugukuru ana dukanda.

¹²Nyimalaba dibi dineni vava tsi; busina abumasuegu bumarombisa yisina diguga.

¹³Busina bueni bumatsiemuga mu diambu dimusosi; yiotsu ayi amabura muana dibaala busina buisatsi.

¹⁴Amaburu penyi na ofu penyi nana amaburulu; agowenda na yima va dikaka diandi.

¹⁵Adina wandi divu dibi dineni, uwenda ewendi nana amaruyila yi amadila mu biotsu abi amasala? Tsiri yika ubinga punga?

¹⁶Va julu vana nsanunu andi jiotsu ebangingi o tsi pisama na elabingi munyongu nesi ubela nesi kabu.

¹⁷Adi nyimalaba na mutu adidi rie: diwelimina ujanganga nonuanganga nolabanga nsangu nobueji mu bisalu biotsu abi esali vava tsi mu yitsingu yiandi yiotsu ayi Nsambi amamuvega; adina la dikabu diandi.

¹⁸Pa Nsambi amavega mutu busina na bima na amamuvega mangolu ubijanganga nobonga dikabu diandi nolabanga nsangu na yisalu yiandi ayina wandi yivu pegulu jiNsambi.

¹⁹Mutu agetatasi bilumbu biandi mu mbari Nsambi ebasi murima andi na nsangu.