Read Punu Mambu Mamungo Diela 8 Bible Online

Mambu Mamungo Diela 8 - Punu bible

Mambu Mamungo Diela 8

¹Anyi avu nderi mungo diela? Anyi ejabi mavindugulu mamambu? Diela dimutu dikalusi yinsi yiandi ulula.

²Nyigutsinguli rie: Kelisa maruma makaga mu diambu dikaka aji amagana na Nsambi.

³Guyasundila ubusa musuga andi na guyafuama mu diambu didibi, kaga evayi nana murima andi erondili.

⁴Diufi dikaga divu na mangolu; anyi omuwivula rie: Yi guivayi?

⁵Jandi oyikelisi maruma agekipi mambu mandi na mungo diela ejabi yiri va temu jiwelimina Nsambi otabula bunsonsi.

⁶Vavu temu jiwelimina, bunsonsi butabululu botsu mu mbari nsimbulu tsibatu tsivu tsipuela tsipuela.

⁷Mutu agejabi adiuba, anyi omutsingula nana mambu mobila?

⁸Mutu agaa fumu muvumu andi yiri ogusikiga na agerumi yilumbu yidufu duandi. Mutu agosingusu uwenda o dimbu diandi mu temu divita, dedi mosi mabi magejeyisi mutu mubi.

⁹Nyimalaba motsu mana; nyimavega murima ami mu motsu amevagu vava tsi. Vavu temu aji mutu erumi mutu nandi umulasa maguga.

¹⁰Mbana nyimalaba batu babi abamatsigu, abamakota o yivumu yiogu; nyimalaba wandi basungama, bamawendanga o Mbura Nsambi ne nana bamalibunu o musiengi. Adina wandi digaa na divindugulu.

¹¹Mu mbari bunsonsi bumambu mabi buketabulu mbangu batu boba na nsala jineni uvaganga mabi.

¹²Diuleba yiri muvayitsi mabi evayingi mabi kama tsikumbu, etsingingi. Nyijabi abedumi Nsambi bolabanga ubueji mu mbari bemudumi.

¹³Mu mbari batu babi bagedumi Nsambi, mogu motsu magobueji na bilumbu biogu bigobuesu.

¹⁴Vavu disusu adigaa na divindugulu vava tsi: batu bamosi basungama begengulu nderi bamasala bisalu bibatu babi na batu bamosi babi begengulu nderi bamasala bisalu bibatu basungama. Nyivosi yiri adina wandi digaa na divindugulu.

¹⁵Kabogu nyimakakisa nsanunu jibatu, mu mbari vagaa disusu adi mutu evayingi vava tsi yika ujanganga nonuanganga nolabanga ubueji. Mbana nsangu jiuba nandi mu bisalu biandi biotsu mu yitsingu yiandi yiotsu ayi Nsambi emuveyi vava tsi.

¹⁶Nyinovega murima ami ujaba diela nogengila motsu amevagu vava tsi, nyimajaba yiri batu bamosi bagewendi bilu ne nyangu ne mukolu.

¹⁷Nyimalaba bisalu biotsu biNsambi, nyimalaba wandi yiri batu bagetsiyisi amevagu vava tsi diuleba bamaketsoyisa urombanga, bagetsiyisi; ne pa mungo diela erondi ujaba agorungula utsiyisa.