Read Punu Duimbu Adutviolili Nyimbu 4 Bible Online

Duimbu Adutviolili Nyimbu 4 - Punu bible

Duimbu Adutviolili Nyimbu 4

¹Aa mbatsi ami, guvu tindi muboti! O nsima dumbu duagu misu magu yika ukadama nderi misu midikunda. Nanga tsiagu tsivu nderi mionyi mibinsabi abivindimi o mukongu uGalaad.

²Minu magu mavu nderi mugamba ubindombu agubanofugu, abiruyili o mamba; biotsu bilingi bibeʼ bibeji, va gari ogu vagaa puasasa ne yimosi yigegambu.

³Bilila biagu bivu nderi mukudu ubenga; Ka muna ubueji gu uvu nagu! O nsima dumbu duagu mabanga magu mebagunu na yisaga yigerenada.

⁴Kingu agu jivu nderi ndagu jisakama jiDavid, ajimarungu usueyila bitogulu; tosini tsibangubu tsivakugu muna, tsiotsu tsibangogaga.

⁵Mabenyi magu mavu nderi mavasa matsiesi abeji va gari balisa.

⁶Ava dupepi dutsisiga duivepili ava bidumbitsi bisakimini, nyuruga o mukongu umira nesi o yikundubuga yimbunga jiboti.

⁷Aa mbatsi ami, guvu tindi muboti, gugaa na yifu ne yimosi.

⁸Mbatsi ami ruga nami tugusuyi o Liban! Ruga nami tuvindimi mukongu uAmana, nesi uSenir nesi uHermon. Turini malima mabimbungu nesi bibususu bimagena.

⁹Mbatsi ami, yisuisu yiagu yimatisi nsala tsiami, musanga agu uitombisi unyugilanga.

¹⁰Ka muna durondu du mbatsi ami! Duindansi uviolila malamu; miyombu miagu mivandumuyi uviolila biotsu bisusu bimbunga jiboti!

¹¹Aa mbatsi ami, munu agu uibasi buji; bilila biagu bikelumusi dile. Mbunga jibiduaru biagu jivu nderi mbunga jimiri miLiban.

¹²Aa mbatsi ami, guvu nderi nungi jikandu nesi yileka yikandu nesi ditegulu dibindugu.

¹³Bivaru abivu nagu bivu nderi yirongula yigerenada ayiburi milunda miboti. Mbunga ajivu nagu jivu ji-ena na nara

¹⁴Nara na safara na lori na kanela na miri amiburi bima bimbunga jiboti: mira na alowe na minongu misusu mimbunga jiboti.

¹⁵Nyivu nderi yileka yinungi nderi mamba maboti nderi mijamba miLiban.

¹⁶Punga jibanda, rambuga! Punga jitandu, rugati! Vepanu o nungi ami, vandumusanu mbunga jiboti! Aguami udurondu akoti o nungi andi aji milunda miboti!