Read Punu Esaie 1 Bible Online

Esaie 1 - Punu bible

Esaie 1

¹Mbigulu jiEsaie muana dibaala uAmots mu diambu didilongu diJuda na dimusiengi uJerusalem va temu jiOzias na jiYotam na jiAhaz na jiEzekias bakaga baJuda.

²Julu, gulu! Tsi, liga matuji! Fumu evosi rie: Nyimabungula baana na nyimababangusa tumba bamakaluga mimbini.

³Ngombi ejabi fumu andi na buru ejabi mbura aji fumu emulisilingi. Tumba baIsrael bagerondi ujaba diambu; batu bami bagegulu diambu.

⁴Ka muna maguga ma ombu bango mbela nombu dilongu adivu na mufuna umasumu nombu dibuli dibakongu, jenu aduvu mimbini dulaba! Dumabusa Fumu, dumalensa Nsambi Israel na dumamuliyila nsima.

⁵Mbura yi omuedudimbila? Tsia uwarisa duiwarisi bumbini buenu? Muru uotsu yika mapura na mapura, murima uotsu yika ubakama.

⁶Ubandila o tsi ditambi te no julu muru; biotsu bigaa buranga yika mapura na migalala na masieyi amasamaliomusu ne ubugu nesi udetsu na matsi.

⁷Dilongu dienu diubungu, misiengi mienu miusielusunu na muji, benyi bopansa manungi menu va misu menu; biotsu biupansu nobungu na benyi.

⁸Yika musiengi usiala nderi mua disaku o nungi nesi mua yikumbulu yimfula o nungi teri, nderi musiengi agumakandu.

⁹Mbe Fumu Mabadi asamatusila mua bansialutsu mbe tuba nderi Sodome na mbe tubagunu na Gomorrhe.

¹⁰Aa Jerusalem, Barumitsi bagu nesi batu bagu bavu dedi na bisi Sodome nesi bisi Gomorrhe. Gulu adi Fumu egutsinguli, liga matuji ugulu malongi maNsambi etu!

¹¹Fumu amawivula rie: Yi nyuvaga na pagu tsienu tsipuela tsipuela? Nyimatopulu pagu tsiunyensa atsivu balumi babindombu na matsi mabangombi; ngelabi ubueji na malungu mabalumi babangombi nesi mabindombu na mabinsabi.

¹²Anyi amadusingisa umbeyila motsu mana ava duiruyili uyikitsa? Anyi amadusingisa uyenananga Ndagu ami?

¹³Dundanu umbeyila miensili amigaa na divindugulu; nyilabi bima bimbunga jiboti bienu nsorum. Ngorungula utsimisa misu mu bibenguna bienu: bibisusungi nesi bibatsona nesi bibilumbu biyingitsi. Ngomuegaru muyitsa agu duisobini na mabi.

¹⁴Nyivini feta tsienu tsibisusungi na milambu mienu miotsu; bivu tindi mufuna ombu gami; ngomuerungula ubitsimisila misu.

¹⁵Ava duinsambili miogu unsambila ngodugengila; ne pa duiftinisi tsambu tsienu ngodugulu mu mbari makaka menu mavu yika malungu na malungu.

¹⁶Builanu na keliomisanu gusulanu mbivulu tsienu tsiotsuva gusu ami; dundanu uvaga mabi.

¹⁷Wijianu uvaga maboti, rombanu dusungugu, tabulilanu bisiana bunsonsi, wamusanu abamakambulu; wakanu bakuili kalala.

¹⁸Fumu jandi rie: Ruganu tumoganu va mosi Ne pa mabi menu mobenga mokaluga tindi uvema nderi mikondu; ne pa mobenga riri mokaluga uvema ve.

¹⁹Pa duindedili na murima uotsu, dujanganga biboti bidilongu.

²⁰Tumba pa duibusi na pa duvu mimbini duboku na majenga. Fumu oyidivosi.

²¹Ka muna diambu di! Musiengi agubetsi na mambu masigama umakaluga nderi yimbembu, umalebanganga na dusungugu na musuga tumba va temu ejiji yika musiengi ubapunyi.

²²Lora agu jivema jimapinda, malamu magu mamasobana na mamba.

²³Basefu bavu mimbini; besali va mosi na badayitsi, botsu berondi milendu na begalini udila miensili; bagewaki bisiana kalala na bagekipi mitatu mibakuili.

²⁴La dibandu Fumu aguvu Fumu Mabadi na mangolu maIsrael evosili rie: Nyubetsa bavinitsi bami! Nyugabusila abepini pila!

²⁵Aa Jerusalem nyuguliyila nsima nyugupitsa o muji ugusula muinsi uotsu.

²⁶Nyumuegabusa bansonsi bagu nana bamalebila na milonsi miagu nana bamalebila va dibandu. Va julu motsu mana bomuegunengilanga musiengi aguvu na dusungugu na usigama.

²⁷Fumu avu usungama la dibandu oguwakila kalala nesi batu bagu abegabusi mirima nsima.

²⁸Tumba dubungu dugaanga mimbini miotsu na bavayitsi bamasumu abamaliyila Fumu nsima bobungana.

²⁹Ka muna yisonyi yi dulaba jenu aduiyitsingi miri! Ka muna yisonyi yi dulaba jenu aduikevega uvarisa manungi mayingitsi!

³⁰Duba nderi miri amivinsi magaji na nderi nungi ajigotsatsu mamba.

³¹Nana bunsansa bugotamba unyensu na digagala dedi mosi bisalu bidibaala dimangolu bigotamba ubungana; ne mutu mosi agorungula umuwamusa.