Read Punu Esaie 19 Bible Online

Esaie 19 - Punu bible

Esaie 19

¹Mbigulu mu diambu diEgypte. Labanu Fumu avu va julu dimungi adivioyi mbangu; uwenda ewendi o Egypte; bansambi baEgypte uregama bereyimi va gusu andi, bisi Egypte bamabakama mirima.

²Fumu amavosa rie: Nyuduisa muisi Egypte bitogulu utoga na muisi Egypte nandi, muana nguji na muana nguji botoga nesi mbatsi na mbatsi nesi musiengi na musiengi nesi mufudu na mufudu.

³Bisi Egypte boba na mirima bakaka; nyubunga kanu tsiogu. Mbana bokutimina bansambi nesi bavanditsi nesi jogu abenengili bamfumbi nesi baresitsi.

⁴Fumu Mabadi amavosa rie: Nyuwakisa bisi Egypte ombu fumu aguvu na bukanyi; kaga ajivu na dikasi obarumanga.

⁵Mujamba uNil ukamuga nesi mijamba wandi miuba yika mamanyi na mamanyi;

⁶mijamba migeyi miEgypte miuba na mbunga, miudiama nokamuga; kobu na bilelenga biugumuga.

⁷Mujamba uNil ukamuga te no pelu tsiandi; biotsu abimavaru mu mugula mujamba biugumuga, biukaluga difufundu na biubungana.

⁸Bavubitsi bolilanga nonyonganga abelobi na maloba na abebuayi mbusa botsu botsira mirima.

⁹Abesali matsanda malina boba na mirima o julu; bagetu abesieli na babaala abebuangi.

¹⁰Babuangitsi bobakama mirima, abesali bisalu bieni bolaba munyongu.

¹¹Barumitsi baSoan bavu biduka, milonsi miPharaon amivu na diela bekunsi mambu mabuduka. Tsie duwivulili Pharaon rie: Je menu nyivu muana dibaala umungo diela? Je menu nyivu mutegula ukaga jikala?

¹²Pharaon, bango diela bagu baka? Tsie bagutsinguli na bagulasi adi Fumu Mabadi amatabulila Egypte!

¹³Barumitsi baSoan bavu biduka, barumitsi baMephis mandosi bedori, basefu babifumba betsiemusi Egypte!

¹⁴Fumu amawitila yinyunyi yiutsiengisa misu va gari ogu urombisa bisi Egypte upepalana mu bisalu biogu biotsu dedi mosi nana mutu aguilangi eyanapepalana noyenaluganga.

¹⁵Bisi Egypte bokambulu tindi ukambulu; nesi miuru nesi miyila nesi metu nesi bilelenga.

¹⁶Va temu eni bisi Egypte boba nderi badeda; boregama na bolaba goma mu mbari nguangu jikivu va dikaka diFumu Mabadi ubadimba.

¹⁷Bisi Juda bolasa bisi Egypte goma; temu tsiotsu atsi boranguninanga diina dieni va gusu ogu bisi Egypte bokambulu mu diambu adi Fumu Mabadi amabatabulila.

¹⁸Va temu eni voba misiengi miranu o bulongu buEgypte amiuvosanga mbembu jibisi Canaan; boleva pesi na diina diFumu Mabadi. Musiengi umosi unengulungu musiengi udubungu.

¹⁹Vana temu eni voba yinyensulu yipagu yiFumu va gari bulongu buEgypte nesi o mandilu uba yirangumunu yiFumu.

²⁰Ayina yiuba yilimba na bumbeji ombu Fumu Mabadi mu bulongu buEgypte. Ava bisi Egyptbotatila Fumu mu diambu dibakuanitsi obatindila mugobutsi na muwamusi uyebawaka kalala.

²¹Fumu ojabunu na bisi Egypte na muna yilumbu yieni bisi Egypte bojaba Fumu; bovagula pagu na miensili, bovangana pangini na Fumu na botsidugusu.

²²Anana Fumu odimbila bisi Egypte tumba obabelusa wandi; bonengila Fumu na jandi obawagula na obabelusa.

²³Vana temu eni voba nsila va gari Egypte te na Assyrie; bisi Assyrie bowendanga o Egypte na bisi Egypte bowendanga o Assyrie; botsu babeji bosalilanga Fumu.

²⁴Vana temu eni Israel oba agumurieru; ofubana na Egypte na Assyrie; malongu meni bogabulu miula varmosi.

²⁵Fumu Mabadi obagabila miula ava ovosila rie: Miula ombu bisi Egypte abavu batu bami nombu bisi Assyrie abavu yisalu yimakaka mami nombu bisi Israel abavu disiala diami.