Read Punu Esaie 29 Bible Online

Esaie 29 - Punu bible

Esaie 29

¹Ka muna maguga ma ombuAriel! Ariel uvu musiengi agu David amaletsaninanga! Yilima na yilima janganga feta tsiotsu.

²Mbana nyukanda Ariel; voba mitatu na minyinga; musiengi uba ombu gami nderi yinyensulu yipagu.

³Nyugukanda yiari na yiari nyugutsiengisa bagora na bitogulu biogu.

⁴Ndeʼ gusundusu, diufi diagu diupalila o tsibutamba, difufundu diugandisa ugulunu; diufi diagu diupalila o tsi butamba nderi diditengu difufimdu diupalisa posulu tsiagu tsiminyinga.

⁵Bavinitsi bagu bapuela bapuela boba nderi difufundu, batoyitsi beni bapuela bapuela boba nderi tsotu atsiwendi. Motsu mana molaba mu ditsabisa didisu.

⁶Mukilu uruyila ombu Fumu Mabadi, na bidumi na masisana mabutamba na nduku jineni na yimbongila na mungudi na mulutsu muji aguisielisini.

⁷Diuba nderi ndosi nesi yiriariamu yimukolu, anana diubila na malongu mapuela mapuela, motoyisa Ariel, nesi botsu abogutumuna na yivaga yiandi; bogubamiga tindi ubamiga.

⁸Malongu mapuela mapuela moyetumuna mukongu uSion tumba diuba nderi mutu oyigulu nsala; edori ndosi yiri uji eji tumba ava erambuyili moji yika babaala, vo jandi oyigulu puila, edori ndosi yiri unu enu tumba ava erambuyili yika ufu efu na puila.

⁹Sutuanu na kambuluanu! Tsimisanu misu na kaluganu bidunga! Malangi mavu nenu, tumba tsiri mamalamu; upepalana duyenapepalana, tumba tsiri mu diambu dimalamu mamangolu.

¹⁰Fumu amaduwendisa yilu yineni; amatsimisa misu menu diwendi rie: babiyitsi. Amakubiga miunu mienu, diwendi rie: abejabi amavu o gusu.

¹¹Dulasu duotsu duvu ombu genu nderi mambu madibuku adimanamugu yilimba adi bewakisi ombu mutu oyijabi uranga nomuruma rie: Ranga mambu memama! Jandi ewaki rie: Ngorungula mu mbari dimanamugu yilimba.

¹²Vo nderi dibuku adi bewakisi ombu mutu agugejabi uranga na bemurumi rie: Ranga mambu memama! Jandi ewaki rie: Ngejabi uranga.

¹³Fumu amavosa rie: Ava batu bebaba bebambinini nami muyitsa ogu uvu yika migaga mibutamba.

¹⁴La dibandu nyumuekambisila batu bebaba na bimaga biami; diela dibango diela diubungana. Dujabu dubango dujabu dutsiemuga.

¹⁵Ka muna maguga ma ombu jogu abesueyi Fumu kanu tsiogu, abesali bisalu biogu o tsi pisama. Abewivuli rie: Anyi etulabi? Anyi etujabi?

¹⁶Ka muna buduka bu buvu nenu! Mubumbitsi ogengulu dedi na diga? Yisalu yiuwivula musalitsi rie: Tsie gumansalila? Yisanga yiuwivula mubumbitsi rie: Je agejabi diambu?

¹⁷Mua pesu temu musiru uLiban ukaluga nungi, nungi eni jiugengulungu nderi musiru.

¹⁸Va temu eni madiba mogulu mambu madibuku; banopala o pisama jibundunga, bidunga biulaba.

¹⁹Abamakambulu bosangilanga Fumu ne uviolila, bifufu bokakisa Nsambi Israel.

²⁰Mungo dikasi agomueba, mudesitsi otsiemuga, botsu abetasingi uvaga mabi boboku,

²¹nesi abamafuengililanga basusu nesi abamarambilanga bansonsi mirambu nesi abamasundila uvega mbela diuleba basakagulu miunu miotsu.

²²Fumu jibategula baJacob agumagobula Abraham, amavosa rie: BaJacob bagomuelaba yisonyi na bagomueba tsokudu.

²³Ava baana bandi bolabila bisalu biami va gari ogu bojaba yiri menu nyivu Nsambi Jacob na boduma menu Nsambi Israel.

²⁴Jogu aba mbe bamatsimbu bosungugu na jogu abamatumunanga paga bosinga ulonsu.