Read Punu Esaie 30 Bible Online

Esaie 30 - Punu bible

Esaie 30

¹Fumu amavosa rie: Ka muna maguga ma ombu abavu mimbini! Jenu duiduki kanu tsienu tsiri tsiami, duivangini pangini tsienu tsiri tsiami, mu dionyi duivayi disumu va julu disumu!

²Duiwendi o Egypte tsiri ukwivula musuga, duirondi usuema ombu Pharaon nesi o yivosi yiEgypte!

³Yiseumunu yiPharaon yiukaluga muvongu,

⁴barumitsi benu bamaketolila o Soan, bilumbi bienu bimatola o Hanes.

⁵Jogu botsu bolasu yisonyi na batu abagaa na tsongu. Bagorungula ubawamusa nesi ubawaka kalala tumba boba yisonyi yiogu na muvongu nogu.

⁶Mbigulu jibibulu bitandu o bulongu abuvu na maguga na munyongu abupalila bimbungu nesi banyoga nesi mikumbi-mibanyoga uruga beruyi na busina buogu va nsima tsibaburu nesi va nsima tsibasamo ombu batu abagaa na tsongu.

⁷Duwamusu duEgypte dugaa na divindugulu na dugaa na tsongu, la dibandu nyibuluyili rie: Mukuimbi nyoga agugaa na mangolu nesi Rahab.

⁸Wenda yebaka mambu memama va misu mabisi Jerusalem mu dimanyi; na masoni mu dibuku yiri magotsiemuga te na mutubu.

⁹Batu beni bavu mimbini, bavu baana abefuringi na bagerondi ukipa migaga miFumu.

¹⁰Na betsinguli abejabi amavu o gusu rie: Duyatubula biriariamu! Nesi ombu babiyitsi rie: Duyatubula mangensa! Tutsingulianu mambu mabatu nesi mamandosi!

¹¹Pembuganu nsila, kakananu na nsila, duyamueranguna Nsambi Israel va gusu etu.

¹²La dibandu Nsambi Israel evosili rie: Duibusi ama nyivosi na duikeveyi o dikasi nomfurulu udila adi duirondi.

¹³Disumu diedidi diuba ombu genu nderi yibaga yisakama ayimabuma na yimaranda; ayiusundila urakuga mu ditsabisa didisu.

¹⁴Yibaga yimarakuga dedi mosi na yisanga yidiga ayimabuliga; vagesiali ne yibuku yiwelimina ubongila muji nesi uteyila mamba.

¹⁵Anana Fumu aguvu Fumu Nsambi Israel amavosila rie: Dugobulu yika pa duigabuyi ombu gami nosunsanu mirima; dudila mangolu yika pa duibangingi sui nopayilanga yitu, tumba dugegaru.

¹⁶Jenu dumavosa rie: Nesi! Turina mu bakabala! La dibandu dumarinina. Tumata mu bakabala abewendi tindi mamabangu! La dibandu jogu aboduduka bowendila tindi mambangu.

¹⁷Tosini batu borina dikasi dimutu mosi buandi; dikasi dibatu baranu diudurinisa, te na dusiala yika mua dutalu dugeyi nderi watsi va julu mukongu usakama nesi yilimbu va julu mukongu.

¹⁸Tumba Fumu erondi uduvayila maboti; ulasa edulasi yingeba yiandi. Fumu avu Nsambi dusungugu. Ka muna ubueji gu uvu na jogu abemutasili!

¹⁹Nyiina, jenu bisi Sion aduitsani o Jerusalem, dugomuelila! Fumu oduvayila maboti ava dugamuyila; yika edugulu oduwagula.

²⁰Fumu odugabila mapa na mambu monu. Jandi oyidulonsi agomuedusuegu, dumulaba kiakiaki!

²¹Pa duwenda o mabaala nesi o magetu dugulu diufi o nsima enu rie: Labanu nsila, jivioyilianu!

²²Mbana dugomuekebivisa na bakosi benu balora jivema nesi bitumba bienu bitindi lora; dubibuaga vala nderi yima yinsoruru. Dukavosa rie: Nyimabusa.

²³Mbana Fumu onoyisila bivaru bienu mfula na biguji abi dutsonsiga biuba biboti na bipuela; va temu eni bangombi benu bojanganga bisinga

²⁴Bangombi na baburu abefutsi butamba bojanganga biguji abimakuku musayi, abimabasuegulu.

²⁵Muna mikongu miotsu misakama nesi o mikongu uba bileka nesi mijamba migeyi, muna yilumbu yidubungu duneni ayi mandagu masakama morakuyila.

²⁶Muetsa uba nderi yijalala yi wisi, yijalala yiwisi yiubanganga na mangolu mayisambuali yibilumbu muna yilumbu ayi Fumu obuyila maali mabatu bandi nesi mapura ama jaʼ beni amabanemisa.

²⁷Labatianu o vala, jandi oyinengulungu Fumu uruga eruyi, kabu andi jivu jineni nderi kangi ajisielisini; bilila biandi bibasi na kabu na dulimi duandi duvu nderi muji aguisielisini;

²⁸punga andi jivu nderi mujamba agumabasa nyidu te na biotsu bipevi; jiuwansa bisi malongu na yiansula; obasunsa madilu muna miunu miogu yiri orungula ubapembusa nsila.

²⁹Duwimbilanga mukolu nderi batu abejangingi feta uyitsa Fumu; dubanganga na nsangu nderi jandi oyisiyi dimbika ava ewendili o mukongu uFumu nesi o yiari yiDimanyi diIsrael.

³⁰Fumu ogulusu diufi diandi dibundumba nolasa mangolu mandi udimba. Kabu andi jivu nderi mulutsu muji aguisielisini nesi nderi nyidu nesi mungudi nesi mfulajimamanyi.

³¹Ava muisi Assyrie ogululu diufi diFumu oregama; Fumu omudimba na mukasa andi.

³²Mukasa mukasa agu odimbu na Fumu umuionsa dilongi. Mandungu na basambi biugulunu ava Fumu omudimbila.

³³Kala kala yiduna yimikansu yimatimu, yimatimunu kaga kala, yivu yidonga, yivu vumbila na yivu na muji na mikansu mipuela; punga jiFumu jimapalanga nderi mujamba umuji na fula.