Read Punu Esaie 34 Bible Online

Esaie 34 - Punu bible

Esaie 34

¹Bisi malongu bambananu uyigulu! Batu liganu matuji! Butamba na botsu ababasa muna guluanu nesi bulongu buotsu na abopalila muna!

²Kabu Fumu jiulabana o malongu motsu, amanyoyila mabadi mogu motsu, obapansa na obabunga.

³Abogu abamafu bamabuagu, bamfumbi bogu bovandumuga mbunga, mikongu miubola na malungu mogu.

⁴Bambuelili botsu bajulu bopansiga julu jiufurugu nderi dibuku, dibadi diogu diotsu dimabonduga nderi magaji mamfuga nesi nana magaji mamufiga mogoluyila.

⁵Dijenga diFumu dimalabana o julu; guluanu, diusunduga o Edom ombu batu aba opansa ubabokisa.

⁶Dijenga diFumu divu yika malungu na malungu na matsi, nderi mabindombu nesi mabinsabi nderi matsi mamipigu. O Bosra pagu tsiFumu tsivu; dubungu duneni duvu o bulongu buEdom.

⁷Bapasa boboku va mosi na bangombi na balumi babangombi; butamba bubasa na malungu na difufundu diuba yika matsi na matsi.

⁸Ayina yiuba yilumbu ayi Fumu ogabusila pila, yilima ayi Fumu owaka Sionkalala.

⁹Mijamba migeyi miEdom miukaluga maka, difufundu diEdom diukaluga fula bulongu buotsu buba maka ameluli,

¹⁰bugotsima ne nyanga ne mukolu, nsumbili jiuronguganga mutubu; buba mududu te na kula tsiotsu, mutu agomuevioga vana via.

¹¹Yivuyisavengama na tsibitsi botsananga muna nesi yibidu na kavanga botsananga muna wandi. O yiari yimosi voba kumfu o yiari yisusu voba dubungu.

¹²Vagomueba baneni ubiatsa kaga barumitsi bandi botsu bobungu.

¹³Matsiendi mobenda mu mandagu mabakaga, kengitsi na yifundi biubenda mu bivaga bimonyi. Uba yitsanunu yimakoju nesi ba-otarisa.

¹⁴Bibulu bikumu biubenguna na migengi balumi babinsambi bonengasananga guna; yinyunyi yiLilith yiutsananga vana, avana yiudila mbura uvuma.

¹⁵Avana nyoga okunsa mbura andi na obura makeji, omabandimina nodila baana aba okelisa; avana banyunga botsu bobengunina.

¹⁶Gengilanu dibuku diFumu na dirangianu! Ne yimosi ne yisusu bigokambulu; mu mbari jaʼ beni amadiruma. Yinyunyi yiandi amagukiga biotsu.

¹⁷Amabibuayila mbanda, jaʼ beni amabigabila butamba ava amabuweliyila na mukudu. Biutsananga muna te na kula tsiotsu.