Read Punu Esaie 38 Bible Online

Esaie 38 - Punu bible

Esaie 38

¹Va temu eni Ezekias amabela diambu, Esaie mubiyitsi muana dibaala uAmots amawenda ombu gandi uyemutsingula rie: Fumu jandi rie: Kunsama mu mbari yika ufu guifu; gugomuebeluga.

²Ezekias amageluga o yibaga mbana amasambila Fumu dusambu duedudu rie:

³Aa Fumu, rangimina yiri nyimawendanga sungingi na usigama na murima usunda na nyimavaganga yika maboti va gusu agu! Ezekias amalila tindi ulila.

⁴Fumu amavosa na Esaie rie:

⁵Gabuga, yetsingula Ezekias rie: Fumu agu, Nsambi taji agu David, jandi rie: Nyimagulu dusambu duagu na nyimalaba matsanga magu. Guluati, nyugubuesa yigumi na bilima biranu.

⁶Nyuguwaka kalala, jenu na Jerusalem ombu kaga jiAssyrie. Nyukelisa musiengi egugu mu diambu dimeʼ beni na dimusalitsi ami David.

⁷Esaie amavosa rie: Guluati yilimba ayi Fumu oguvega mugujabisa yiri odugusu adi amavangana:

⁸Nyugabusa yidumbitsi yiwisi yigumi yitaka mansinsima mu yikadi yiAhaz. Yidumbitsi yiwisi yiugabuga mansinsima muna nsila aji yimasunduyila.

⁹Duimbu duEzekias kaga jiJuda anobeluga:

¹⁰Nyimavosa rie: Mbe nyisakanuna nyukota o mbura jiabafu, nyupatulu bilima abi mbe nyimatasa ulaba.

¹¹Nyimavosa rie: Ngomuelaba Fumu oyitsani va mosi na batu; ngomueba va mosi na bisi butamba, nyuba yika o mbura jiabafu.

¹²Yisuemunu yiami yimapatulu na yimabegu vala nami dedi mosi na ndagu jitsanda jibabungulitsi babindombu. Nana mubuangitsi etabulili mukudu anana nyigululu monyu ami umatabulu nderi ekusuli mu yigomu yiandi. Nesi nyangu nesi mukolu, ka muna disukusulu di Fumu ensukisili!

¹³Nyimavola sui te na kedi; amatabula bivisi biami dedi mosi nana yimbungu ebitabulili. Nesi nyangu nesi mukolu, ka muna disukusulu di Fumu ensukisili!

¹⁴Nyimagamuga migamu dedi mosi na ndelenga nesi yirueru; nyimabima dedi mosi nana dibembi; misu mami mamatoga ugengila o julu. Aa Fumu, munyongu nyilabi, kwarisi!

¹⁵Diambu yi nyuvosa? Diambu yi nyutsingula Fumu? Jaʼ beni amavaga motsu mana. Nyubanganga na munyongu te na disukusulu dibilima biami.

¹⁶Fumu, maboti magu meveyi batu monyi, monyi mepupisi te na namunyi, guikwarisi na guipeyi monyu.

¹⁷Nesi maguga mami mamakaluga maboti, ndeʼ gumalaba ubueji ukwaka kalala o mbengi jidubungu. Gumabuaga masumu mami motsu vala o nsima agu.

¹⁸Mbura jiabafu jigeguyitsi, dufu dugegusangili, abamasunduga o mbengi bagemuetasila usigama uagu.

¹⁹Aguvu monyu buandi oyiguyitsi nana nyiguyitsili namunyi. Taji olonsa baana bahdi usigama uagu.

²⁰Fumu gumakwaka kalala! Tusiga bisigu bietu yitsingu yietu yiotsu o Ndagu agu Fumu.

²¹Esaie amavosa rie: Bonga mubanda ufiga. Bamagubonga na bamagupieta va julu disieyi mbana Ezekias amabeluga.

²²Ezekias amawivula rie: Yilimba yi yiunjabisa yiri nyuwenda o Ndagu Nsambi?