Read Punu Esaie 40 Bible Online

Esaie 40 - Punu bible

Esaie 40

¹Nsambi enu amavosa rie: Bembiganu bembiganu batu bami.

²Vosanu na buranga na Jerusalem, mutubulilianu yiri buviga buandi bumasuka na mabi mandi mamagusulu, Fumu amamana umukiiisa mu diambu dimabi mandi.

³Diufi dimagamuga rie: Solanu nsila Fumu o kumu, siepulanga bikundubuga na basa biduna, vayilanu Nsambi etu nsila.

⁴Bibususu biotsu bibasu mikongu miotsu misiepulu, bikundubuga biukaluga yidesi nesi bibususu.

⁵Mbana bundumba buFumu bulabana, batu botsu bobulaba va temu mosi. Adina diruma diFumu.

⁶Diufi dimavosa rie: Gamuga! Jandi amawaka rie: Diambu yi nyugamuyila? Diufi dimamuewaka rie: Batu botsu bavu nderi bisinga na bundumba buogu buvu nderi kembu jibisinga.

⁷Ava punga jiFumu jigumbili bisinga bigumuyi na kembu jibionyi jibonduyi. Dingensa batu bavu nderi bisinga.

⁸Nyiina, bisinga bigumuyi na kembu jibionyi jibonduyi; tumba Mambu maNsambi etu metsingingi mutubu.

⁹Bisi Jerusalem, matanu o julu mukongu usakama uSion uyesamuna musamu uboti. Bisi Sion gamuganu na mangolu usamuna musamu uboti, duyaduma, tsingulanu misiengi miJuda rie: Labanu Nsambi enu!

¹⁰Labanu Fumu Nsambi umga eruyi na mangolu gogu andi uilasi musuga andi, labanu ubega ebeyi batu bandi aba amadila aba amaketsoyisila.

¹¹Obungula mugamba andi dedi mosi na mubungulitsi ubindombu, onangula baana babindombu na obabega va tuiu andi; owendisanga bindombu abinuisi.

¹²Anyi amawetsiga mubu va dikaka diandi? Anyi amawetsiga julu na dikaka diandi? Anyi oweliga ukotisa difufundu muna ponsi? Anyi amapitsa mikongu misakama nesi migeyi mu mudodu?

¹³Anyi amawetsiga Yinyunyi yiFumu? Anyi amaba mulonsi Nsambi umulonsa kanu tsiandi?

¹⁴Anyi amamujabisa mambu? Anyi amamusungiga mambu? Anyi amamulonsa dujabu? Anyi amamujabisa diela?

¹⁵Jabanu rie: Ombu gandi malongu mavu nderi diberi dimamba adimadeka mu mulumbu nesi nana disu diyisieyi mu yipela yimudodu; ombu gandi nyingi tsimamba tsivu nderi mua difufundu adivembuyi.

¹⁶Ne miri miotsu miLiban migaa miwelimina ubangisa muji; ne bibulu biotsu bigodugu uvagulila Fumu pagu tsiunyensa.

¹⁷Malongu motsu mavu kulini va gusu Fumu, magaa na tsongu ombu gandi na magaa na divindugulu.

¹⁸Na nyi duibagusini Nsambi? Na yikebutsu yinyi duimubagusini?

¹⁹Kosi? Musalitsi amajivaga, amajinamiga lora na amajiduisa bapanga balora jivema.

²⁰Jandi agugaa na mangolu ujivaga osola muiri agugesundili ufu; oromba musalitsi aguvu na buketi umuvalila kosi ajigobiva.

²¹Dugedijabi? Dusamaledigulu? Basamadujabisa dionyi ubanda va dibandu? Dusamaditsiyisa ava butamba bumasundulu?

²²Fumu ana yitsiga yiandi yibufumu o tindi julu, abavu va butamba belabini ombu gandi nderi makokoku; jandi amawala julu nderi tsanda, amajirariga nderi ndagu jitsanda na amajivaga yitsanunu yiandi.

²³Opatula baana babakaga durumu na otsiemusa musuga ubansonsi.

²⁴Bavu nderi bivaru: diuleba bimavaru diuleba bimakuku diuleba bimabanda ubenda yiotsu ayi Fumu obivotsa punga biugumuga na yimbongila yiubivembula nderikambagaji.

²⁵Nsambi ewivuli rie: Na nyi dumbagusunu? Anyi avu dedi nami?

²⁶Buaganu misu o julu na labatianu! Anyi amasunda bambuelili? Anyi ewendisi mabadi majulu? Enengili yijalala yijalala na diina diandi; na musuga andi na mangolu mandi maneni ne yimosi yigetsiemuyi.

²⁷BaJacob dibandu yi duiwivulili baIsrael dibandu yi duitatili rie: Fumu agejabi adilabini ombu getu? Dibandu yi Nsambi etu agekipili diambu dietu?

²⁸Dugedijabi? Fumu avu Nsambi mutubu na mutubu; amasunda butamba. Agetogulu via! Mutu agorungula utsiyisa dujabu duandi.

²⁹Ewarisi agumatogulu na eveyi jandi agumadeda mangolu.

³⁰Ne bangebi betogulu na bededi na bafudu bepepilini na beberuyi.

³¹Tumba jogu abekevega ombu Fumu bobuesungu mangolu. Bopurumuga nderi bambira; bowenda mbangu na bagodeda, bowenda o gusu na bagotogulu.