Read Punu Esaie 41 Bible Online

Esaie 41 - Punu bible

Esaie 41

¹Fumu amavosa rie: Jenu bisi banyi-ngi banu sui na kululuanu! Batu botsu bakewarisa, babambini na bavosi rie: Tubenguna va mosi uyegulu miunu miotsu.

²Anyi amarambusa aguiruyili na ndungulu o yiari ayi wisi epalili? Anyi amamuwakisa mangolu na amadiamisa bakaga? Anyi amakalusa majenga mogu difufundu na pita tsiogu kambagaji atsivembuyi?

³Amabaduka na uvioga evioyi na polu tsiri utsiarila butamba!

⁴Anyi amavaga nana? Anyi amadugusu mambu meni? Jandi oyitubuli amolabana, menu Fumu nyivu agutega na nyivu munongu mosi te na mutubu.

⁵Bisi banyingi bemulabi na goma belabi; bisi masuka mabutamba ubambana bebambini noyenaregamanga.

⁶Bewamusini na mutu mutu etsinguli muana taji andi rie: Sunsa murima!

⁷Makuba ewarisi musulumusitsi; jandi oyibaki na marto ewarisi jandi oyituli na nyundu; evosi rie: Unamasana uvu uboti! Mbana kosi jimawarusu na batsongu yiri jigopupa

⁸Jenu baIsrael basalitsi bami, jenu baJacob aba nyimasola, yifumba yimbatsi ami Abraham;

⁹jenu adumabongulu o masuka mabutamba, adumanengulu o bulongu buvala, adumatsingulu rie: Duvu basalitsi bami, nyimadusola, nyisamadubusa!

¹⁰Duyalaba goma mu mbari nyiji nenu; duyakambulu, menu nyivu Nsambi enu; nyuduwarisa na nyuduwamusa; nyudusuega na mangolu mami.

¹¹Guluanu dilensa na yisonyi bivivi abedunyoyili! Bavinitsi benu baboku na batsiemuyi!

¹²Duromba bavinitsi benu na dugomuebalaba. Abamatoga divita nenu botsiemuga na boboku.

¹³Menu nyivu Fumu Nsambi enu oyiduwarisi, nyivosi rie: Duyalaba goma, meʼ beni nyuduwamusa.

¹⁴Fumu Nsambi Israel amavosa rie: Jenu baJacob duyalaba goma, diuleba bedulabi nderi minyinyi. meʼ beni nyuduwamusa.

¹⁵Guluanu nyiduvayi nderi makalu unyiyila ble amavu magona na mabaka matsuela; dugesumunanga mikongu na duminyiga; dubuaga bikundubuga nderi kambagaji:

¹⁶jenu dumisaga na punga jiumivembula, yimbongila yiumitsiemusa. Tumba dusangilanga Fumu na dudodisanga Nsambi Israel.

¹⁷Abamakambulu na bijaga berombi mamba tumba mamba magatsi; bamagaangu na yiangala. Menu Fumu nyubawagula; menu Nsambi Israel ngobaliyila nsima.

¹⁸Nyupalisa mijamba o mikongu, na nyuvaga bileka va gari yibususu; na nyukalusa mbura tsigumuga manga na mbura atsigaa na mamba tsiubanganga na mamba.

¹⁹Nyubendisa miri miemimi va mbura tsigumuga: misedera na miakasia na mimirita na mioliva Nyubendisa miri miemimi va mbura atsigaa na mamba: misipara na miorma na mibuisa; miotsu miubendanga va mosi.

²⁰Yiri batu bolaba nojaba notasa notsiyisa yiri Fumu Nsambi Israel avu Musunditsi na amavaga bisalu bieni biotsu.

²¹Fumu aguvu kaga jiIsrael amavosa rie: Lasanu diambu dienu; mananu miunu mienu.

²²Balasi na batutubulili adiuba. Mbigulu tsikala atsi dumalebiga tsika? Tsitubulianu yiri tukebana, mbana tujaba temu aji tsiulabinina; vo tulubusianu amoba o gusu.

²³Tsingulanu amolabana o gusu yiri tujaba pa duvu bansambi; vaganu diambu ne diboti ne dibi mbana tudilaba nodikelula va mosi.

²⁴Guluanu, duvu kulini na yisalu yienu yigaa na tsongu; oyidusoli avu nsoruru.

²⁵Nyimapupisa aguruyila o tandu; uruga eruyi o yiari ayi wisi epalili, beranguni diina diandi. Etsiarili bango mangolu nderi diobu, na nderi diga adi mubumbitsi etsiarili.

²⁶Anyi amaditubula ubanda va dibandu yiri tudijaba? Anyi amadivosa mbe disakalabana yiri turungula uvosa rie: Ne mutu mosi asamaditubula ne mutu mosi asamadivosa, mutu asamagulu posulu tsienu.

²⁷Nyimareyila uvosa o Sion rie: Labatianu, baʼ jogu ba! Nyimatinda yilumbi yimisamu miboti o Jerusalem.

²⁸Nyimagengila, vagaa mutu vagaa nsambi ogu oyibiyi nesi oyirunguli uwagula pa nyumuwivula bivu.

²⁹Labatianu, botsu bagaa na divindugulu, bisalu biotsu bigaa na tsongu, bakosi bogu bavu nderi punga jikulini!