Read Punu Esaie 48 Bible Online

Esaie 48 - Punu bible

Esaie 48

¹Jenu bisi ndagu Jacob, guluanu; jenu aduinengulungu na diina diIsrael na adumapalila o Juda. Duilevi pesi na diina diFumu na duisambili Nsambi Israel tumba tsiri na ngensa na dusungugu!

²Jenu aduikenengili bisi musiengi uNsambi aduikevega ombu Nsambi Israel aguinengulungu Fumu Mabadi;

³kala kala nyimabiga mbigulu tsitega, tsimavosu nami na nyimatsisamuna. Nyimasundila udugusu motsu na mamalabana.

⁴Nyimajaba yiri duba mimbini na mirimamigala nderi madilu nesi kunga.

⁵Kala kala nyimadusamunina mambu mami, nyimadutubulila monyi ne makalabana yiri dugovosa rie: Kosi ami jimavaga mambu meni, bitumba biami bimuiri nesi bibudili bimamatabula.

⁶Dumagulu mbigulu tsiami, tsiotsu tsina tsimadugusu! Dusamatsilaba? Ubanda na nyangu nyudusamunina mambu mami, ama nyimaiesueganga ama dusakajaba.

⁷Monyi yika ulabana melabini, amana magegengili temu tsikala. Mbe masakalabana, mbe dusakajabanga yiri dugovosa rie: Tumalemajaba.

⁸Dusamalewiji na dusamajaba diambu na dusamakipa ne diambu dimosi. Nyimajaba dugoba basigama na dubanganga mimbim ubanda vana mbura tsieniu.

⁹Mu diambu didiina diami nyimasuega kabu ami. Mu diambu dibundumbu buami nyimadulasila pugu nobusa uduboka.

¹⁰Nyimaduwetsiga tumba tsiri o muji nana bevayili lora jivema, nyimaduwetsiga na maguga.

¹¹Pa nyivayi nana, nyidivayi mu diambu didurondu duami. Dibandu yi diina diami diusabululu? Dibandu yi bundumba buami buvegu ombu mutu susu?

¹²Fumujandirie: Jenu bisi ndagu Jacob, kululuanu! Jenu baIsrael aba nyimanengila! Menu nyivu agutega na agusita wandi.

¹³Nyimavaga butamba na nyimawala julu. Nyibinengili na bisundili ulabana.

¹⁴Jenu botsu gukamanu na guluanu! Anyi va gari ogu amasamuna mandi meni? Jandi agu Fumu erondi udugusu duganu duandi na Babylone. Mangolu maFumu mamatsiarulu Babylone.

¹⁵Menu nyimavosa na nyimamunengila. Nyimamusolila yisalu na bisalu biandi biubueji.

¹⁶Bambananu nami na guluanu! Ubanda va dibandu nyisakavosa o musuega, nyimaba vana dibandu dimambu meni. (Namunyi Fumu aguvu Nsambi amansindiga na amapega Yinyunyi yiandi.)

¹⁷Fumu aguvu Mugobutsi agu na Nsambi Israel evosi rie: Menu la Fumu Nsambi agu nyigulonsi adivu na tsongu, nyiguwendisi muna nsila aji vengu guvioyilanga.

¹⁸Aa mbe gumaba limba ugulu maruma mami! Mbe ubueji uagu uba nderi mujamba, mbe maboti magu moba nderi mibiji mimubu.

¹⁹Bategula bagu boba bapuela nderi yisieyi ayivu va mugula mubu, diina diagu digotsiemuga na digobungu va gusu ami!

²⁰Gusuganu o Babylone, lensanu nowenda! Nyavisanu musamu na migamu minsangu, utubulianu na usamunianu te na masuka mabutamba! Vosanu rie: Fumu amawamusa musalitsi andi Israel!

²¹Ava amabawendisila o mbura ajigaa na mamba basamagulu puila. Amabapalisila mamba mu dimanyi, amapasa dimanyi na mamba mamapala!

²²Fumu amavosa rie: Batu abagekipi yitu nesi migaga bagobanganga nobueji.