Read Punu Esaie 5 Bible Online

Esaie 5 - Punu bible

Esaie 5

¹Nyuwimbilila aguami udurondu duimbu duaguami udurondu o nungi andi jimfuga jirayisan. Aguami udurondu, amaba na nungi va mbura jinyega.

²Amafutsa butamba na amavara bivaru biboti muna. Amayerunga mua yikumbulu yimfula ayimaba na yigamunu yimalamu. Amaviva udila digumba dimirayisan tumba amadila amigaa miboti.

³Aguami udurondu amavosa rie: Bisi Jerusalem na bisi Juda banu bansonsi va gari jetu na nungi ami!

⁴Yisalu yisusu yi ayi nyisakasala mu nungi ami? Dibandu yi nyimaviva udila digumba dimirayisan tumba nyimadila yika amigaa miboti?

⁵Mbana nyudutsingula adi nyuvaga na nungi ami. Nyurakula yivaga ayimakanda nung yiri migamba miujibunga; nyupansa yiabutsu yiri yiutsiarulu.

⁶Nyujipansa, jigomuekelusu na jigomuevaru; kengitsi na mikuga biubenda muna; nyuruma mamungi yiri magomuenoyisa mfula muna.

⁷Nungi jimfuga jirayisan jiFumu Mabadi jivu dilongu diIsrael nungi ajivu nsangu andi jivu bisi Juda. Amaronda amavu masungama; amalaba yika malungu mamawitulu! Amaronda amavu masungama; amagulu yika migamu mimunyongu!

⁸Ka muna maguga ma ombu jogu abebuesi ndagu va julu ndagu, nesi abebuesi nungi va julu nungi te na vogomueba puasasa. Vagaa mbura utsanisa basusu yika jogu beni na jogu beni botsana o bulongu!

⁹Adi Fumu Mabadi amandasa adidi rie: Mandagu meni mapuela mosiala mududu; mandagu meni maneni na maboti magomuetsanina batu.

¹⁰Manungi marieru mopalisa yika magumaranu malitera; oyivari kama kilu tsible otsonsiga yika yigumi.

¹¹Ka muna maguga ma ombu jogu abepali kedi tsineni udukilila malamu amelansi! Ka muna maguga ma ombu jogu abeyelu mukolu uotsu uyenalanganga!

¹²Sambi na ngomfi na ndungu na dimbika na malamu biubuejisi milambu miogu tumba bagekipi yisalu yiFumu na bagelabi abi amasala na makaka mandi.

¹³La dibandu Fumu evosili rie: Batu bami basundila ubegu baviga; mu mbari basamagulu amami. B, atu bogu baneni bofu na nsala, bindombu biogu bofu na puila.

¹⁴Mbura aji abafu jivu jidonga na jivu jalala utsudiga bapuela. Baneni na bageyi baJerusalem na nsangu ogu jiotsu bokota muna.

¹⁵Bageyi bodimbu, baneni bosundusu na abavu tsamanga bolasu yisonyi.

¹⁶Tumba Fumu Mabadi olasa dusungugu duandi, Nsambi olasa bunsambi buandi ava owarisila dusungugu.

¹⁷Bindombu bojanganga va mbura tsi bisina na benyi bojanganga biguji biogu.

¹⁸Ka muna maguga ma ombu jogu abavu na dunyungi aduibarombisi ufunisa mabi.

¹⁹Mbana bevosi rie: Fumu alensi, amani yisalu yiandi mbangu yiri jetu tubilaba! Duganu duNsambi Israel dulabini na dusungugu yiri jetu tudujaba!

²⁰Ka muna maguga ma ombu jogu abelabi mabi mavu maboti; abelabi pisama jivu yijalala na yijalala yivu pisama; abelabi nduli jivu dueyi na dueyi duvu nduli!

²¹Ka muna maguga ma ombu jogu abekelaba yiri bana diela na betasi yiri bana dujabu!

²²Ka muna maguga ma ombu jogu abedibuli mulugu unuanganga nesi mafubi mamalamu mamangolu!

²³Ka muna maguga ma ombu jandi aguiwamusi mungo mbela mu mbari amamulenda na aguipatuli mungo ndunga ndunga andi!

²⁴Nana mulutsu muji uisielisini kobu na nana mulutsu eni uisielisini biriri bigumuga dedi mosi ngansi tsiogu tsiubola na kembu tsiogu tsiuvembuga nderi difufundu mu mbari bamabusa migaga miFumu Mabadi na bamalensa mambu maNsambi Israel.

²⁵La dibandu Fumu amanyoyila batu bandi tindi kabu, ebagaangi na ebadimbi. Mikongu mimasisana; bamfumbi bavu bayinyi mu mansila nderi dibumbu. Ne nana kabu jiFumu jisakasaguga, nguangu jikivu va dikaka diaiidi.

²⁶Fumu ematisili yilimbu unengila batu abavu vala; na muviosi andi enengiii abavu o masuka mabutamba. Uruga beruyi mambangu.

²⁷Vagaa ne mutu umosi agumatogulu; vagaa ne mutu umosi agumasietuga; vagaa na mutu umosi agumatimbayilu; vagaa ne mutu umosi agumabusa uwarisa tsanda nesi mikudu mibapondu.

²⁸Mbansa tsiogu tsivu tsivalu; pita tsiogu tsimakunsama; birodi bibakabala bogu bivu nderi mamanyi, makulu mamakalu mogu mavu nderi yimbongila.

²⁹Nduku ogu jivu nderi jiyibusi yiyimbungu; nderi baana babimbungu begumbi ava bejangili ayi beleyi, beyibeyi na mutu ageyipatuli.

³⁰Muna yilumbu yieni bufumu buJuda bugumbulu nderi nduku mungudi o mubu. Mu bulongu buotsu yika pisama na munyongu; yijalala yiupindusu na mamungi.