Read Punu Esaie 55 Bible Online

Esaie 55 - Punu bible

Esaie 55

¹Jenu botsu aduigulu puila, ruganu o mamba; ne pa dugaa na mbongu! Ruganu uyisumba na jianu, yisumbanu malamu na dile, ne dugaa na mbongu, vagaa diambu.

²Dibandu yi duyinyambisini mbongu usumba abigaa biguji? Dibandu yi duimanini mangolu udila abigegukurusu? Kululuanu, mbana duji abivu biboti na dulabanga ubueji na digumba.

³Liganu matuji, ruganu ombu gami guluanu na dudila monyu. Fumu amavosa rie: Nyuvangana pangini jimutubu nenu na nyudulasa maboti ama nyimavangana na David:

⁴nyimamuvaga mbeji va gari batu na nyimamuvaga sefu nesi murumitsi umalongu.

⁵Ndeʼ Israel gunengila bisi malongu aba gugejabi, bisi malongu abagegujabi boruga mambangu ombu gagu mu diambu diFumu Nsambi agu na diNsambi Israel oyigusingisi digoba diedidi.

⁶Gabuganu ombu Fumu ava esingi ulabu; munengilianu ava akivu bebeli.

⁷Mutu agugekipi yitu nesi migaga adundibifubibi, mutu mubi adundi matasa mandi makulini; agabuyi ombu Fumu agumulasa yingeba, nesi ombu Nsambi etu agugetoyi utandanga.

⁸Amavosa nandi rie: Matasa mami magaa matasa menu; bifu bienu bigaa bifu biami.

⁹Nana julu jikakini vala na butamba dedi mosi bifu biami bivu vala na bienu, nesi matasa mami mavu vala na matasa menu.

¹⁰Mfula na mfula jivema bisunduyili o julu na bigemuegabuga guna te na biletsatsa butamba yiri buba na digumba nobendisa bivaru bimuvaritsi novega tsangu ombu mukukitsi nesi biguji ombu jandi oyijangingi.

¹¹Anana divu na mambu amepalili munu ami; magegabuyi magagabuga, magogambu uvaga adi nyimaronda nesi udugusu duganu duami.

¹²Nyiina, dupala na nsangu na dubegu na duvotsu; mikongu na bikundubuga biugamuga na nsangu va gusu enu, miri miotsu mimusiru miusiga tsambi.

¹³Va mbura ajimaleba matsiendi vobenda musipara, va mbura ajimaleba kengitsi vobenda mumirita; adina diulasa bundumba buFumu na diuba yirangumunu yiFumu ayigopansu mutubu.