Read Punu Esaie 58 Bible Online

Esaie 58 - Punu bible

Esaie 58

¹Fumu amavosa rie: Gamuga o julu warisa ugamuga. Gamuga na diufi o julu nderi mumbanda. Nyavisa mabi mabatu nesi masumu mabategula baJacob.

²Betombingi bilumbu biotsu berondi ujaba nana nyitasili; nderi bavu batu abedukingi dusungugu abasamabusa migaga miNsambi ogu. Bekwivuli ubatabulila bunsonsi buwelimina; berondi ubambana nami.

³Bamakwivula rie: Dibandu yi tuibusili uji pa gugetulabi? Dibandu yi tuikesunsila pa gugekipi? Kabogu nyimawagula rie: Yilumbu ayi duibusili uji duikipi yika mambu menu; duikambisi basalitsi benu botsu na bisalu biranga.

⁴Duiyenatsundanga noyenadimbasananga bigaba. Digaa diwelimina nana duibusili uji, tsambu tsienu tsigegulunu ombu gami.

⁵Je yilumbu ayi ubusa uji umunongu eni uindasi ubueji? Je ubandiga muru nderi yilelenga nosilama va siela nesi va dibufu; adina divu ubusa uji? Ayina yilumbu ayilasila Fumu ubueji?

⁶Ubusa uji aguindasi ubueji agugu: Nyangula bapanga abamatungu matutunga, surula mikudu mibakoli, jeyisa abamakambulu, pansa bilala bimunongu na munongu.

⁷Jandi oyigulu nsala mugabili biguji, kotisa abagaa na mandagu o ndagu agu, pa guilabi dibaala adivu penyi mugumbi tsanda, guyawimina muana taji agu.

⁸Mbana yijalala yiagu yiulabana nderi matebugulu, dubelusu duagu dusundila ulabana; dusungugu durela na bundumba buFumu bugukelisa.

⁹Ava gunengilila Fumu oguwagula; ava gugamuyila oguwaka rie: Meʼ janduʼgu! Pa gugusula yilala na pa gudunda usunga mulembu nesi uvosa posulu tsikulini,

¹⁰pa gugabila oyigulu nsala biguji biagu na pa guwamusa agumakambulu udugusu kanu tsiandi, kabogu yijalala yiagu yiutsiemusa pisama na pisama jiukaluga nderi muangulu.

¹¹Fumu obanganga mulonsi agu unsiia, oguwamusa udugusu kanu tsiagu o mbura atsigaa na mamba na omuewarisa bilema biagu. Guba nderi nungi ajimatsatsu nderi yileka ayi mamba magekamuyi.

¹²Abagu bomuerungulila na bivongu abimapansu gumuerungulila bibuga bikala. Bogunengilanga mulonditsi umaluta nesi oyibangusi musiengi.

¹³Pa gugosala bisalu biagu mu yilumbu yiuvuma pa gugodugusu duganu dundeʼ beni mu yilumbu yiami yiyingitsi pa guilabi ubueji na yilumbu yiuvuma noyikelisa uyitsa Fumu pa guiyiyitsi nobusa usala nesi utiga muteti

¹⁴mbana nyumuebanganga nsangu agu. Menu Fumu nyugumatisa na ndungulu tsiagu o tindi julu tsimikongu na nyugulasa ubueji na disiala ditaji agu Jacob. Motsu mana Fumu amavangana.