Read Punu Esaie 60 Bible Online

Esaie 60 - Punu bible

Esaie 60

¹Jerusalem, retsama, lula! Yijalala yiagu uruga yiruyi. Bundumba buFumu bumalabana ombu gagu.

²Pisama jimakubiga butamba na mukolu uikubiyi batu; tumba Fumu oretsama nogumonitsa na bundumba buandi bugululilanga.

³Bisi malongu bomonutsu na yijalala yiagu nesi bakaga bomonutsungu na misasi miyijalala yiagu.

⁴Gengila yiari na yiari na laba baana bagu: botsu ugukama begukimi na uruga beruyi ombu gagu; baana bagu bababaala beruyili vala na baana bagu babagetu bebegu mu matulu.

⁵Ava gulabila mambu meni gubasa na nsangu te na gubakama murima. Busina buotsu bumubu bugugengila nesi bungunu buotsu bumalongu buruga ombu gagu.

⁶Basamo bapuela bapuela bobasa bulongu buagu nesi balingitsi baMadian na baEfa; botsu boruyila o Saba bobega lora na bima bimbunga jiboti na bonyavisa duyitsu duFumu.

⁷Migamba miotsu miQuedar miugukama ombu gagu balumi babindombu baNebayot bogusalila; bovagulu pagu jiwelimina va yinyensulu yiami yipagu na Ndagu ami jiuba yika bundumba na bundumba.

⁸Banyi bevioyi nderi mamungi? Banyi bevioyi nderi mabembi amegabuyi o ndagu ogu?

⁹Banyingi begugengili, makumbi mamamba maTarsis moreyila ubega baana bagu abavu vala na lora tsiogu tsivema na lora. Beruyi uyiyitsa diina diFumu Nsambi agu aguvu Nsambi Israel oyigudodisl

¹⁰Benyi borungulila bivaga biagu, bakaga bogu boba basalitsi bagu. Fumu amavosa rie: nyimagudimba na kabu ami. Tumba namapapa nyugulasa yingeba.

¹¹Maguyi magu mobanganga jalala, magodibama ne nyangu ne mukolu yiri busina bumalongu bukotanga ombu gagu nesi bakaga bokotanga.

¹²Malongu na bufumu abigogusalila biutsiemuga, malongu meni motsu mogudusu.

¹³Bundumba buLiban bumga ombu gagu, nesi miri: musipara na mupina na mubuisa; miotsu miubegu o ubuejisa Ndagu ami. Anana nyulasila bundumba bumbura aji nyitsanini.

¹⁴Bakuanitsi bagu boruga uyikesundusa va gusu agu na botsu abamagulensanga bogudama va makulu magu. Bogunengilanga rie: Musiengi uFumu, Sion uNsambi Israel.

¹⁵Gumabusu na gumavinu, mutu asamamuegulongula. Amana mamasuka, nyuguvayila mbura jiboti ajiulasanga batu nsangu te na kula tsiotsu.

¹⁶Malongu na bakaga bogukelisanga nana mubusi enuisili muana. Kabogu gujaba yiri menu nyivu Fumu nesi Mugobutsi, menu nyivu Nsambi mangolu maJacob, nyimagukipanga.

¹⁷Nyubeganga lora va yivinga yikunga; kunga va yivinga yitsimbi; madilu va yivinga yimamanyi. Duvotsu duba musuga agu, dusungugu duba mangolu magu.

¹⁸Posulu tsidikasi tsigomuegulunu mu bulongu buagu, nesi dubungu na bivongu bigodala mandilu magu. Guluga bivaga biagu: Dugobutsu; maguyi magu: Bundumba ombu Nsambi.

¹⁹Wisi ugomueba yijalala yiagu va nyangu, tsungi jigogumonitsa muetsa mu mbari menu Fumu Nsambi nyuba yijalala yiagu te na mutubu nesi bundumba buagu.

²⁰Wisi agu ugotsima, tsungi agu jigotsiemuga; mu mbari menu Fumu nyuba yijalala yiagu te na mutubu. Bilumbu bibukuili buagu biusuka.

²¹Batu bagu boba basungama na basungama; bobanganga fumu tsibulongu. Jogu aba meʼ beni nyimasunda ulasa bundumba buami boba nderi bivaru binungi ami

²²Mutu mosi okaluga yinombu, mua yifumba yigeyi yiukaluga dilongu adivu na mangolu. Menu Fumu, ngotamba udugusu mambu meni va temu jiwelimina.