Read Punu Esaie 62 Bible Online

Esaie 62 - Punu bible

Esaie 62

¹Mu diambu didurondu duJerusalem ngovola sui, mu diambu didurondu duSion, ngodunda te na dusungugu duandi dulabana nana wisi uitebuyili na dugobutsu duandi dubagunu na yitutu ayiluli.

²Mbana bisi malongu bolaba yiri Fumu amagugobula na bakaga botsu bolaba bundumba buagu. Bogunengilanga na diina digona adi Fumu jaʼ beni oguluga.

³Ndeʼ guba nderi dugaba dubundumba va dikaka diFumu nesi dugaba dukaga va dikaka diNsambi agu.

⁴Bagomuegunengilanga rie: Musiengi ulibunu. Bagomuenengilanga dilongu diagu rie: Butamba budukanga. Tumba bogunengilanga rie: Nsangu jiFumu, na bonengilanga butamba buagu rie: Mugatsi. Mu mbari Fumu elabi nsangu nagu, na butamba bukota o diwela.

⁵Nana mufudu efubinini na tsiemi anana jandi agumuegurungulila obila mulumi agu; nana mugatsi elasili mulumi andi nsangu anana ndeʼ gulasila Nsambi agu nsangu.

⁶Jerusalem, nyimasunsa bawaisi mu julu tsibivaga biagu; bagoba sui nesi nyangu nesi mukolu. Jenu aduirangimini Fumu duyavuma!

⁷Duyamusingisa yivumu te na omuerungulila Jerusalem nesi te na olasa bundumba bubulongu buotsu!

⁸Fumu amagana kaka rie: Yiotsu ayi mangolu mami mavu ngomuesingisa bavinitsi bagu ukinda ble atsi gumavara, benyi bagomuenuanganga malamu magu ama dumatsoganga udila.

⁹Tumba jogu abotsonsiga ble botsijanganga na boyitsanga Fumu. Abogama malamu bomanuanganga va piasu tsiNdagu ami.

¹⁰Bisi Jerusalem, vioganu vioganu va miunu njindagu! Solilanu batu nsila! Solanu, solanu nsila! Gusulanu mamanyi! Matisilanu batu yilimbu!

¹¹Fumu amatubula amandi te no masuka mabulongu rie: Tsingula bisi Sion rie: Laba, Mugobutsi agu uruga eruyi; laba, ubega ebeyi batu bandi, aba amadila, aba amaketsoyisila.

¹²Bodunengilanga batu baNsambi aba Fumu amawaka kalala. Ndeʼ Jerusalem bagomuegunengilanga: Musiengi ulibunu tumba bogunengilanga: Musiengi aguirondungu.