Read Punu Esaie 65 Bible Online

Esaie 65 - Punu bible

Esaie 65

¹Nyimaba ukunsama uwagula tumba basamakwivula yivu na nyimakelasa tumba basamatomba. Nyimavosa rie: Meʼ janduʼgu, uruga nyiruyi ombu batu abasamandengila.

²Nyimasamba makaka mami bilumbu biotsu ombu batu abavu mimbini, abevioyingi mu nsila ajigaa jiboti uyenadukanga matasa mogu.

³Bavu batu abenyoyisingi ava bevaguli pagu tsiogu o manungi na benyensi bima bimbunga jiboti mu julu tsibirika;

⁴bavu batu abetsani va julu tsimangila noyesilimina o gari tsimalima, abejangingi nyama tsibangulu na belambi biguji bimuinsi mu mambiji mogu,

⁵bevosi na jogu abebenguni nogu rie: Gusuga vana, guyabambana nami na muinsi agu! Fumu amavosa rie: Mambu mamunongu eni menyoyisi tindi unyoyisa.

⁶Nyimagana kaka rie: Ngovola sui, nyubakilisa, nyiina, nyubakilisa.

⁷Fumu amavosa rie: Mu diambu dimabi menu na mabi mabataji benu abamanyensa bima bimbunga jiboti va julu tsimikongu, abamansienga va julu tsibikundubuga kabogu nyubakilisa dedi na mabi mogu.

⁸Fumuevosirie: Ava bedilili yisaga ayivu na mamba mapuela bevosi rie: Guyayibunga amuna muvu tsongu! Nyubavayila dedi mosi mu diambu didurondu duami ngobunga basigama bami botsu.

⁹Nyuvega Jacob bategula, nyukalusa Juda dilongu. Bobialila mikongu miami na bisolu biami bodila bulongu na basigama bami botsananga muna.

¹⁰Saron jiuba mbura aji bangombi bojangilanga. Adina nyuvayila batu bami abetombi.

¹¹Namapapa uruga nyiruyi ombu genu aguimbusi aduilibini mukongu ami uyingitsi uyenakunsila nsambi Gad tavula nobasila nsambi Meni dimoyi!

¹²Nyudukunsila dijenga na jenu botsu dukutama uboku. Nyimadunengila na dusamakwagula, nyimavosa na dusamakululu. Dumavaga dibi va gusu ami na dumasola amegendasi ubueji.

¹³La dibandu Fumu aguvu Fumu evosili rie: Guluanu, basigama bami bojanganga jenu dufuanganga na nsala; basigama bami bonuanganga, jenu dufuanganga na puila; basigama bami bolabanga nsangu, jenu dulabanga yisonyi,

¹⁴basigama bami bowimbilanga na nsangu jiubasa mirima miogu jenu dugamuganga na mirima mitsira; dulilanga na mirima mibuliga.

¹⁵Basigama bami bosalisa diina dienu yika uduloga rie: Fumu aguvu Fumu odubokisa. Oluga basigama bandi diina disusu.

¹⁶Jogu aberondi ugabulu miula o bulongu bomigabulu na Nsambi aguvu na ngensa, na jogu aboleva pesi o bulongu bojileva na Nsambi aguvu na ngensa. Fumu amavosa rie: Maguga makala molibunu, ngomuemalaba, via!

¹⁷Nyusunda julu jigona na butamba bugona, bagomuerangimina mambu makala ne umatsanga.

¹⁸Labanu ubueji na sangilanu temu tsiotsu, mu diambu di-abi nyusunda: Jerusalem ubasa na nsangu na bisi uonyi yika nsangu na nsangu.

¹⁹Meʼ wami nyusangila mu diambu diJerusalem na nyulaba ubueji mu diambu dibatu bami. Amuna mugogulunu milingi nesi migamu.

²⁰Vagomueba bangebi nesi binunu abagodugusu bilumbu biogu mu mbari jandi agufuila va kama bilima oba yika mufudu na agugodala kama bilima olabana nderi alogu.

²¹Borungisa mandagu ama botsaninanga bovarisa manungi mamfuga tsirayisan na bomijanganga.

²²Bagorungisa mandagu utsanisa basusu, bagovarisa manungi ulisila batu basusu; bilumbu bibatu bami biuba nderi bilumbu bimiri na bisolu biami bosangila bisalu bijogu beni.

²³Bagosala masasala, bagobura baana ubabokisa, nyugabila mikuta miogu miula, jogu na baana bogu.

²⁴Nyuwagula ne abasakandengila; nyugulu nesi abasakamana uvosa.

²⁵Minsi na yindombu bojanganga va mosi. Yimbungu ojanganga bisinga nderi ngombi. Nyoga ojanganga difufundu. Fumu amavosa rie: Bagomuevaga dibi nesi dikasi o mukongu ami uyingitsi.