Read Punu Esaie 7 Bible Online

Esaie 7 - Punu bible

Esaie 7

¹Ahaz muana dibaala uYotam mutegula uOzias amaba kaga jiJuda. Ressin agumaba kaga jiSyrie amawenda va mosi na Peca muana dibaala uRemalia agumaba kaga jiIsrael uyetumuna musiengi uJerusalem tumba bamakonda udivaga.

²Bamayetsingula Ahaz mutegula uDavid na batu bandi rie: Bisi Syrie bamavaga mulaku o yiari yiEfraim. Ahaz na batu bandi bamapupusu mu dionyi dedi mosi nana mungudi uipupisili miri.

³Mbana Fumu amaruma Esaie rie: Wendanu jenu na muana agu udibaala Cfrear-Yachoub ubengusana Ahaz aguvu o yiari yidianga dineni mu nsila va mbura aji besusili.

⁴Mutsinguli rie: Kebana, guyalaba keri na guyanyoga mu diambu dikabu jiRessin muisi Syrie na jimuana dibaala uRemalia. Bavu yika magala mabeji ameronguli nsumbili.

⁵Nyijabi bisi Syrie na bagora baEfraim va mosi na Peca bamatunga fundu uduvayila dibi, jogu rie:

⁶Tʼwendianu o bufumu buJuda tuyekandanu musiengi nobula bivaga mbana tukabiatsanu muana dibaala uTabeel kaga.

⁷Tumba Fumu aguvu tindi Fumu jandi rie: Adina digolabana, digorungula uba.

⁸Mu mbari Damas uvu musiengi utega uSyrie na Ressin avu murumitsi uDamas. Yiotsu ayi magumasiamunu na bilima biranu biusuka bisi Efraim bagomueba dilongu.

⁹Samarie uvu musiengi utega uEfraim na Peca avu murumitsi uSamarie; dugorungula uwara pa dugokevega ombu Fumu.

¹⁰Fumu amamuetsingula Ahaz rie:

¹¹Wivula Fumu Nsambi agu ugulasa yilimba nesi yibutamba nesi yijulu.

¹²Ahaz amawaka rie: Tsatsabi! Ngomanga Fumu.

¹³Mbana Esaie amavosarie: Jenu bategula baDavid, guluanu! Tsia disaawelimina umanga batu? Dibandu yi duimangili Nsambi ami?

¹⁴La dibandu Fumu jaʼ beni odulasila yilimba: tsiemi odila dimi, obura muana dibaala na jandi omuluga Emmanuel, diwendi rie: Nsambi avu netu.

¹⁵Muana onuanganga dile nojanganga buji te na ojaba ubusa dibi nosola diboti.

¹⁶Tumba ne muana akajaba ubusa dibi nosola diboti, bulongu bubakaga babeji abegulasi goma busiala mududu.

¹⁷Fumu okunsa bilumbu bimaguga abisakalabana na kala ubanda na yilumbu ayi bulongu buEfraim bumakakininanabufumu buJuda; obikunsila jenu na batu bagu na bisi ndagu taji agu; osingisa kaga jiAssyrie ulabana.

¹⁸Va temu eni muviosi uFumu usigu unengila bansi aboba o makodu mamijamba miEgypte na banyosi aboba o bulongu buAssyrie.

¹⁹Boruga ubasa o bibususu nesi mu malima nesi mu bivala biotsu na mu biriri biotsu.

²⁰Va temu eni Fumu obonga disambi adi amasomba o disimu dina dimujamba Euphrate nofuga kaga ji Assyrie, nesi muru nesi mipilingi nesi yiedu.

²¹Va temu eni mutu mutu oba na muana ngombi na binsabi bibeji,

²²abiuveganga digumba dineni dile adi bonuanganga; botsu abosiala mu bulongu bonuanganga dile nojanganga buji.

²³Va temu eni nungi ajivu na tosini jibitayi birayisan jiusumbusu tosini mbongu tsilora jivema; jigomuesalusu; jiuba yika matsiendi na matsiendi.

²⁴Batu bokotanga muna na mbansa na bapita; nyiina, bulongu buotsu buba yika matsiendi na matsiendi; avana bobungulilanga bangombi na bindombu.

²⁵Batu bagomuetola o mikongu miotsu amimasalulungu manungi, boduma kengitsi na matsiendi: