Read Punu Bisalu Bilevi 1 Bible Online

Bisalu Bilevi 1 - Punu bible

Bisalu Bilevi 1

¹Fumu amanengila Moise ava amabila o Ndagu Yibenguna amavosa nandi rie:

²Tsingula baIsrael: Ava mutu ovagulila Fumu pagu, ovagulila bibulu: nesi bineni nesi bigeyi.

³Pa pagu andi jiunyensa jivu ngombi, ovagula mulumi agugaa na yifu; oguvagulila va gusu kana Ndagu Yibenguna, va gusu Fumu yiri osingu na Fumu.

⁴Jandi osakiga gogu andi va julu muru uyibulu ayivagulu pagu jiunyensa, ayiusingu na Fumu utsindula dibumi diandi.

⁵Jandi otabula muana ngombi muru va gusu Fumu; bavagulitsi bapagu, baana bababaala baAaron bovagula malungu na bomatsatsa yiari na yiari va julu yinyensulu yipagu ayivu va gusu kana Ndagu Yibenguna.

⁶Borala yibulu ayiuvagulu pagu, mbana boyisasa.

⁷Baana bababaala baAaron, muvagulitsi upagu, bobangisa muji va yinyensulu yipagu na bodukasana mikansu.

⁸Bavagulitsi bapagu, bosakiga mapula na muru na matsi va julu mikansu amimadukusunu va yinyensulu yipagu.

⁹Muvagulitsi upagu umosi osusa misopu na bakondu; onyensa biotsu va yinyensulu yipagu. Ajina la pagu jiunyensa ajiusielasana o muji, ajiugulunu mbunga jiboti ombu Fumu.

¹⁰Pa pagu andi jiunyensa jivu yibulu yigeyi: muana yindombu vo yinsabi, ovagula mulumi agugaa na yifu.

¹¹Jandi ogutabulila mum o yiari yibanda yiyinyensulu yipagu, va gusu Fumu; na bavagulitsi bapagu, baana bababaala baAaron, botsatsa malungu yiari na yiari biyinyensulu yipagu.

¹²Mbana ogusasa mbana muvagulitsi upagu osakiga mapula mamuru na matsi va julu mikansu amimadukusunu va julu yinyensulu yipagu.

¹³Muvagulitsi upagu osusa misopu na bakondu. Muvagulitsi upagu ovagula biotsu va yinyensulu yipagu. Ajina la pagu jiunyensa, ajiusielusunu o muji, ajiugulunu mbunga jiboti ombu Fumu.

¹⁴Pa pagu andi ombu Fumu jivu batsoli, ovagula makunda vo baana bamabembi.

¹⁵Muvagulitsi upagu ovagula tsoli va yinyensulu yipagu; oyinyunga kingu na ojivagula va yinyensulu yipagu mbana okelumusa malungu va mugula uyinyensulu yipagu.

¹⁶Ogusula yifinsi na ojifutsila wandi na obibuaga va mugula uyinyensulu yipagu o yiari ayi wisi epalili va mbura aji bebuayili mabufu.

¹⁷Jandi opasa mapapi, tsiri umakakula mbana muvagulitsi upagu onyensa tsoli va yinyensulu yipagu va julu mikansu amimadukusunu. Ajina la pagu jiunyensa, ajiusielusunu o muji, ajiugulunu mbunga jiboti ombu Fumu.