Read Punu Bisalu Bilevi 15 Bible Online

Bisalu Bilevi 15 - Punu bible

Bisalu Bilevi 15

¹Fumu amatsingula Moise na Aaron rie:

²Tsingulanu baIsrael rie:

³Dibaala diotsu adivu na suta avu muinsi. Aji muinsi mu diambu disuta andi; ne pa esubi maiuinyi ne pa agesubi mafuinyi; dibaala avu muinsi.

⁴Tangi jiotsu aji jandi osilimina jiuba muinsi na yitsiga yiotsu ayi jandi otsanina yiuba muinsi.

⁵Jandi agubemba tangi andi vengu osusa biduaru biandi na jaʼ beni vengu obuila, oba muinsi te na tsisiga.

⁶Jandi oyitsani va yitsiga ayi jandi amaletsanina vengu osusa biduaru biandi wandi na jaʼ beni obuila, oba muinsi te na tsisiga.

⁷Jandi agubemba aguvu na suta vengu osusa biduaru biandi na jaʼ beni wandi vengu obuila, oba muinsi te na tsisiga.

⁸Pa ofuta mutu ulioma mateji, mutu eni osusa biduaru biandi nobuila, oba muinsi te na tsisiga.

⁹Yitsiga yiyibulu yiotsu ayi jandi onangama, yiuba muinsi.

¹⁰Jandi agubemba yima yiotsu ayi yibedu yisuta amatsanina vo usilimina oba muinsi te na tsisiga; jandi aguyinangula osusa biduaru biandi, jaʼ beni obuila wandi, oba muinsi te na tsisiga.

¹¹Pa yibedu yisuta asakasusa makaka mandi na obemba mutu susu, mutu eni osusa biduaru biandi, obuila wandi, oba muinsi te na tsisiga.

¹²Yisanga yiotsu ayiubembu nandi yiubulu na yilaku yiotsu vengu yiususu.

¹³Pa mafuinyi mokamuga oranga yisambuali yibilumbu biduliomusu duandi; osusa biduaru biandi, obuila mamba mayileka; oba ulioma.

¹⁴Yilumbu yimunana obonga makunda mabeji vo baana bamabembi babeji, owenda o dikotulu diNdagu Yibenguna va gusu Fumu uyemawakisa ombu muvagulitsi upagu.

¹⁵Muvagulitsi upagu omavagula: dimosi diuvagulu pagu jiutsindula dibumi, disusu diuvagulu pagu jiunyensa; muvagulitsi upagu omuliomisa umutsindula dibumi dibuali buandi va gusu Fumu.

¹⁶Dibaala adipalisi masuba obuila, oba muinsi te na tsisiga.

¹⁷Yiduaru yiotsu vo dimfunga abimamanamu, biususu; biuba muinsi te na tsisiga.

¹⁸Pa mugetu amasilama na dibaala jogu botsu babeji bobuila; boba muinsi te na tsisiga.

¹⁹Mugetu agulaba tsungi andi otsana yisambuali yibilumbu na muinsi andi. Mutu uotsu agumubemba oba na muinsi te na tsisiga.

²⁰Tangi jiotsu aji jandi osilimina ava obila na tsungi andi jiuba muinsi, yitsiga yiotsu ayi jandi otsanina yiuba muinsi.

²¹Mutu uotsu agubemba tangi andi vengu osusa biduaru biandi, jaʼ beni obuila, oba muinsi te na tsisiga.

²²Mutu uotsu agubemba yitsiga yiotsu ayi jandi amatsanina osusa biduaru biandi, jaʼ beni obuila, oba muinsi te na tsisiga.

²³Pa vavu yima va tangi vo va yitsiga ayi amatsanina, jandi aguyibemba oba muinsi te na tsisiga.

²⁴Pa dibaala amasilama nandi na malungu momunamu oba muinsi te na yisambuali yibilumbu, tangi jiotsu aji dibaala dieni osilimina jiuba muinsi.

²⁵Mugetu agulabanga malungu mu bilumbu bipuela abigaa bilumbu bitsungi andi vo pa tsungi andi jiutsinga uviolila temu tsikala, oba muinsi dedi mosi nana va temu tsungi andi.

²⁶Tangi jiotsu aji osilimina va temu eni aji olabanga malungu jiuba dedi na tangi aji esilimini va temu tsungi andi, yitsiga yiotsu ayi jandi otsanina yiuba muinsi dedi mosi na temu jitsungi andi.

²⁷Mutu uotsu agubemba biotsu bina oba muinsi; vengu osusa biduaru biandi, jaʼ beni obuila, oba muinsi te na tsisiga.

²⁸Malungu matsungi andi manokamuga, oranga yisambuali yibilumbu mbana bionyi binovioga oba ulioma.

²⁹Yilumbu yimunana mugetu obonga makunda mabeji vo baana bamabembi babeji uyemawakisa ombu muvagulitsi upagu va dikotulu diNdagu Yibenguna.

³⁰Muvagulitsi upagu ovagula dimosi pagu jiutsindula dibumi na disusu diuvagulu pagu jiunyensa mbana muvagulitsi upagu omuliomisa umutsindula dibumi va gusu Fumu mu diambu dimalungu matsungi andi amamamurombisa uba muinsi.

³¹Anana dukakisinina baIsrael na muinsi ogu yiri bakeefu mu diambu dimuinsi ogu, yika bebivisi Ndagu ami ajivu va gari ogu.

³²Aguna la mugaga ujandi aguvu na suta vo aguipalisi masuba

³³nesi ujandi aguvu na tsungi andi na udibaala vo mugetu aguvu na buali bumalungu na udibaala adimasilama na mugetu aguvu na muinsi utsungi andi.