Read Punu Bisalu Bilevi 16 Bible Online

Bisalu Bilevi 16 - Punu bible

Bisalu Bilevi 16

¹Yiotsu ayi baana babeji bababaala baAaron bamafuila ava bamakelasila va gusu Fumu, Fumu amamoga na Moise.

²Fumu amamutsingula rie: Tsingula muana nguji agu Aaron, ayakotanga makokota o Mbura Ajivu Tindi Yingitsi o nsima dumbu va gusu yidibutsu yiyingeba ayivu va julu yigara yipangini yiri akeefu; mu mbari nyulabana va gari dimungi va julu yidibutsu yiyingeba.

³Gulu nana Aaron okotilanga o Mbura Yingitsi. Obonga mulumi ngombi uvagula pagu jiutsindula dibumi na mulumi yindombu uvagula pagu jiunyensa.

⁴Jandi oduara yijungi yibuvagulitsi bupagu yimatsanda maboti, oduara mibati amimavagu na matsanda maboti na otunga beleeti na oduara yiviovi: abina bivu biduaru bibuvagulitsi bupagu abi oduara ava omanina ubuila.

⁵Dibuli diIsrael dimuvega balumi babinsabi babeji bapagu jiutsindula dibumi na mulumi yindombu umosi upagu jiunyensa.

⁶Aaron obega mulumi ngombi uvagula pagu andi jiutsindula dibumi, otsindula dibumi dijaʼ beni na dibisi ndagu andi.

⁷Mbana obega balumi babeji babinsabi, obasunsa va gusu Fumu va dikotulu diNdagu Yibenguna.

⁸Aaion obuaga mbanda tsibalumi beni babinsabi; jimosi jiugaanga aguvu uFumu jisusu jiugaanga aguvu uAzazel.

⁹Aaron obambasana mulumi yinsabi uFumu agumagaangu na mbanda, aguvagulu pagu jiutsindula dibumi.

¹⁰Mulumi yinsabi uAzazel, agumagaangu na mbanda uwakusu monyu va gusu Fumu yiri usalulu utsindula dibumi nonyambusunu o kumu mu mbari uvu uAzazel.

¹¹Aaron olevagula mulumi ngombi pagu andi jiutsindula dibumi, otsindula dibumi dijaʼ beni na dibisi ndagu andi. Jandi otabula muru umulumi ngombi upagu jiutsindula dibumi.

¹²Obonga yisunsulu yimagala yibasa na magala amavu muji amamagusulu o muji uyinyensulu yipagu va gusu Fumu na makaka mabeji mabima bimbunga jiboti ajivandumuyi; obega bima bieni o nsima dumbu.

¹³Okukumuna bima bimbunga jibod o muji va gusu Fumu yiri kugumfu jiudibiga yidibutsu yiyingeba ayivu va julu yigara yipangini yiri akeefu.

¹⁴Obonga malungu mamulumi ngombi; omatsatsa na mulembu andi va gusu yidibutsu yiyingeba o yiari ayi wisi epalili; omatsatsa na mulembu andi yisambuali yikumbu va julu yidibutsu yieni.

¹⁵Otabula muru umulumi yinsabi upagu jiutsindula dibumi, obega malungu o nsima dumbu. Ovaga na malungu meni nana amavayila na malungu mamulumi ngombi, omatsatsa va julu na va gusu yidibutsu yiyingeba.

¹⁶Anana oliomisila utsindula dibumi diMbura Yingitsi mu diambu dimuinsi ubaIsrael na dinsumugulu tsiotsu atsi bamavayila masumu. Ovaga munongu mosi mu diambu diMbura Nsambi mu mbari jivu va gari bango muinsi.

¹⁷Vagoba mutu ne umosi o gari Ndagu Yibenguna ava okotila uliomisa notsindula dibumi o Mbura Nsambi. Otsindula dibumi dijaʼ beni na dibisi ndagu andi na didibuli diotsu diIsrael.

¹⁸Ava opalila osungama o yinyensulu yipagu ayivu va gusu Fumu uyiliomisa noyitsindula dibumi obonga malungu mamulumi ngombi na mamulumi yinsabi, omasinga yiari na yiari bimasiyi mayinyensulu yipagu.

¹⁹Otsatsa malungu yisambuali yikumbu na mulembu andi va yinyensulu yipagu; oyiliomisa tindi uliomisa mu diambu dimuinsi ubaIsrael.

²⁰Ava Aaron omanina uliomisa notsindula dibumi diMbura Nsambi na diNdagu Yibenguna na diyinyensulu yipagu, obambasana mulumi yinsabi umonyu.

²¹Aaron osakiga miogu miandi va julu muru umulumi yinsabi umonyu, mbana otubula masumu motsu mabaIsrael na nsumugulu tsiotsu atsi bamasumunina; omisakiga va julu muru umulumi yinsabi mbana ogubinga nogunyambisa o kumu, ovega yisalu yieni yiubinga mulumi yinsabi ombu dibaala adimasolu.

²²Mulumi yinsabi ubega masumu mogu motsu o mbura jibupinsa. Mulumi yinsabi ubingu o kumu.

²³Aaron okota o Ndagu Yibenguna; ovula biduaru bibuvagulitsi bupagu bimatsanda maboti abi amaduara ava amakotila o Mbura Nsambi, obisila vana.

²⁴Obuila va mbura jilioma nomueduara biduaru biandi. Mbana opala, ovagula pagu andi jiunyensa na pagu jiunyensa jibatu botsu; otsindula dibumi dijaʼ beni na dibatu botsu.

²⁵Onyensa matsi mabibulu bipagu jiutsindula dibumi va yinyensulu yipagu.

²⁶Jandi agubinga mulumi yinsabi uAzazel osusa biduaru biandi na obuila wandi; anomana nana ogabuga o mulaku.

²⁷Bobega mulumi ngombi na mulumi yinsabi bapagu jiutsindula dibumi o tsomu dimbu na bobega malungu ma-bonyi o Mbura Nsambi uyetsindula dibumi, bonyensa mikata mibonyi na misonyi na mambi wandi.

²⁸Jandi agubinyensa osusa biduani biandi, jaʼ beni obuila wandi, anomana omuegabuga o mulaku.

²⁹Agugu uvu mugaga enu umutubu: mu yilumbu yimugumi yitsungi jimusambuali, dukevongula, dugosala ne yisalu yimosi: ne muisi bulongu ne muenyi aguvu va gari enu.

³⁰Mu mbari la mu yilumbu yieni botsindulila dibumi dienu yiri jenu duliomusu; duliomusu jenu botsu, muinsi uotsu umasumu menu va gusu Fumu.

³¹Yilumbu yieni yiuba yitsona la yilumbu yiuvuma na dukevongula. Agugu uvu mugaga umutubu.

³²Pagu jiutsindula dibumi jiuvagulu na muvagulitsi upagu agumasingu matsi na agumabiatsu va yivinga yitaji andi yibuvagulitsi bupagu; jandi oduara biduaru bibuvagulitsi bupagu abimararugu na matsanda maboti.

³³Jandi oliomisa notsindula dibumi diMbura Ajivu Tindi Yingitsi na oliomisa notsindula dibumi diNdagu Yibenguna na diyinyensulu yipagu; otsindula dibumi dibavagulitsi bapagu na dibuli diotsu diIsrael.

³⁴Aguna uba mugaga enu umutubu: pagu jiutsindula dibumi jiuvagululungu baIsrael temu mosi mu yilima mu diambu dimasumu mogu. Aaron amavaga motsu ama Fumu amaruma Moise.