Read Punu Bisalu Bilevi 19 Bible Online

Bisalu Bilevi 19 - Punu bible

Bisalu Bilevi 19

¹Fumu amatsingula Moise rie:

²Tsingula dibuli diotsu diIsrael rie: Banu aba Nsambi, mu mbari menu la Fumu Nsambi enu.

³Mutu uotsu odedila nguji na taji andi na okelisanga bilumbu biami bitsona. Menu la Fumu Nsambi enu.

⁴Duyamuegabuga uyitsa bakosi na duyavaga bansambi basusu babudilu. Menu la Fumu Nsambi enu.

⁵Ava duvagulila Fumu pagu tsikabusulu tsimaboti, dutsivagula nana tsimarumunu yiri tsiusingu.

⁶Yibulu ayiuvagulu pagu yiuligu yilumbu ayi duyivagulila vo durungula usuega nyama tsimosi te na kedi; tumba atsiumuesiala te na yilumbu ayimurieru tsiunyensu.

⁷Pa mutu otsiji yilumbu ayimurieru tsiuba nsoruru, pagu jigosingu.

⁸Pa mutu otsiji owarila mukilu udisumu diandi, amalensa pagu ajimavagululu Fumu: mutu eguna ogusulu va gari batu bandi.

⁹Ava dutsonsiyila digumba o bulongu buenu dusila mua yiasi yimanungi menu ayi dugodokula na duyabola abisalulu muna.

¹⁰Guyadokula bisaga abimasialulu o nungi agu wandi na guyabola milunda amiubonduga. Gusilila bijaga na benyi mionyi. Menu la Fumu Nsambi agu.

¹¹Duyadaga na duyafurasana na duyadunsasana.

¹²Duyaleva pesi tsimfurulu na diina diami, adina mbe diudurombisa usabula diina diNsambi enu. Menu la Fumu Nsambi enu.

¹³Guyakambisa mutu nagu, guyamupatula ne yima yimosi na dikasi. Guyakelisa futa jimusalitsi te na kedi.

¹⁴Guyasienga madiba na guyasunsila yidunga ne yima yimosi va nsila ayiumurombisa uberuga; goma Nsambi jibi nagu. Menu la Fumu Nsambi agu.

¹⁵Guyavaga dibi ava guitabulili bunsonsi: guyagengila bufufu vo buneni bumutu tumba tabulila mutu nagu bunsonsi na busungama.

¹⁶Guyafuengilila batu bagu. Guyarombisa mutu nagu mbela dufu. Menu la Fumu.

¹⁷Guyavina muana taji agu: guyatsikadana umusiemba yiri gugoba na mbela.

¹⁸Guyagabusa pila na guyaba na kueru na batu bagu. Gurondanga mutu nagu nana guikerondila. Menu la Fumu.

¹⁹Dukelisanga migaga miemimi: Guyasingisa minongu mibeji mibiruitsi ubebasana: guyakuka minongu mibeji mitsangu o nungi agu; guyaduara yiduaru ayimabuangu na minongu mibeji mibanyongi.

²⁰Ava dibaala ovayila bumbembu na mugetu aguvu muviga agumakumu munu na dibaala disusu, pa asakagobulu vo ujegusu, jogu bokilusu, tumba tsiri mukilu udufu mu mbari mugetu eni avu muviga.

²¹Dibaala obega mulumi yindombu va dikotulu diNdagu Yibenguna; mulumi yindombu upagu jimbela.

²²Muvagulitsi upagu omutsindulila dibumi va gusu Fumu; mulumi yindombu uvagulu pagu jimbela mu diambu didibi adi amavaga mbana masumu ama amavaga momutandu.

²³Ava dukotila o bulongu buCanaan na duvara miri amiburi milunda miminongu na minongu, dukipanga milunda mitega muinsi te na bilima birieru, duyamiji via!

²⁴Mu yilima ayimuina, milunda miotsu miuwakusu Fumu o feta jiduyitsu.

²⁵Yilima ayimuranu dubanda uji milunda va julu vana dumidokulanga bilima biotsu. Menu la Fumu Nsambi enu.

²⁶Duyaji nyama ajisakadekisa malungu. Duyaresa na duyavanda!

²⁷Duyatabula mirebu mienu dugongula o kodu na duyafuga mimfiemfi mibiedu bienu.

²⁸Duyakenemisa mu diambu dimutu agumafu na duyabaka binsi bienu ne temu mosi. Menu la Fumu.

²⁹Guyarombisa muana agu umugetu uvaga bumbembu mu mbari malongu mobasa de na bumbembu te na nsoruru tsipuela tsipuela tsiulabananga.

³⁰Jenu dukelisanga bilumbu biami bitsona na duyitsanga Mbura ami. Menu la Fumu.

³¹Duyanengila baresitsi nesi bavanditsi; duyabaromba ne temu mosi mu mbari dukenamu muinsi ogu. Menu la Fumu Nsambi enu.

³²Gobisa agukavu na nanga tsivema na yitsa bivunda. Duma Nsambi agu. Menu la Fumu.

³³Pa muenyi oyitsana nagu o bulongu buagu, guyamulasa maguga ne temu mosi.

³⁴Gukelisa muenyi oyitsingi va gari enu nderi aji muisi bulongu buenu; gumurondanga nana guikerondila; guyalibana gumaleba muenyi o bulongu buEgypte. Menu laFumu Nsambi agu.

³⁵Duyadunsa batu ne mu mifundu ne mu bietsu biuroga vo biusakama vo bibipitsulu vo biutsira.

³⁶Salisanu midodu miwelimina na bipitsulu biwelimina na bietsu biwelimina na utsira uwelimina. Menu la Fumu Nsambi enu agumadupalisa o bulongu buEgypte.

³⁷Dukelisanga migaga miami miotsu na maruma mami motsu. Menu la Fumu.