Read Punu Bisalu Bilevi 21 Bible Online

Bisalu Bilevi 21 - Punu bible

Bisalu Bilevi 21

¹Fumu amatsingula Moise rie: Tsingula bavagulitsi bapagu, baana bababaala baAaron rie: Muvagulitsi upagu ayakenamusu muinsi umfumbi yika la mfumbi.

²Orungula ubemba yika tindi mfumbi tsiandi; jinguji andi vo jitaji andi vo jimuana andi udibaala vo jimuana nguji andi udibaala

³vo jimuana nguji andi umugetu agukivu tsiemi mu mbari asakawelunu.

⁴Avu yivunda va gari batu bandi kabogu ayakenamusu muinsi ne temu mosi nosabula buvagulitsi buandi bupagu.

⁵Bavagulitsi bapagu bayakefuga mavenda na bayafuga bandefu bogu na bayakenemisa.

⁶Jogu boba aba Nsambi baNsambi ogu na bayasabula diina diNsambi ogu; jogu bevaguli pagu tsiunyensa atsiusielusunu o muji va gusu Nsambi, boba aba Nsambi.

⁷Ayawela yimbembu yimugetu vo aguilensu na ayawela mugetu agumabusu na mulumi ususu mu mbari avu agu Nsambi uNsambi agu.

⁸Muvagulitsi upagu avu uNsambi, evagulili Nsambi pagu tsiagu, jandi avu aguagu uNsambi. Menu Fumu Nsambi aguiduliomisi.

⁹Pa muana mugetu umuvagulitsi upagu okelensa nokevaga yimbembu, elensi taji andi; onyensu mbisu.

¹⁰Yivunda yibavagulitsi bapagu agumasingu matsi na agumabiatsu, agumaduisu biduaru bibuvagulitsi bupagu ayavula yiviovi yiandi na ayapasa biduaru biandi.

¹¹Ayabambana na mfumbi: nesi jitaji andi nesi jinguji andi; akenamu muinsi.

¹²Ayapala o Mbura Nsambi jiNsambi andi; mu mbari matsi madubiatsu maNsambi andi mavu nderi dugaba duandi. Menu la Fumu.

¹³Aweli mugetu agukivu tsiemi.

¹⁴Ayawela mukuili vo mugetu agumagusulu na mulumi ususu vo mugetu aguilensu vo yimbembu; tumba aweli mugetu ubatu bandi agukivu tsiemi;

¹⁵ayarombisa bategula bandi ulensu; mu mbari menu la Fumu oyimuliomisi.

¹⁶Fumu amatsingula Moise rie:

¹⁷Tsingula Aaron rie: Dibaala diotsu diyifumba yiagu te na bategula bagu adivu na yifu agorungula ubambana nami upagulilapagu:

¹⁸dibaala adivu yidunga vo yitsondu vo aguvu na mbasu jibudama vo adivu na yilema yiviolili mbatsi usakama;

¹⁹vo dibaala adimatsungugu mu dikulu vo mu dikaka;

²⁰vo adivu urungama vo yikembila vo adivu na yirieri vo yigasa vo dingingi vo mbanga tsigesumuga.

²¹Dibaala diotsu diyifumba yiAaron muvagulitsi upagu adiuba na yifu ayabambana na yinyensulu yipagu uvagulila Nsambi pagu.

²²Orungula uji biguji bipagu tsiNsambi andi, ne ajivu tindi yingitsi ne ajivu yingitsi.

²³Tumba ayakota o yiari yidumbu na ayabambana na yinyensulu yipagu mu mbari avu na yifu; ayasabula Mbura tsiami tsiNsambi. Menu la Fumu aguibaliomisi.

²⁴Anana Moise amatsingulila Aaron na baana bandi bababaala na baIsrael botsu.