Read Punu Bisalu Bilevi 25 Bible Online

Bisalu Bilevi 25 - Punu bible

Bisalu Bilevi 25

¹Fumu amatsingula Moise ava amabila va julu mukongu uSinai rie:

²Tsingula baIsrael rie: Ava dutolila o bulongu abu nyiduveyi, dugolesala manungi; jiuba temu jiubusila uvara uyitsa Fumu.

³Mu bilima bisiamunu guvaranga nungi ajiburi milunda mirayisan na gutsonsiga magumba.

⁴Tumba yilima ayimusambuali yiuba yiuvuma, temu eni dugosala manungi, jiuba temu jiubusila uvara uyitsa Fumu; guyavara nungi agu na guyabala manungi mamfuga tsirayisan va temu eni.

⁵Guyatsonsiga mimbendila mimanungi magu nesi milunda mirayisan yiuba yilima yiubusila uvara.

⁶Tumba biguji biagu biuba mimbendila mitemu eni jiubusila uvara nesi bimusalitsi agu udibaala na umugetu vo musalitsi agu uotsu na muenyi aguitsani nagu

⁷na biruitsi biagu na yibulu yika la yibulu; mimbendila miotsu miuligungu.

⁸Gukaranga yisambuali yibilima biuvuma, kumbu yisambuali; dutalu dubionyi duba magumana na yifu yibilima.

⁹Yilumbu yimugumi yitsungi jimusambuali gusiyisa mimbanda; mu yilumbu yiutsindulila mabumi gusiyisa mimbanda o bulongu buagu buotsu.

¹⁰Yilima ayiudugusu magumaranu la temu jiusangila yilima yidujegusu na duyitsu, dutubula dujegusu dubatu mu bulongu buotsu: ombu genu yiuba yilima yidujegusu na yiduyitsu; mutu mutu omuedila mbura andi na mutu mutu omuetsana na mukuta andi.

¹¹Yilima ayiudugusu magumaranu yiuba yidujegusu na yiduyitsu ombu genu: duyavara na duyatsonsiga biguji bimimbendila abivu o manungi na duyadokula milunda mirayisan o manungi amasakatsonsugu.

¹²Mu mbari yivu yilima yidujegusu na yiduyitsu: duyikipa yingitsi. Dujanganga yika biguji bimimbendila.

¹³Mu yilima yieni yidujegusu na yiduyitsu mutu mutu omuedila mbura andi.

¹⁴Pa guisumbisi nungi ombu mutu nagu vo pa guisumbi nungi ombu mutu nagu, duyadiongasana.

¹⁵Ava gusumbila nungi na mutu nagu guranga bilima ubanda va yilima yidujegusu na yiduyitsu; ava jandi ogusumbisila oranga bilima abivu te na yilima yidujegusu na yiduyitsu.

¹⁶Gumatisa dufunu dedi mosi na durangu dubilima; munongu mosi nana bilima biubila pesu anana gudiamisila dufunu; mu mbari abi esumbisi bivu abimatsonsugu.

¹⁷Mutu ayadionga mutu nandi, dumanganu Nsambi enu; menu la Fumu Nsambi enu.

¹⁸Kelisanganu migaga miami, kelisanganu maruma mami; bikelisinganu; mbana dutsana sui o bulongu buebubu.

¹⁹Dutsonsiganga milunda, dumiji ne uviolila na dutsananga muna sui.

²⁰Tanguji duwivula rie: Yi tujanganga mu yilima yimusambuali pa tugoba na musuga uvara vo utsonsiga?

²¹Nyudugabila miula miami mu yilima yimusiamunu, yionyi yiuba na digumba dibilima birieru.

²²Ava duvarila mu yilima yimunana dujanganga biguji bidigumba adigulu muna yilima ayimufu; te na dudila digumba adigona, dujanganga abigulu.

²³Mbura jiurunga jiusumbusu tumba tsiri mutubu; mu mbari bulongu buotsu abuami, duvu yika benyi na balinsi.

²⁴O bulongu buotsu abu dudilila mbura jiurunga, dukelisa mugaga ujikobula.

²⁵Pa muana nguji agu amakambulu na esumbisi yiasi yimbura andi jiurunga, jandi aguvu tindi yiburu yiandi ana musuga uyikobula, oruga nomuesumba ayi muana nguji andi amasumbisa.

²⁶Pa mutu agaa na mutu aguvu na musuga eni tumba jaʼ beni okedilila mangolu,

²⁷otala bilima abi amasumbila mbura jiurunga te na yilima yidujegusu na yiduyitsu mbana ogabusa abiwelimina ombu mudilitsi, mbana ana musuga umuesala va mbura andi.

²⁸Pa agedili mangolu umufuta aji amasumbisa jiuba ji-agumajisumba te na yilima yidujegusu na yiduyitsu; mu yilima yieni yidujegusu na yiduyitsu jandi omueba na musuga usala o mbura andi na jandi agumalejisumba ogusuga.

²⁹Pa mutu osumbisa ndagu o musiengi agukandu yivaga, brungula ujikobula te na yilima yieni yisuki; obanda utala yilumbu ayi amajisumbisila; musuga andi ujikobula uvu yilima yimosi buandi.

³⁰Tumba pa ndagu eni ajivu o musiengi agumakandu yivaga jigaakobulu muna yilima yieni, jiuba mutubu na jandi agumajidila te na bategula bandi; bagomuemupatula nesi mu yilima yidujegusu na yiduyitsu.

³¹Uvu mugaga umosi na mandagu mamimbu amagaa na bivaga na manungi, morungula umuekobulu na mudilitsi orungula umapatula mu yilima yidujegusu na yiduyitsu.

³²Tumba mu diambu dimisiengi mibisi Levi na dimandagu mogu: bisi Levi boba na musuga uotsu umakobula te na mutubu.

³³Muisi Levi agusumba ndagu na muisi Levi nandi vengu opala mu ndagu eni mu yilima yidujegusu na yiduyitsu na ogusuga va musiengi agu ndagu jivu; mu mbari mandagu mamisiengi mibisi Levi magorungula usumbusu mu mbari monyi mavu mogu mutubu.

³⁴Manungi mabisi Levi magorungula usumbusu mu mbari monyi mavu mogu mutubu.

³⁵Pa muana taji agu amakambulu na mangolu mamasuka vengu gumuwamusa, guvaga munongu mosi ombu jandi ojivu muenyi; adili mbura ombu gagu.

³⁶Guyaromba udila mbika vo uvaga yimbabu ombu gandi, guduma Nsambi agu yiri muana taji agu otsananga nagu na polu.

³⁷Guyamusombisa mbongu tsiagu na nsala udila mbika na guyamugabila biguji biagu na ditasa umuvayila yimbabu.

³⁸Menu la Fumu Nsambi enu agumadupalisa o bulongu buEgypte uduvega bulongu buCanaan nobanganga Nsambi enu.

³⁹Pa muana taji agu okambulu te na okesumbisa ombu gagu, guyamusalisa nderi muviga avu.

⁴⁰Oba ombu gagu nana musalitsi; oba musalitsi agu te na yilima yidujegusu na yiduyitsu.

⁴¹Mbana opala o ndagu agu; jogu na baana bandi wandi bogabuga o mukuta ogu nomuedila mbura jibataji bogu.

⁴²Mu mbari baIsrael bavu basalitsi bami aba nyimapalisa o bulongu buEgypte; jogu bagomuesumbusu ne temu mosi nana besumbisili baviga.

⁴³Guyamulasa dikasi ava guimurumini tumba dumanga Nsambi agu.

⁴⁴Pa guna nsala baviga, nesi dibaala nesi mugetu, ubadilila o malongu amavu yiari na yiari bibulongu buenu.

⁴⁵Gurungula usumba baana babenyi wandi abotsananga nagu na botsana na mikuta miogu ami boburila o bulongu buagu; jogu boba abagu.

⁴⁶Jogu boba disiala dibaana benu, boba abogu; durungula ubakelisa baviga mutubu. Tumba mu diambu dibaana bataji benu abavu baIsrael ne mutu mosi ayalasa dikasi ombu muana taji andi.

⁴⁷Pa muenyi aguitsani o ndagu agu okaluga yisina na pa muana taji okambulu na okesumbisa ombu muenyi aguitsani o ndagu agu vo ombu mutu aguvu mu yifumba yimuenyi eni,

⁴⁸pa amakesumbisa orungula udila musuga ujegusu; umosi va gari baana bataji bandi orungula umuemusumba.

⁴⁹Katsi andi vo muana dibaala agu katsi andi amabura vo tindi yiburu yiandi orungula umukobula; ne jaʼ beni orungula ukekobula pa odila mangolu.

⁵⁰Agumamusumba na agumakesumbisa botala bilima va mosi, ubandila na yilima ayi amakesumbisila te na yilima yidujegusu na yiduyitsu, dufunu adufutu duba dedi mosi na dufutu dumusalitsi mu bilima bieni.

⁵¹Pa vakivu bilima bipuela, jaʼ beni ofuta bebeli na dufunu adu amasumbusulu;

⁵²pa vakisiala yika mua bilima te na yilima yidujegusu na yiduyitsu, jaʼ beni ofuta yika yiasi yidufunu dubilima biandi.

⁵³Mu biluna biotsu oba nderi musalitsi, oyimusalisi ayamulasa dikasi va gusu agu.

⁵⁴Pa muana taji agu agaakobuga mu kobutsi tsieni tsiotsu, kabogu okobuga mu yilima yidujegusu na yiduyitsu, jogu na baana bandi.

⁵⁵BaIsrael bavu basalitsi bami aba nyimapalisa o bulongu buEgypte! Menu la Fumu Nsambi enu.