Read Punu Bisalu Bilevi 26 Bible Online

Bisalu Bilevi 26 - Punu bible

Bisalu Bilevi 26

¹Duyagoma bakosi o bulongu buenu, duyavala ne yibagunu yiyima yiotsu ne yitumba na duyayitsa ne yinsi yimutu ayimabaku mu dimanyi na duyakutama va gusu bionyi, menu la Fumu Nsambi enu.

²Dukelisanga batsona bami bilumbu biami biuvuma na duyitsanga Mbura Nsambi. Menu la Fumu. Miula

³Pa duikelisi migaga miami na maruma mami na pa duimakelisingi tindi ukelisa,

⁴nyudunoyisila mfula tsiwelimina mu temu tsiogu na manungi menu moduvega digumba na miri miubura ne uviolila.

⁵Dugumbiyila digumba dienu na dutsonsugu dutola te na temu tsiuvara; duji biguji bienu ne uviolila na dutsananga sui o bulongu buenu.

⁶Nyuvega bulongu duvotsu na mirima mienu migomuepupusu, nyutsiemusa bibulu bibukanyi o bulongu na divita digomueba via!

⁷Dubingisa bavinitsi benu na dubabokanga.

⁸Batu baranu bobingisa kama, kama mosi jibatu bobingisa yigumi yitosini, duboka bavinitsi benu.

⁹Ngomueduliyila nsima, nyudurombisa uburanga nofunanga; nyuwarisa pangini ami nenu.

¹⁰Dujanganga biguji abi dumasuega o bisuegulu yiri durungula uvinsa abigona.

¹¹Nyutsananga nenu, ngomuedulaba nsoruru.

¹²Nyudulingulanga, nyuba Nsambi enu na jenu duba batu bami.

¹³Menu la Fumu Nsambi enu agumadupalisa o bulongu buEgypte yiri dugomueba baviga bogu; nyimatudula mikudu miyilala yienu na nyimaduwendisa na nsangu.

¹⁴Tumba pa dugomuekululu na pa dugekelisingi maruma meni motsu

¹⁵pa duibunsi pangini ami nolensa migaga miami na pa duilabi maruma mami nsoruru te na dugemuekelisa migaga miami miotsu,

¹⁶kabogu guluanu adi nyuvaga: Nyudulasa tindi uvura, dubela magasu na mabagu te na misu menu mobivana dunyonganga; yika kulini duvarila bivaru bienu mu mbari bavinitsi benu bodupatulu digumba.

¹⁷Nyuduliyila nsima na dutsogusu na bavinitsi benu; jogu abeduvini bodurumanga, durina makulini ne pa bagedubingisi.

¹⁸Mu motsu mana pa dugekululu, nyudukilisa yisambuali yikumbu mu diambu dimasumu menu.

¹⁹Nyubunga dunangu duenu nokalusa julu nderi budilu na butamba nderi kunga.

²⁰Mangolu menu mosukila kulini na manungi menu magomueduvega digumba na miri migomueburanga milunda.

²¹Pa jenu duigayini nami na dugerondi ukululu nyubuesa udukilisa nodudimba yisambuali yikumbu mu diambu dimasumu menu.

²²Nyudutindila bibulu bimusiru abiujanganga baana benu, biutsiemusa biruitsi bienu na biugeyisa dutalu duenu; mansila menu mosiala mududu.

²³Mu motsu mana pa dugekaluli diela ava duilabili mikilu mieni na pa duigayini nami,

²⁴meʼ wami nyugagana nenu na nyumuedudimba yisambuali yikumbu mu diambu dimasumu menu.

²⁵Nyudurombisa divita udukilisa mu mbari dumabunsa pangini ami; ava dugukimina o misiengi mienu nyudutindila yivunga na va julu vana duwakusu ombu bavinitsi.

²⁶Ava nyuduwiminina biguji; yigumi yibagetu bogoka mapa o furu mosi na mapa meni mogabu; dumaji wandi tumba dugogukuru, via!

²⁷Mu motsu mana pa dugekululu na pa duigayini nami,

²⁸na kabu meʼ wami nyugagana nenu na nyumuebuesa udukilisa yisambuali yikumbu mu diambu dimasumu menu.

²⁹Duji baana benu bababaala na babagetu.

³⁰Mu mbari ngelabi ubueji nenu, nyupansa mbura tsienu tsiduyitsu, nyubula binyensulu bienu bibima bimbunga jiboti na nyubuaga bamfumbi benu va julu bitengi bibakosi benu.

³¹Nyubunga misiengi mienu te na miusiala mududu, nyupansa mbura tsienu tsiduyitsu na ngomuegulu mbunga jiboti jipagu tsienu.

³²Nyubunga bulongu tindi ubunga te na batu abeduvini abotsananga nenu bokambulu.

³³Nyudurombisa divita na nyudupansa o malongu. Bulongu buenu bubungu na misiengi miusiala mududu.

³⁴Mbana bulongu bukipa temu jiuvuma diuleba busiala mududu ava dubila o bulongu bubatu abeduvini; bulongu buba na yivumu na biukipa temu ami uvuma.

³⁵Diuleba bubungu, bubanganga na yivumu ayisakalabana na kala ava dumabusila ubuvumisa mbe dusakapansu.

³⁶Jenu aduitsani va gari batu abeduvini nyudureyimisa jenu bamosi yiri ne nduku jidugaji aduibonduyi jiudubingisa; durina nana batu berinini dijenga na dufu, ne pa bagedubingisi.

³⁷Duyenavikasananga diuleba bagedubingisi. Jenu duba volongu va misu mabatu abeduvini;

³⁸mbana dufuanganga o malongu motsu na bulongu bubatu abeduvini budusielasana.

³⁹Jenu aduisiali dusiegalana o malongu mabatu abeduvini mu diambu dimabi menu na mabataji benu.

⁴⁰Pa botubula mabi mogu na mabi mabataji bogu wandi na nsimbulu tsiotsu atsi bamatsimbu va gusu ami;

⁴¹ava bamagayinina nami kabogu meʼ wami nyimagagana nogu na nyimababega o bulongu bubatu abebavini; mbana bokesunsa na bosinga ukilusu mu diambu dimabi mogu.

⁴²Mbana nyuwarisa pangini ami aji nyimavangana na Jacob na Isaac na Abraham mbana nyuwarisa pangini jibulongu wandi.

⁴³Banogusulu, bulongu busiala mududu na bukipa temu jiuvuma. Vana temu eni bokilusu mu diambu dimabi mogu, mu mbari bamalensa maruma mami na bamalaba migaga miami nsoruru.

⁴⁴Tumba ava bobila o bulongu bubatu abebavini, ngobaliyila nsima ubaboka, ngobalaba nsoruru, ngotsindula pangini ami nogu; menu la Fumu Nsambi ogu.

⁴⁵Mu diambu diogu nyuwarisa pangini jikala aji nyimavangana na bataji bogu aba nyimapalisa o bulongu buEgypte va misu mabisi malongu mapuela yiri nyuba Nsambi ogu. Menu la Fumu.

⁴⁶Amana la maruma na migaga abi Fumu amakunsila baIsrael ava amabengunina na Moise o julu mukongu uSinai.