Read Punu Bisalu Bilevi 27 Bible Online

Bisalu Bilevi 27 - Punu bible

Bisalu Bilevi 27

¹Fumu amatsingula Moise rie:

²Tsingula baIsrael rie: Pa mutu amava-amavangana uwakisa mutu andi ombu Fumu ana musuga ufuta dufunu duedudu va yivinga yiandi:

³Dibaala adivu na magumabeji mabilima te na magumasiamunu ana dufunu dumagumaranu mambongu, nana mbongu tsiMbura Nsambi.

⁴Pa avu mugetu ana dufunu magumarieru mambongu.

⁵Pa avu muana dibaala, ubanda na bilima biranu te na magumabeji ana dufunu dumagumabeji mambongu; pa avu muana mugetu ana dufunu yigumi yimbongu.

⁶Pa avu muana dibaala, ubanda na tsungi mosi te na bilima biranu ana dufunu dumbongu yiranu; pa avu muana mugetu ana dufunu dumbongu yirieru.

⁷Pa dibaala amaviolila magumasiamunu mabilima ana dufunu yigumi na mbongu yiranu. Pa mugetu amaviolila magumasiamunu mabilima ana dufunu yigumi yimbongu.

⁸Pa jandi agumavangana pangini agaa na mangolu ufuta dufunu adumavegu, bowakisa mutu jaʼ beni ombu muvagulitsi upagu; muvagulitsi upagu anojaba mangolu mamutu eni orungula ukunsa dufunu duwelimina nandi.

⁹Pa pangini jiudugusu na yibulu ayiurungula uvegululu Fumu pagu, yibulu yiotsu ayi bovagula yiuba yiNsambi.

¹⁰Yigorungula usopunu na bagovinsa yima yibi va yivinga yiyima yiboti ne ayiboti va yivinga yiyima yibi; pa bevinsi yibulu va yivinga yiyibulu yisusu, biotsu bibeji vengu biuba biNsambi.

¹¹Pa pangini jiudugusu na yibulu ayivu muinsi ayigorungula uvagululu Fumu pagu, bowakisa yibulu ombu muvagulitsi upagu,

¹²agutubula dufunu nana yiubila yiboti vo yibi na bosinga dufunu dumuvagulitsi upagu.

¹³Pa berondi uyikobula, bobuesa bibeji mu digumi mu dufunu dumuvagulitsi upagu.

¹⁴Pa mutu owakisa ndagu andi ombu Fumu, muvagulitsi upagu otubula dufunu, yeri jivu jiboti vo jigaa jibod; bosinga dufunu dumuvagulitsi upagu.

¹⁵Pa mutu agumawakisa ndagu andi ombu Fumu mbana erondi ujikobula, muvagulitsi upagu otubula dufunu na mutu ofuta dufunu dueni na va julu vana obuesa bibeji mu digumi na jionyi miugabuga ombu gandi.

¹⁶Pa mutu erondi uwakisa yiasi yiandi yimusiru ombu Fumu dufunu duyionyi duba dedi na duyietsu yitsangu atsikuku: yinana yikama: (tsangu tsiorsa).

¹⁷Pa amayiwakisa mu yilima yidujegusu na yiduyitsu, oduka dufunu adumavegu.

¹⁸Pa amawakisa musiru mu yilima ayiuduka yilima yidujegusu na yiduyitsu, muvagulitsi upagu okunsa dufunu dususu duwelimina na bilima abisiali te na yilima yidujegusu na yiduyitsu ayina, na dufunu dudiamusu nana bilima biubila.

¹⁹Pa jandi agumawakisa musiru andi erondi umuegukobula va julu vana obuesa bibeji mu digumi mu dufunu adumatabulu na muvagulitsi upagu mbana uonyi ugabuga ombu gandi.

²⁰Pa jandi agomuekobula musiru eni vo pa ogusumbisa ombu mutu ususu, ugomuekobulu, via.

²¹Ava yilima yidujegusu na yiduyitsu, musiru eni uvu uFumu nana musiru agumawakusu na mugeli, fumu uonyi agomuegudila, uba yika umuvagulitsi upagu mutubu.

²²Pa mutu amawakisa musiru agu amasumba ombu Fumu, agusamaleba uyifumba yiandi,

²³muvagulitsi upagu okunsa dufunu nana dumavegulu te na yilima yidujegusu na yiduyitsu, mbana mutu eni ofuta dufunu adumatabulu muna yilumbu yieni mu mbari umawakusu ombu Fumu.

²⁴Mu yilima yidujegusu na yiduyitsu musiru ugabusu ombu fumu uonyi agumalegusumbisa nʼombu yifumba ayimalegudila.

²⁵Dufunu duotsu duba dedi na mbongu tsiMbura Nsambi; utsira utsionyi uvu yigumi yigarama.

²⁶Tsomi tsibiruitsi tsivu tsiFumu. Ne mutu mosi agorungula utsiwakisa ombu Fumu mu mbari tsivu tsomi; ne ngombi ne yindombu ne yinsabi tsivu tsiFumu.

²⁷Pa yivu yibulu ayivu muinsi yiumuesumbu na dufunu nana dumatabululu nobuesa bibeji mu digumi; pa yigaamuekobulu yiusumbusu nana dufunu dumatabululu.

²⁸Yima yiotsu ayi mutu ovega na mugeli ombu Fumu, mu biotsu abivu nandi, yigorungula ne usumbusu vo muekobulu ne pa yivu mutu vo yibulu vo musiru aguvu ujaʼ beni; yima yiotsu ayiuvegu na mugeli yiuwakusu mutubu ombu Fumu.

²⁹Ne mutu mosi agumavegu na mugeli agorungula umuekobulu, jandi aboku.

³⁰Yimosi mu digumi yiyima yiotsu ayi mutu ovara; ne tsangu ne milunda, biotsu bina biFumu; bivu biFumu.

³¹Pa mutu erondi ukobula yimosi mu digumi va julu vana obuesa bibeji mu digumi udila yionyi.

³²Yimosi mu digumi yibibulu biotsu ne bangombi ne bindombu ne binsabi ava bitalulu ayimugumi yiuba yiFumu.

³³Bagomuekelula yeri yibulu yivu yiboti vo yibi; yionyi yigosopunu; pa bovinsa yibulu va yivinga yiyibulu yisusu, vengu biotsu bibeji biuba biNsambi na bigorungula umuekobulu.

³⁴Amina mivu migaga miFumu ami amavega Moise mu diambu dibaIsrael, va julu uMukongu uSinai.