Read Punu Bisalu Bilevi 3 Bible Online

Bisalu Bilevi 3 - Punu bible

Bisalu Bilevi 3

¹Ava mutu ovagulila Fumu pagu tsikabusulu tsimaboti, ovagula va gusu Fumu ngombi: ne mulumi ne yibusi, ayigaa na yifu.

²Jandi osakiga gogu andi va julu muni uyibulu ayi otabulila muru va dikotulu diNdagu Yibenguna; mbana baana bababaala baAaron, bavagulitsi bapagu botsatsa malungu yiari na yiari biyinyensulu yipagu.

³Na pagu tsieni tsikabusulu tsimaboti tsiuba pagu atsiusielusunu o muji va gusu Fumu: muvagulitsi upagu ovagula matsi mamisopu na motsu amavu manamana muna;

⁴na mipigu miotsu mibeji na matsi mamipigu na mabambambi na muvogumbombu aguneni aguibambini na mipigu agu otabula.

⁵Baana bababaala baAaron bobinyensa va yinyensulu yipagu va julu yibulu ayimasunsu va julu mikansu amimadukusunu. Ajina la pagu ajiusielusunu o muji, ajiugulunu mbunga jiboti ombu Fumu.

⁶Ava evagulili yibulu yigeyi: ne mulumi vo yibusi, pagu tsikabusulu tsimaboti ombu Fumu, ovagula ayigaa na yifu.

⁷Pa pagu jivu muana yindombu, oguvagulila Fumu.

⁸Jandi osakiga gogu andi va julu muru uyibulu ayi otabulila muru va dikotulu diNdagu Yibenguna; mbana baana bababaala baAaron botsatsa malungu yiari na yiari biyinyensulu yipagu.

⁹Muna pagu tsieni tsikabusulu tsimaboti muvagulitsi upagu onyensa abibi va gusu Fumu: matsi na muyila uotsu agukakasunu na mukakala na matsi mamisopu na motsu amavu manamana muna,

¹⁰na mipigu miotsu mibeji na matsi mamipigu na muvogumbombu aguneni aguibambini na mipigu agu otabula.

¹¹Muvagulitsi upagu obinyensa va yinyensulu yipagu. Ajina la nyama ajivu pagu ajiusielusunu o muji va gusu Fumu.

¹²Pa pagu jivu yinsabi, oyivagulila Fumu.

¹³Jandi osakiga gogu andi va julu muru uyibulu ayi otabula muru va dikotulu diNdagu Yibenguna; mbana baana bababaala baAaron botsatsa malungu yiari na yiari biyinyensulu yipagu.

¹⁴Muna pagu tsieni muvagulitsi upagu onyensa abibi va gusu Fumu: matsi mamisopu na motsu amavu manamana muna na

¹⁵mipigu miotsu mibeji na matsi mamipigu na mabambambi na muvogumbombu aguneni aguibambini na mipigu agu otabula.

¹⁶Muvagulitsi upagu obinyensa va yinyensulu yipagu. Matsi motsu mavu nyama ajiuvagulu pagu ajiusielusunu o muji ajiugulunu mbunga jiboti ombu Fumu.

¹⁷Agugu la mugaga umutubu ubategula benu o malongu motsu ama dutsaninanga: duyaji ne matsi ne malungu.