Read Punu Bisalu Bilevi 7 Bible Online

Bisalu Bilevi 7 - Punu bible

Bisalu Bilevi 7

¹Mugaga upagu jimbela agugu: Jivu pagu ajivu tindi yingitsi.

²Yibulu yipagu jimbela jiutabulu muru va mbura aji bebokili bibulu bipagu tsiunyensa. Botsatsa yinyensulu yipagu malungu yiari na yiari.

³Bovagula matsi motsu na muyila na matsi mamisopu

⁴na mipigu miotsu mibeji na matsi mamipigu na matsi mabambambi na muvogumbombu aguneni agutabulu aguibambini na mipigu.

⁵Muvagulitsi upagu onyensa biotsu bina va yinyensulu yipagu, pagu ajiusielusunu o muji va gusu Fumu. Ajina la pagu jimbela.

⁶Yika babaala bamikuta mibavagulitsi bapagu bobiji va mbura jiyingitsi: jionyi jivu tindi yingitsi.

⁷Vavu pagu jimbela munongu mosi nana vavu pagu jiutsindula dibumi; mugaga uvu umosi mu pagu tsieni tsiotsu tsibeji: nyama jiuba jimuvagulitsi upagu agumavagula pagu jiutsindula dibumi.

⁸Muvagulitsi upagu agu vagulila mutu pagu jiunyensa odila mukata uyibulu ayi amavagula pagu jiunyensa.

⁹Pagu tsiotsu tsitsangu atsiulambu nesi o furu nesi va tasi nesi mu duengu tsiuba tsimuvagulitsi upagu agumatsivagula.

¹⁰Pagu tsiotsu tsitsangu nesi atsimasobunu na matsi nesi atsivu yika fufu na fufu tsiuba tsibaana bababaala baAaron, vayaba dupasu.

¹¹Mugaga upagu jikabusulu tsimaboti ajiuvagulu Fumu agugu:

¹²Pa mutu evaguli pagu mu mbari egabusili Nsambi diboti, ovagula pagu jikabusulu tsimaboti: ovagula dipa adigaa na dufunusu adimalambu na dipa digeyi adigaa na dufunusu adimatsatsu matsi na dipa difufu adimasobunu na matsi adimagangu.

¹³Va julu mapa meni obuesa mapa amavu na dufunusu va mosi na pagu jidinonga na jikabusulu tsimaboti.

¹⁴Bosambula munongu munongu ombu Fumu mbana tsiuwakusu ombu muvagulitsi upagu agutsatsa yinyensulu yipagu malungu mayibulu yipagu jikabusulu tsimaboti.

¹⁵Nyama jipagu jidinonga na jikabusulu tsimaboti jiuligu muna yilumbu ayi tsiuvagululu; bagosuega yima te na kedi.

¹⁶Pa mutu evaguli pagu jiudugusu pangini vo pagu jitondini, pagu tsieni tsiuligu muna yilumbu yieni, nyama ajiusialulu jiuligu ava kedi.

¹⁷Nyama tsieni atsiumuesialulu tsiunyensu mu yilumbu ayimurieru.

¹⁸Yika bemueji nyama ajimasialulu mu pagu jikabusulu tsimaboti mu yilumbu yimurieru, pagu eni jigomuesingu; jigorangu mu jandi agumajivagula; jionyi jiuba nsoruru. Uotsu aguyiji ana mbela, dibi dieni diuba va julu muru andi.

¹⁹Nyama ajimabemba yima yiotsu yimuinsi jiyaligu: jinyensu.

²⁰Dibaala diotsu adigaa na muinsi orungula uji nyama jipagu jikabusulu tsimaboti; tumba jandi oyilabi yiri ana muinsi, ayaji, yika eji nyama jipagu jikabusulu tsimaboti ajimavagululu Fumu, agusulu va gari batu bandi.

²¹Jandi agubemba yima yiotsu yimuinsi, nesi uyibulu nesi uyima yiotsu vo oji nyama jipagu tsikabusulu tsimaboti ajimavagululu Fumu, agusulu va gari batu bandi.

²²Fumu amatsingula Moise rie:

²³Vega maruma memama ombu baIsrael: Jenu duyajanganga matsi mangombi ne mayindombu vo mayinsabi.

²⁴Matsi mayibulu ayimafu vo ayimavopulu morungula usalulu mu yisalu yika la yisalu; tumba jenu duyamaji.

²⁵Mu mbari jandi aguji matsi mabibulu abi bevagulili Fumu pagu atsiusielusunu o muji, agusulu va gari batu bandi.

²⁶Duyajanganga malungu ne mabatsoli ne mabibulu mu mbura tsiotsu atsi jenu dutsaninanga.

²⁷Jandi aguji malungu mayibulu yika la yibulu, jandi guna wandi ogusulu va gari batu bandi.

²⁸Fumu amatsingula Moise rie:

²⁹Vega maruma memama ombu baIsrael rie: Jandi aguvagulila Fumu pagu andi jikabusulu tsimaboti, amubeyili dikabu adi ovagulila pagu jikabusulu tsimaboti.

³⁰Abeyi abi jaʼ beni amadila abiusielusunu o muji va gusu Fumu; abeyi matsi na tulu, tulu jiuviunsu yiari na yiari va gusu Fumu.

³¹Muvagulitsi upagu onyensa matsi va yinyensulu yipagu, tulu jiuba jiAaron na baana bandi bababaala.

³²Mu pagu tsienu tsikabusulu tsimaboti duveganga yiasi yikori ayimabaala ombu muvagulitsi upagu, dumusambula yionyi.

³³Muana dibaala uAaron aguvagula malungu na matsi mapagu tsikabusulu tsimaboti, dikabu diandi diuba yiasi yikori ayimabaala.

³⁴Mu pagu tsiotsu tsikabusulu tsimaboti atsi baIsrael bepagulili tulu aji boviunsa va gusu ami na kori aji bonsambulu bivu biami; nyibiveyi ombu Aaron muvagulitsi upagu nombu baana bandi bababaala; uvu mugaga umutubu agu baIsrael bokelisanga.

³⁵Aguna la musuga udubiatsu duAaron na baana bandi bababaala agu bodilila mu pagu atsiusielusunu o muji va gusu Fumu ubanda na yilumbu ayi bobiatsulu mu yisalu yibuvagulitsi bupagu.

³⁶Anana Fumu erumini baIsrael uveganga bavagulitsi bapagu yiotsu ayi bamabiatsulu; uba mugaga umutubu ubategula bogu.

³⁷Aguna la mugaga upagu jiunyensa na pagu jitsangu na pagu jiutsindula dibumi na pagu jimbela na pagu jidubiatsu na pagu jikabusulu tsimaboti.

³⁸Anana Fumu amarumina Moise va julu mukongu uSinai, muna yilumbu yieni Moise amaruma baIsrael uvagulila Fumu pagu tsiogu ava bamabila o kumu jiSinai.