Read Punu Bisalu Bilevi 9 Bible Online

Bisalu Bilevi 9 - Punu bible

Bisalu Bilevi 9

¹Mu yilumbu yimunana Moise amanengila Aaron na baana bandi bababaala na bivunda biIsrael.

²Amatsingula Aaron rie: Bonga muana ngombi uguvagula pagu jiutsindula dibumi na mulumi yindombu upagu jiunyensa; biotsu bibeji biyaba na bifu, gukabivagulila Fumu.

³Ndeju gutsingula baIsrael rie: Bonganu mulumi yinsabi uguvagula pagu jiutsindula dibumi va julu vana muana ngombi na muana yindombu, abakavu yilima yimosi abagaa na bifu, ubivagula pagu jiunyensa;

⁴mulumi ngombi umosi na mulumi yindombu biuvagulu pagu tsikabusulu tsimaboti, biuvagululu Fumu; na pagu tsitsangu atsiusobunu na matsi. Fumu olabana nenu namunyi.

⁵Kabogu jogu bamabega abi Moise amabaruma va dikotulu diNdagu Yibenguna; dibuli diotsu dimagukama vana, bamaba diteli va gusu Fumu.

⁶Mbana Moise amavosa rie: Dukavaga adi Fumu amatuma; mbana dulaba bundumba buFumu.

⁷Moise amatsingula Aaron rie: Bambana na yinyensulu yipagu; vagula pagu agu jiutsindula dibumi na pagu agu jiunyensa; tsindula dibumi dindeʼ beni na dibatu botsu mbana vagulila batu pagu wandi; batsindulili dibumi nana Fumu amadurumina.

⁸Aaron amabambana na yinyensulu yipagu na amatabula muana ngombi muru utsindula dibumi dijaʼ beni.

⁹Baana bababaala baAaron bamamuwakisa malungu; amaputiga mulembu andi mu malungu meni, amamasinga masiyi mayinyensulu yipagu na amapuga malungu amamasialulu va tsi yinyensulu yipagu.

¹⁰Amanyensa matsi va yinyensulu yipagu na mipigu na muvogumbombu aguneni uyibulu yipagu jiutsindula dibumi nana Fumu amarumina Moise.

¹¹Tumba amanyensa nyama na mikata o tsomu dimbu.

¹²Aaron amatabula mulumi yindombu upagu jiunyensa muru. Baana bababaala baAaron bamamuwakisa malungu na amamatsatsa yiari na yiari biyinyensulu yipagu.

¹³Bamamuwakisa pagu jiunyensa; mapula na muru na amabinyensa va yinyensulu yipagu.

¹⁴Amasusa misopu na bakondu na amabinyensa va yinyensulu yipagu va julu pagu jiunyensa.

¹⁵Mbana Aaron amavagulila batu pagu. Amabonga mulumi yinsabi upagu jiutsindulila batu dibumi, amagutabula muru na amaguvagula pagu jiutsindula dibumi munongu mosi nana amavagulila muana ngombi.

¹⁶Amavagula pagu jiunyensa, amajivagula nana migaga mimammina.

¹⁷Amavagula pagu jitsangu, amabonga dikaka dimosi dijionyi, amajinyensa va yinyensulu yipagu va mosi na pagu ajimanyensungu kedi na kedi.

¹⁸Amatabula mulumi ngombi na mulumi yindombu miuru abi amavagulila batu pagu jikabusulu tsimaboti. Baana bababaala baAaron bamamuwakisa malungu ama amatsatsa yiari na yiari biyinyensulu yipagu.

¹⁹Jogu bamamuwakisa matsi mamulumi ngombi na mamulumi yindombu na muyila na matsi mamisopu na mipigu na muvogumbombu aguneni;

²⁰bamasunsa matsi va julu batulu na Aaron amabinyensa va yinyensulu yipagu.

²¹Mbana Aaron amaviunsa batulu beni na biasi bikori abimabaala va gusu Fumu nana Moise amarumina.

²²Aaron amasamba makaka mandi ombu batu na amabagabila miula. Anomana uvagula pagu jiutsindula dibumi na jiunyensa na jikabusulu tsimaboti, amasunduga.

²³Moise na Aaron bamakota va mosi o Ndagu Yibenguna. Ava bamapalila bamagabila batu miula na bundumba buFumu bumalabana na batu botsu.

²⁴Muji umapalila va gusu Fumu na umasielasana pagu jiunyensa na matsi abimaba va yinyensulu yipagu. Batu botsu bamagulaba na bamagamuga na nsangu na bamagudama va tsi.