Read Punu Jeremie 11 Bible Online

Jeremie 11 - Punu bible

Jeremie 11

¹Fumu amansingula bulumbi buebubu rie:

²Dedilanu pangini ejiji. Amabuela rie: Adidi gutsingula baJuda na bisi Jerusalem.

³Batsinguli rie: Fumu Nsambi Israel jandi rie: Ka muna mulogu gu uvu na jandi agugededili pangini ejiji,

⁴aji nyimavangana na bataji benu mu yilumbu ayi nyimabapalisila o maguga maEgypte. Mbana nyimavosa rie: Guluanu diufi diami na vaganu motsu ama nyuduruma; mbana duba batu bami na menu nyuba Nsambi enu.

⁵Na nyudugusu pangini aji nyimavangana na bataji benu yiri nyubavega bulongu abuvu na digumba dineni nana duibulabili namunyi. Mbana nyimawagula rie: Aa Fumu, dibi nana!

⁶Fumu amatuma rie: Samuna mambu meni motsu o misiengi miJuda, nesi o mansila maJerusalem rie: Dedilanu mambu mapangini ejiji nomakipanga!

⁷Nyimalubusa bataji benu ubanda na yilumbu ayi nyimabapalisila o bulongu buEgypte te na namunyi, kedi tsiotsu nyimabalubusanga rie: Guluanu diufi diami!

⁸Tumba basamagulu na basamaliga matuji; mutu mutu amaduka kanda tsimurima andi ubi; mbana nyimabadugusulu mambu motsu mapangini ejiji ama basamadedila.

⁹Fumu amamuensingula rie: BaJuda na bisi Jerusalem bamatunga fundu ogu.

¹⁰Bamamuevaganga mabi mabataji bogu batega abamabusa ugulu mambu mami. Bamaduka bansambi bangana uyenabasalilanga. BaIsrael na baJuda bamabunsa pangini ami aji nyimavangana na bataji bogu.

¹¹La dibandu Fumu evosili rie: Gulu nyubalasa maguga ama bagorungula urina.

¹²Kabogu bisi misiengi miJuda na bisi Jerusalem boyesambila bansambi aba bamavagulila bima bimbunga jiboti tumba bagobawaka kalala va temu jimaguga mogu.

¹³Aa Juda, dutalu dubansambi bagu duvu dedi na dutalu dumisiengi miagu! Dutalu dubinyensulu bipagu bibakosi duvu dedi na dutalu dumansila maJerusalem, binyensulu bipagu biuvagulila Baal bima bimbunga jiboti.

¹⁴Mbe ka ndeʼ Jeremie guyasambilila batu bebaba na guyakamuyila nesi unsambila tsambu mu diambu diogu; ngotsigulu nesi ava bondembiyila mu diambu dimaguga mogu.

¹⁵Fumu amavosa rie: Batu bami bagekipi ngensa. Yisalu yi bosala o Ndagu ami? Pagu atsi bepagulili tsiurungula ubagusula purulu yiri bomuesangila?

¹⁶Fumu jandi rie: Nyimalebalaba nderi muoliva aguvu na magaji na milunda imkembu. Muna mungudi uneni muji umagunyensa na bitayi bi-uonyi bimaboguga.

¹⁷Menu Fumu Mabadi nyimavara muoliva aguvu baJuda na baIsrael tumba namunyi nyibalubusi yiri voba dubungu adu bamakerombila; bamavaga dibi ava bamavagulila Baal bima bimbunga jiboti unyoyisa.

¹⁸Fumu amadubusa na nyimadijaba; na amandasa adi bovaga.

¹⁹Nyimaba nderi yindombu ayivu sui ayibegu o uboku, nyisamalejaba matasa mogu makulini. Bamavosanga rie: Turakulianu muiri na milunda mi-uonyi! Tugugusulianu va gari amivu monyu yiri mutu agomuegurangimina!

²⁰Tumba ndeʼ Fumu Mabadi Guvu nsonsi jisungama, guiweliyi matasa na mirima. Nyubalaba ava gubagabusila pila agu mu mbari nyimaguwakisa diambu diami.

²¹La dibandu Fumu Mabadi evosili diambu dibisi Anatot aberondi umboka na bevosi rie: Guyabiga na diina diFumu vo mbe tuguboka!

²²La dibandu Fumu evosili rie: Gulu nyubakilisa; bafudu boboku na majenga, baana bogu bababaala na babagetu boboku na dungosu dunsala.

²³Ne umosi va gari ogu agorina; mu mbari nyulasa bisi Anatot maguga muna yilima ayi nyubakilisila.