Read Punu Jeremie 17 Bible Online

Jeremie 17 - Punu bible

Jeremie 17

¹Disumu dibaJuda dimasonugu na mukaku ubudilu, nesi na dusonugu dudiama; dimakota nesi o mirima miogu nesi mii masiyi mabinyensulu biogu bipagu.

²Nana bekipilingi baana bogu anana bekipingi binyensulu biogu bipagu na bakosi bogu baAstarte nesi miri miogu nesi va julu tsibikundubuga.

³Nyimawakisa mukongu ami ukindu nesi manungi wandi. Jenu baJuda nyusingisa biboti bienu na bilundulu bienu na mbura tsienu tsiduyitsu ukindu mu diambu dimasumu menu amavu mu bulongu buenu buotsu.

⁴Jenu beni dutsiemusa disiala adi nyimaduvega, nyuduvaga baviga babavinitsi benu o bulongu abu dugejabi; mu mbari dumaroyisa kabu ami, ajiubanganga mutubu.

⁵Fumu evosi rie: Ka muna mulogu gu uvu na jandi aguirombi duwamusu dubatu aguivayili batu yitu aguiliyili Fumu Nsambi nsima!

⁶Avu nderi mutu agumasiala pinsa okumu; agelabi ubueji, via; etsani va iribura jinyenga o kumu va mbura jidukanga ajigetsanini batu.

⁷Ka muna miula mi mivu na jandi aguikevega ombu Fumu; agu Fumu avu ditasa diandi!

⁸Avu nderi muiri agumavaru va mugula mujamba aguiburingi milunda va temu andi agugenengini pesi magaji. Agokambulu mu motsu ama evayingi.

⁹Murima uiviolili biotsu ufura nobiva: anyi orungula ugujaba?

¹⁰Menu Fumu nyiweliyi mirima na matasa, nyisaki mutu mutu dedi na bifu biandi nesi bisalu biandi.

¹¹Dedi mosi na nguali ajibandimini makeji ama jisamabura anana divu na jandi aguidili busina bundiongulu; va temu andi botsu bomubusa, na disukusulu diandi diulasa buduka buandi.

¹²Vavu yitsiga yibufumu yibundumba ayimarungu vana dibandu, ayina la Mbura jiNsambi etu.

¹³Aa Fumu, ndeʼ guvu ditasa dibaIsrael! Botsu abegubusi bolaba yisonyi! Abeguliyili nsima miina mogu mamasonugu va tsi. Begubusi Fumu, ndeʼ aguvu dibandu dimonyu.

¹⁴Fumu mbelusi, mbana nyubeluga tindi ubeluga; kobuli, mbana nyugobulu tindi ugobulu; ndeʼ guvu uwelimina uyitsu.

¹⁵Gulu, bekwivuli rie: Mapemi maFumu maka? Malabini!

¹⁶Menu nyimagudedila la dibandu nyisamabusila uba mubungulitsi; nyisamabarombisa purulu, ndeʼ beni guidijabi; motsu amamapalila mu munu ami mamajabunu nagu.

¹⁷Goma agu jiyakaanga. Ndeʼ guvu yisuemunu yiami mu yilumbu yimaguga!

¹⁸Bakuanitsi bami balabi yisonyi na menu nyiyalaba yisonyi; jogu bareyimi na menu nyiyaregama! Balasi yilumbu yimaguga, babungi tindi ubunga.

¹⁹Fumu amatuma rie: Wenda yerelama va dikotulu diBatu botsu adi bakaga baJuda bekotili nopalilanga mbana guvaga dedi mosi na makotulu masusu maJerusalem.

²⁰Gukabatsingula rie: Jenu bakaga baJuda nesi jenu baJuda nesi jenu bisi Jerusalem aduikoti muna makotulu guluanu mambu maFumu!

²¹Fumu jandi rie: Kebananu duyanangula mifuna yilumbu yiuvuma na duyamikotiba o Jerusalem.

²²Duyapalisa ne mufuna umosi mu mandagu menu yilumbu yiuvuma na duyasala ne yisalu yimosi tumba kelisanu yilumbu yiuvuma yingitsi dedi mosi nana nyimarumina bataji benu,

²³basamakulu na basamaliga matuji; bamagalisa mirima miogu. Basamagulu ne diambu dimosi; bamabusa malubu mami.

²⁴Fumu amavosa rie: Pa dukulu na pa dugekotisi mifima o musiengi yilumbu yiuvuma na pa duyivaga yingitsi na dugesali ne yisalu yimosi muna yilumbu yieni,

²⁵mbana bakaga na baana babakaga abotsana va yitsiga yibufumu yiDavid bokota o musiengi egugu mu bakabala vo mu makalu, jogu na baana bogu babakaga na babaala baJuda na bisi Jerusalem; musiengi egugu ubanganga na batu.

²⁶Boruyila o misiengi miJuda no biari biJerusalem nesi o bulongu buBenjamin nesi o yibususu nesi o mukongu nesi o tandu, uvagula pagu tsiunyensa na pagu na pagu tsitsangu na bima bimbunga jiboti na pagu tsikabusulu tsimaboti o Ndagu Nsambi.

²⁷Tumba pa dugegulu ava nyidurumini ukelisa yilumbu yiuvuma yingitsi nesi ubusa unangula mifuna muna yilumbu yieni nesi umikotisa o Jerusalem, kabogu nyubangisa muji va biabutsu bimusiengi usielasana mandagu mabisi Jerusalem na ugotsima via!