Read Punu Jeremie 19 Bible Online

Jeremie 19 - Punu bible

Jeremie 19

¹Fumu amaruma Jeremie diruma diedidi rie: Weʼ yesumba yisanga ombu mubumbitsi, gukawenda na bivunda bibatu na bjvunda bibavagulitsi bapagu.

²Wenda o yibususu yiHinnom ayivu o yiari yidikotulu dimubumbitsi; avana gusamunina mambu ama nyugutsingula.

³Gukavosa rie: Bakaga baJuda na jenu bisi Jerusalem guluanu mambu maFumu! Fumu Mabadi aguvu Nsambi Israel jandi rie: Guluanu nyulasa mbura ejiji maguga amosuensa matuji mabotsu abogulu.

⁴BaJuda bamambusa na bamabivisa mbura ejiji avana bamavagulila bansambi bangana bima bimbunga jiboti aba jogu na bataji bogu na bakaga baJuda bagejabi; bamabasa mbura ejiji na malungu mabatu abagaa na mbela.

⁵Bamarungila Baal mbura tsiduyitsu unyensanga baana bogu pagu; nyisamaruma diambu dieni na nyisamadisona wandi na nyisamaleditasa ne utasa.

⁶La dibandu Fumu amavosila rie: Guluanu bilumbu biuruga abi mbura ejiji jigomuenengulungu Tofet na yibususu yiHinnom tumba jiunengulungu yibususu yiubokila.

⁷Va mbura ejiji nyubungila kanu tsibaJuda na tsibisi Jerusalem. Nyubarombisa uboku na bavinitsi bogu abagaa na yingeba. Nyusingisa yiri bamfumbi bogu bododungu na batsoli na makoju bobajanganga.

⁸Nyusingisa musiengi egugu udesungu nesi urekungu; botsu abovioga va mugula uonyi bokambulu na bosimina mu diambu dibivunga bi-uonyi.

⁹Nyubarombisa uji baana bogu bababaala na babagetu na bamosi boji basusu. Goma jineni na munyongu bibavinitsi abagaa na yingeba biubasielasana.

¹⁰Mbana gubula yisanga va misu majogu abowenda nagu.

¹¹Gubatsingula rie: Fumu Mabadi jandi rie: Anana nyupansila batu bebaba na musiengi egugu dedi mosi nana bebulili yisanga yimubumbitsi te na yigorungula umuelondu. Botsiyila bamfumbi o Tofet te na vagomueba mbura uyebuaga basusu.

¹²Fumu amavosa rie: Anana nyuvayila musiengi egugu na batu abetsani muna. Nyuvayila musiengi egugu dedi mosi nana nyimavayila Tofet.

¹³Mandagu maJerusalem na mandagu mabakaga baJuda mobivusu dedi mosi na Tofet mu mbari amuna bamavagulilanga bima bimbunga jiboti o julu tsimiansa uyitsanga bambuelili na tsungi na wisi na bamavagulilanga bansambi bangana pagu tsiunu.

¹⁴Ava Jeremie amaruyila o Tofet agu Fumu amamusindiga uyebiga amaretsama va piasu jiNdagu Nsambi na amatsingula batu botsu rie:

¹⁵Fumu Mabadi aguvu Nsambi Israel jandi rie: Nyirondi ulasa musiengi egugu maguga motsu ama nyimaletubula nesi misiengi amirumu na uonyi mu mbari bamagalisa mirima miogu yiri bakegulu mambu mami.