Read Punu Jeremie 2 Bible Online

Jeremie 2 - Punu bible

Jeremie 2

¹Fumu amatuma rie:

²Wenda yegamuyila Jerusalem rie: Fumu jandi rie: Nyirangimini durondu duagu ava gumabila numba, nesi durondu duagu duneni ava gumakumunu. Gumanduka o kumu o mbura atsigaa na manungi.

³Fumu amavosa rie: Israel gumaba umeʼ beni nderi biumanga bidigumba. Botsu abamabijanganga bamakerombisa mbela na diguga dimabagaanga.

⁴Jenu bisi ndagu Jacob jenu bisi yifumba yiIsrael guluanu diambu diFumu.

⁵Fumu ewivuli rie: Dibi yi bataji benu bamalaba nami? Dibandu yi bamakakana nami? Bamadukanga mambu amagaa na tsongu na bamatsiemuga.

⁶Basamawivula rie: Fumu omatupalisa o bulongu buEgypte aka? Tsiri jandi agumatuwendisa o kumu o mbura atsigaa na mamba atsivu yika biduna na biduna? Tsiri butamba bueni buvu na dungosu dumfula na mutu agevioyi muna nesi utsana muna?

⁷Nyimadubega o bulongu abuibagunu na nungi milunda yiri dujanganga milunda nesi biguji biboti; tumba dunokota muna dumabivisa bulongu buami na dumabukalusa nsoruru.

⁸Bavagulitsi bapagu basamawivula rie: Fumu aka? Milonsi mimigaga basamanjaba, barumitsi basamakipa mambu mami, babiyitsi bamabiyila mbigulu tsiBaal na bamakevegaombu bansambi abagorungula ubawaka kalala.

⁹Fumu amavosa rie: La dibandu nyitumunini paga nenu, nyutumuna paga na bategula benu.

¹⁰Wendanu o nyingi tsiGrec yegengilanu! Sindiga mutu o Quedar, ayegengila buranga nolaba pa mambu mamunongu eni melabini!

¹¹Je va dilongu adivinsi bansambi bandi diuleba bagaa bansambi? Batu bami bamansopana na bansambi abagorungula ubawaka kalala.

¹²Fumu amavosa rie: Bisi julu kambuluanu mu dionyi; tsukamanu, labanu goma!

¹³Batu bami bamavaga mabi mabeji; bamambusa, menu aguvu yileka yimamba mamonyu, bamakevayila matanga nesi matanga amamatobiga, magemuesikiga mamba!

¹⁴Je Israel avu muviga agumasumbu vo agumaburulu muna ndagu? Dibandu yi amakindulu?

¹⁵Baana babimbungu bemugumbili na begamuyi migamu miogu mbana bebivisi bulongu buandi; misiengi miandi mimanyensu, mimasiala mududu.

¹⁶Nesi bisi Memphis na bisi Tapanes bomufuga diviolu.

¹⁷Je dionyi disamalabana ombu gagu Israel mu mbari gumabusa Fumu Nsambi agu? Fumu Mabadi amavosa rie: Gusamanduma.

¹⁸Dibandu yi guwendila o Egypte Yika uyenu mamba mamujamba uNil? Dibandu yi guvioyila mu nsila jiAssyrie yika uyenu mamba mamujamba uEuphrate?

¹⁹Fumu Mabadi evosi rie! Dibi diagu digukilisi; penda agu jiuguvega mbela! Mbana gunyonga na gujaba dibi gutsi vaga umbusa, menu Fumu Nsambi agu nesi ulibana musuga ami.

²⁰Kala kala gumabongulu yilala yiagu na gumasurula mikudu miagu na gumavosa rie: Nyirondi ujegusu! Diwendi rie: va julu tsibikundubuga nesi o tsi miri gumakevega uvaganga bumbembu.

²¹Nyimaguvara nderi mfuga jiboti jirayisan ajivu tindi yivaru. Yika tsie gumasopinina yirongula yiboti na ayimumbendila?

²²Fumu aguvu Fumu jandi rie: Ne pa gubuila tindi ubuila ne pa gusalisa nsavu tsipuela tsipuela dibi diagu digotsinduga.

²³Tsie guvosila rie: Nyisakakebivisa, nyisakasalila baBaal? Gengila taka tsiagu o yibususu! Rangimina ama gumavaga. Guvu nderi yibusi yisamo ayivu diteʼ diteli.

²⁴Guvu nderi buru jimusiru ajimaguku o kumu, ajiduti mbunga na ditasa udugusu nsala tsiandi. Anyi oyigubitsa ujidugusu? Balumi botsu abeyirombi bagoketsoyisa? Bojilabila muna tsungi andi.

²⁵Israel kebana! Ava guiwendi mbangu gunemisa makulu, gugumusa mungunga. Tumba guivosi rie: Dunda menu! Nyirondi bansambi bangana nyirondi ubadukanga.

²⁶Nana mudayitsi elabili yisonyi ava esutusulu, yilumbu yimosi jenu baIsrael dusutusu, jenu na bakaga na barumitsi na bavagulitsi bapagu na babiyitsi na dulabanga yisonyi!

²⁷Duitsinguli kosi rie: Ndeʼ guvu taji etu! Duitsinguli yitumba rie: Ndeʼ gumatubura! Duindiyili nsima na dugekengili. Tumba va temu purulu duivosi rie: Ruga yituwaka kalala!

²⁸Tumba nyuduwaka rie: Bansambi benu aba dumakevayila baka? Baruyi pa borungula uduwaka kalala vatemu purulu! Aa jenu baJuda dutalu dubansambi benu duvu dedi na dutalu dumisiengi mienu.

²⁹Fumu ewivuli rie: Dibandu yi duitumunini paga nami? Dibandu yi duvu mimbini?

³⁰Kulini nyimadudimbila, dusamagaru mukilu; dumagudisa babiyitsi benu nderi yimbungu yigudisi.

³¹Jenu aduirangi, tsiyisanu diambu diFumu! Je nyimaba nderi kumu ombu jenu baIsrael? Je nyimaba yika pisama na pisama? Dibandu yi batu bami bevosili rie: Jetu tukeruma, tugemueronda ugabuga ombu gagu?

³²Je numba elibini kembu tsiandi? Je agumakumu elibini beleeti andi? Nesi, tumba jenu batu bami dumandibana kala.

³³Gumaguku na bifu biagu uromba aba guirondi! Dedi mosi gumaguku uvaganga mabi:

³⁴te na mulemba uyiduaru yiagu uvu malungu na malungu mabatu abagaa na mbela. Diuleba gusamabatsukiga ubula bebuli ndagu agu! Ne nana guivosi rie:

³⁵Nyina ndunga, Fumu ana mbela mu mbari epiningi. Tumba gunovosa rie: Nyina ndunga, kabogu menu Fumu, nyugukilisa.

³⁶Dibandu yi guvu nsumbumbu uvinsa nsila? Gulasu yisonyi na bisi Egypte nana gumalasulu na bisi Assyrie.

³⁷Avana wandi gupalila na miogu va julu muru; mu mbari menu Fumu nyimaliyila aba gumavayila yitu nsima; jenu nogu dugolunga.