Read Punu Jeremie 26 Bible Online

Jeremie 26 - Punu bible

Jeremie 26

¹Va dibandu didurumu duJoaquim muana dibaala uJosias kaga jiJuda avana mambu maFumu mamavosulu.

²Menu Fumu nyigurumi diruma diedidi rie: Retsama va piasu jiNdagu Nsambi notsingula bisi misiengi miJuda baruyi uyiyitsa Fumu o Ndagu andi; gukabatsingula mambu motsu ama nyimaguruma ubatsingula; guyagusula ne dimosi.

³Tanguji bogulu na tanguji mutu mutu oliyila bifu biandi bibi nsima; mbana nyugabusa murima nsima mu dibi adi nyimatasa ubavaga mu diambu dimbivulu tsibifu biogu.

⁴Gukabatsingula rie: Fumu jandi rie: Kululuanu na tsiyisanu malongi ama nyimaduvega,

⁵nogulu mambu mababiyitsi bami aba nyudutindila. Nyimabatindanga tumba dumabusa ubagulu.

⁶Pa dugegulu nyupansa Ndagu ejiji nana nyimapansila Ndagu jiSilo na nyurombisa diina diJerusalem usalusu uwarisa milogu.

⁷Bavagulitsi bapagu na babiyitsi na batu botsu bamagulu Jeremie ava amavosila mambu memama o Ndagu Nsambi.

⁸Ava Jeremie amamanina uvosa motsu ama Fumu amamuruma utsingula batu botsu bamamugaanga na bamavosa rie: Ndeʼ gufu!

⁹Dibandu yi guibiyili mu diina diFumu novosa rie: Ndagu ejiji jiuba nderi jiSilo na musiengi egugu ubungu na usiala mududu? Batu botsu bamakanda Jeremie o Ndagu Nsambi.

¹⁰Ava basefu baJuda bamagululu mambu meni bamarambuyila o ndagu kaga uwenda o Ndagu Nsambi, bamatsana va gusu dikotulu diGona diNdagu Nsambi.

¹¹Mbana bavagulitsi bapagu na babiyitsi bamatsingula basefu na batu botsu rie: Dibaala diedidi avu awelimina uboku; amabiyila musiengi egugu mbigulu tsibi nana jenu beni dumagululu.

¹²Jeremie amatsingula basefu botsu na batu botsu rie: Fumu amansindiga ubiyila Ndagu ejiji na bisi musiengi egugu mambu motsu ama dumagulu.

¹³Sungiganu mansila menu nesi bifu bienu, guluanu diufi diFumu Nsambi enu, mbana ogabusa murima nsima mu dibi adi amaduvosila.

¹⁴Mbe ka menu ngaa na diambu, dumakekaangila; payilianu nana duirondili, adivu diwelimina nenu.

¹⁵Dimosi buandi pa dumboka, malungu mamutu agugaa na mbela moba va julu miuru mienu, jenu na musiengi egugu na botsu abetsani muna; dingensa Fumu amansindiga ombu genu udutsingula mambu memama motsu.

¹⁶Basefu na batu botsu bamatsingula bavagulitsi bapagu na babiyitsi rie: Dibaala diedidi agaa awelimina uboku; evosi netu mu diina diFumu Nsambi etu.

¹⁷Bivunda bimosi bibulongu bamatsingula batu rie:

¹⁸Michee muisi Morechet amabiganga mu temu Ezekias kaga jiJudana amatsingula baJuda botsu rie: Fumu Mabadi jandi rie: Sion ufutsu nderi nungi; Jerusalem ukaluga diguki dimamanyi, mukongu uNdagu Nsambi ukaluga musiru.

¹⁹Je Ezekias kaga jiJuda na baJuda botsu bamamubokisa? Ezekias asamaduma Fumu? Asamasambila Fumu? Mbana Fumu amagabusa murima nsima mu dibi adi amabavosila. Je jetu tukevega mufuna udibi dineni?

²⁰Vamaba mutu susu wandi agumabiga mu diina diFumu, Ouria muana dibaala uChemaya agumaba muisi Quiriat-Yearim. Amabiyila Jerusalem nesi bulongu buJuda mambu motsu dedi mosi nana Jeremie ebiyili.

²¹Kaga Joaquim na babaala bandi botsu bamangolu na basefu bandi botsu bamagulu mambu mandi diwendi rie: kaga amaronda umubokisa. Ouria anolubusu amalaba goma, amarina na amayenawenda o Egypte.

²²Kaga Joaquim amasindiga batu o Egypte; Elnatan muana dibaala uAkbor na batu basusu bamamuduka o Egypte.

²³Bamapalisa Ouria o Egypte na bamayenamubega ombu kaga Joaquim agumamubokisa; amabuaga mfumbi andi o ngila tsibatu bakulini.

²⁴Tumba Ahicam muana dibaala uChafan amawamusa Jeremie, amagubitsa batu yiri agoboku.