Read Punu Jeremie 30 Bible Online

Jeremie 30 - Punu bible

Jeremie 30

¹Mambu maFumu mamatsingulu Jeremie rie:

²Fumu Nsambi Israel jandi rie: Sona mambu motsu ama nyimagutsingula mu muganda.

³Fuiriu amavosa rie: Bilumbu biuruga abi nyugabusa batu bami baIsrael na baJuda abavu bakoli. Amabuela rie: Nyubagabusa o bulongu abu nyimavega ombu bataji bogu na jogu bobudila.

⁴Amama la mambu ama Fumu amavosa na Jeremie mu diambu dibaIsrael na baJuda.

⁵Fumu amavosa rie: Bamagulu mugamu udunsiensi rie: Vavu goma tsiri duvotsu.

⁶Wivulanu na labanu yeri dibaala eburi! Dibandu yi nyilabili babaala botsu na miogu mu mangundu dedi mosi na mugetu aguvu na misongu? Dibandu yi binsi biotsu bimakuduyila?

⁷Ka muna maguga ma! Ka muna yilumbu yi! Vasakaba yilumbu yimunongu eni. Yiuba yilumbu yimunyongu ombu bategula baJacob tumba bowaku kalala.

⁸Fumu Mabadi amavosa rie: Muna yilumbu yieni nyubogulila yilala yiogu, nyusurula mikudu miogu na benyi bagomuebaruma.

⁹Bonsalilanga menu Fumu Nsambi ogu. Nyumuesingisa ndagu David umuerumanga.

¹⁰Fumu amavosa rie: Ndeʼ musalitsi ami Israel guyalaba keri ndeʼ Jacob guyalaba goma mu mbari ndeʼ aguvu vala nyuguwaka kalala na bategula bagu abavu bakoli nyubawaka kalala; Israel, ndeʼ gugabuga na guba sui novumanga, vagomueba mutu ugupupisa.

¹¹Fumu amavosa rie: Nyiji nagu uguwaka kalala; nyubunga malongu motsu ama nyimagupansila tumba ngogubunga tindi ubunga tumba nyugusiemba na dusungugu ngorungula utsimisa misu nderi gugaa na diambu.

¹²Fumu jandi rie: Buali buagu buvu tindi diambu, pura agu jivu tindi buali.

¹³Ne mutu mosi ageguwamusi utunga pura agu; gugaa na bilongu na mutu agegubuyi.

¹⁴Botsu abamagurondanga bamagulibana, bagemuekipa; mu mbari nyimagudimba nderi guvu muvinitsi ami, nyimagukilisa tindi ukilisa.

¹⁵Dibandu yi guililili mu diambu dibuali buagu? Nyimaguvayila motsu mana mu diambu dimabi magu mapuela mapuela nesi masumu magu maneni.

¹⁶Tumba botsu abegutsoyisi botsogusu na bavinitsi bagu botsu bobegu bakoli; jogu abegubungi bobungu, na nyukindisa jogu botsu abegukindi.

¹⁷Fumu amavosa rie: Tumba nyugubelusa, nyubuga mapura magu. Sion, begunengili yifufu ne mutu mosi agegukipi.

¹⁸Fumu amavosa rie: Ugabusa nyigabusi bakoli babatu bami o bulongu buebubu; nyudulasa yingeba o mandagu menu. Misiengi miumuerungululu muna bivongu ndagu jikaga jiumuerungululu nana jimalebila.

¹⁹Kabusulu tsimaboti tsiubanganga va gari enu nesi migamu minsangu; nyudubuesanga bategula, dufunanga; nyudugobisanga dugomuelensungu.

²⁰Jenu bategula baJacob dubanganga nana na kala: dibundu dienu diuba sikiri va gusu ami; na nyukilisa bakuanitsi benu botsu.

²¹Fumu amavosa rie: umosi va gari enu oba sefu enu nesi murumitsi enu wandi; nyumubambasana na jandi obambana nami. Anyi oba na bukidi bujaʼ beni ubambana nami?

²²Mbana jenu dumue-ba batu bami, na menu nyuba Nsambi enu.

²³Guluanu mungudi uFumu, kabu jineni jimaranga, yimbongila utsiengila yitsiengili te na miuru mibatu babi.

²⁴Kabu jineni jiFumu jigosaguga te na jiudugusu nesi umanisila kanu tsiandi. Jenu dutsiyisa motsu mana o gusu.