Read Punu Jeremie 35 Bible Online

Jeremie 35 - Punu bible

Jeremie 35

¹Va temu Joaquim muana dibaala uJosias kagajiJuda Fumu amamuetsingula Jeremie mambu memama rie:

²Weʼ yeromba mukuta uRekab na batsotsi uruga o Ndagu Nsambi uyetsana o yibuku yimosi. Avana gubagabila malamu.

³Jeremie amayelanda Yazania muana dibaala ulrmeya na mutegula uHabassinia va mosi na baana bataji bandi na baana bataji baYazania: diwendi rie: mukuta uotsu uRekab.

⁴Amababega o Ndagu Nsambi o tindi mutu na muana dibaala Nsambi ulgdalia. Yibuku yieni yimaba bebeli na yibuku yibivunda va julu yibuku yiMaasseya muana dibaala uChalloum muvagulitsi upagu agumakelisanga dikotulu diNdagu Nsambi.

⁵Jeremie amasunsa minsana na mamoyi va gusu babaala baRekab abimaba bibasa de na malamu. Mbana amabatsingula rie: Nuanu!

⁶Tumba bamawaka rie: Jetu tugenu malamu; mu mbari Yonadab muana dibaala uRekab aguvu taji etu amaturuma rie: Duyanuanganga malamu nesi jenu nesi baana benu;

⁷Duyarungisa mandagu na duyakuka ne tsangu na duyavara mfuga tsirayisan duyaba fumu tsimanungi. Tumba dutsananga mu mandagu mamatsanda yitsingu yienu yiotsu yiri dutsananga tindi yitsingu o bulongu abu duvu benyi.

⁸Tuidedili motsu ama Yonadab amaturuma. La dibandu tugenu malamu yitsingu yietu yiotsu, jetu na bagatsi betu na baana betu bababaala na babagetu.

⁹Tugekerungila mandagu na tugoba na manungi mamunongu na munongu;

¹⁰tuitsaningi mu mandagu mamatsanda, tuidedili ama taji etu Yonadab amaturuma.

¹¹Ava Nabucodonosor amawendila uyetoga na bisi bulongu bueni jetu tumavosa rie: Tʼ wendianu tuyetsananu o Jerusalem vala na dibadi dibisi Babylone na bisi Syrie. La dibandu tuitsanini o Jerusalem.

¹²Fumu amamueruma Jeremie rie:

¹³Fumu Mabadi aguvu Nsambi Israel jandi rie: Wenda yetsingula baJuda na bisi Jerusalem rie: Fumu jandi rie: Dugogulu malubu nodedila mambu mami?

¹⁴Yonadab muana dibaala uRekab amaruma baana bandi bababaala yiri bayanuanga malamu; te na namunyi bagenu via, mu mbari bamadedila diruma ditaji ogu. Menu Fumu nyisakadunda uvosa nenu tumba jenu baana bami dugekulu.

¹⁵Nyimadutindila basalitsi bami botsu abavu babiyitsi, nyimabasindiga udutsingula rie: Kalulanu diela, sungiganu bifu bienu, duyaduka bansambi bangana na duyabasalila. Mbana dutsananga mu bulongu abu nyimaduvega, jenu na bataji benu. Tumba dusamaliga matuji na dusamakululu.

¹⁶Nyiina, baRekab bamadedila diruma adi taji ogu Yonadab amabaruma tumba baJuda bagekululu.

¹⁷La dibandu Fumu aguvu Nsambi Mabadi na Nsambi Israel evosili rie: Guluanu nyulasa jenu baJuda na bisi Jerusalem maguga ama nyimabatubulila mu mbari nyimavosa nenu na dusamakululu, nyimadunengila na dusamakwagula.

¹⁸Jeremie amatsingula mukuta uRekab rie: Fumu Mabadi aguvu Nsambi Israel jandi rie: Mu mbari dumadedila maruma mataji enu Yonadab na dumakelisa maruma mandi motsu na duivayi motsu ama amadusonina;

¹⁹mu dionyi Fumu Mabadi aguvu Nsambi Israel evosili rie: Yonadab muana dibaala uRekab agogambu na bategula, via!