Read Punu Jeremie 36 Bible Online

Jeremie 36 - Punu bible

Jeremie 36

¹Yilima yimuina yidurumu duJoaquim muana dibaala uJosias kaga jiJuda Fumu amatsingula Jeremie mambu memama rie:

²Bonga muganda gukasona mambu motsu muna ama nyimagutsingula mu diambu diIsrael na Juda na malongu motsu, ubanda na yilumbu ayi nyimavosila nagu va temu Josias te na namunyi.

³Ava baJuda bogululu mabi motsu ama nyitasi ubavaga tanguji bokalula diela mu diambu dibifu biogu bibi; mbana nyubatandila mabi mogu nesi masumu mogu.

⁴Jeremie amanengila Baruch muana dibaala uNeria; Baruch amasona mu muganda nana Jeremie amavosila mambu motsu ama Fumu amamutsingula.

⁵Mbana Jeremie amavosa na Baruch rie: Nyimasikugu, ngorungula uwenda o Ndagu Nsambi.

⁶Gukawenda ndeʼ na mambu maFumu ama nyimagulonsa usona, gukamarangila batu o Ndagu Nsambi yilumbu ayi bebusili uji; gukamarangila baJuda wandi ava boruyila o misiengi miogu.

⁷Tanguji Fumu ogulu ndembu tsiogu na tanguji mutu mutu okalula diela na bifu biandi mu mbari Fumu ana kabu jineni na fuiri na batu bebaba.

⁸Baruch amavaga motsu ama Jeremie mubiyitsi amamuruma na amaranga muganda uMambu maFumu o Ndagu Nsambi.

⁹Yilima yimuranu yidurumu duJoaquim muana dibaala uJosias kaga jiJuda na mu tsungi jimufu bamatubula feta. Bisi Jerusalem botsu na batu botsu abamaruyila o misiengi miJuda bamatola o Jerusalem uyekelisa feta jiFumu ubusa uji.

¹⁰Baruch amarangila batu botsu muganda umambu maJeremie o Ndagu Nsambi. Amaba o yibuku yindagu yiGuemaria muana dibaala uChafan agumaba musonitsi. Yibuku yieni yimaba o dulombili aduneni va dikotulu digona diNdagu Nsambi.

¹¹Mika muana dibaala uGuemaria mutegula uChafan amagulu mambu motsu maFumu amamaba mu muganda,

¹²amawenda o ndagu kaga o yibuku ymdagu yimusonitsi agu basalitsi babakaga bamaba batsana va mosi na Elichama agumaba musonitsi na Delaya muana dibaala uChemaya na Elnatan muana dibaala uAkbor na Guemaria muana dibaala uChafan na Sidequia muana dibaala uHanania na bivunda biotsu bisusu.

¹³Mika amabatsingula mambu motsu ama amagulu ava Baruch amarangila batu muganda.

¹⁴Mbana baana bababaala botsu bamasindiga Yehoudi muana dibaala uNetania mutegula uChelemia mundelabongu uKouchi ombu Baruch umutsingula rie: Bonga muganda agu gutsirangila batu noruga gunu! Baruch amabonga muganda na amabawagula.

¹⁵Bamamutsingula rie: Tsana na turangili uonyi. Mbana Baruch amabarangila muganda.

¹⁶Banogulu mambu motsu bamagengasana na goma na bamatsingula Banich rie: Tuyetsingula kaga mambu memama motsu.

¹⁷Bamamuewivula Baruch rie: Gurungula ututsingula nana gumadilila mambu memama?

¹⁸Baruch amabawaka rie: Jeremie jaʼ beni amatuma usona mambu memama motsu na nyimamasona na ndimba mu muganda egugu.

¹⁹Basalitsi bakaga bamaruma Baruch rie: Wenda yesuemanu jenu na Jeremie, mutu ayajaba ava dusuemina.

²⁰Mbana bamarasiina kaga o dulombili; bamasila muganda o yibuku yindagu yiElichama agumaba musonitsi na bamayetsingula kaga mambu motsu.

²¹Kaga amasindiga Yehoudi uyebonga muganda, Yehoudi amayegubonga o yibuku yindagu yiElichama agumagurangila kaga na basalitsi botsu abamaba nandi.

²²Dimaba va temu yiotsi kabogu kaga amaba atsana o ndagu ugora muji agumabangusu va gusu andi.

²³Yehoudi anoranga magaji marieru vo mana mamuganda eni kaga amapalisa yikotiga yimusonitsi na amatabula muganda eni na amagubuaga o muji; uotsu umasiegalana.

²⁴Kaga na basalitsi bandi botsu abamagulu mambu memama motsu basamalaba keri na basamapasa biduaru biogu.

²⁵Elnatan na Delaya na Guemaria bamalembiyila kaga yiri ayanyensa muganda; ne nana asamabakipa.

²⁶Mbana kaga amaruma Yerameel muana andi udibaala na Seraya muana dibaala uAzriel na Chelemia muana dibaala uAbdeel uyegaanga Baruch musonitsi na Jeremie mubiyitsi. Tumba Fumu amabasuega.

²⁷Kaga anonyensa muganda agu Baruch amasona nana Jeremie amavosila Fumu amatsingula Jeremie rie:

²⁸Bonga muganda ususu, gukasona mambu motsu amamaba mu muganda utega agu Joaquim amanyensa.

²⁹Gukavosa mu diambu diJoaquim kaga jiJuda rie: Fumu jandi rie: Gumanyensa muganda egugu na gumawivula rie: Dibandu yi gumasonina rie: Kaga jiBabylone uruga eruyi uyibunga bulongu buebubu noyitsiemusa batu na bibulu?

³⁰La dibandu Fumu evosili mu diambu diJoaquim kaga jiJuda rie: Ne mutu andi umosi agotsana va yitsiga yibufumu yiDavid na mfumbi andi jiuwanyugu va nyangu jineni na jigogusulu va yiotsi yimukolu.

³¹Nyumukilisa, jandi na bategula bandi na basalitsi bandi mu diambu dimabi mogu, nyubalasa maguga motsu ama nyimatubula ava bamabusila ukulu, jogu na bisi Jerusalem na baJuda.

³²Jeremie amabonga muganda ususu agu amawakisa Baruch agumaba musonitsi. Baruch amasona muna nana Jeremie amavosila, mambu motsu mamuganda agu Joaquim kaga jiJuda amanyensa. Mambu masusu mapuela mamabuesu muna.