Read Punu Jeremie 38 Bible Online

Jeremie 38 - Punu bible

Jeremie 38

¹Chefatia muana dibaala uMattan na Guedalia muana dibaala uPachehour na Youkal muana dibaala uChelemia na Pachehour muana dibaala uMalkia bamagulu mambu ama Jeremie amatsingula batu botsu rie:

²Fumu jandi rie: Jandi agusiala o musiengi egugu oboku na divita nesi dungosu dunsala nesi yivunga. Tumba jandi agupala nowenda ombu bisi Babylone agoboku.

³Jeremie amabuela rie: Fumu jandi rie: Musiengi egugu uwakusu ombu dibadi diBabylone dionyi diugupatula.

⁴Bagora bakaga bamatsingula kaga rie: Dibaala diedidi aboku! Mu mbari edetsi bagora abavu o musiengi egugu na batu botsu ava ebatsingulili mambu mamunongu eni; dibaala diedidi agerondi uvaga batu bebaba maboti, erondi yika maguga mogu.

⁵Kaga Sedecias amawaka rie: Avu nenu muvayilianu nana duirondili ngodugubitsa.

⁶Mbana bamabonga Jeremie na bamamubuaga o yiduna yimamba yiyivunda yibagora Malkia ayimaba o dulombili dutsugu. Bamasundusa Jeremie na mikudu; yiduna yieni yisamaba na mamba tumba yimaba na diobu; kabogu Jeremie amagakama mu diobu.

⁷Ebed-Melek muisi Ethiopie agumaba muvangu na agumasalanga o ndagu kaga amagulu yiri bamatsudiga Jeremie o yiduna yimamba. Kabogu kaga amaba atsana va dikotulu diBenjamin,

⁸Ebed-Melek amapala o ndagu kaga mbana amavosa na kaga rie:

⁹Aa kaga, batu bebaba bamavayila Jeremie mubiyitsi dibi dineni, bamamutsudiga o yiduna yimamba. Nsala jiumuboka vana avu, mapa mamasuka o musiengi.

¹⁰Mbana kaga amavega Ebed-Melek muisi Ethiopie diruma diedidi rie: Bonga magumarieru mababaala dukayepalisa Jeremie o yiduna yimamba akekefuila.

¹¹Ebed-Melek amabonga babaala na bamawenda o ndagu kaga va mbura o tsi yilundulu; amapalisa mutuki na masiengi; bamabisundusa ombu Jeremie o yiduna yimamba na mikudu.

¹²Mbana Ebed-Melek muisi Ethiopie amatsingula Jeremie rie: Sunsa mutuki na masiengi o tsi tsibakuru bagu na o tsi mikudu. Jeremie amadivaga.

¹³Mbana bamaduta Jeremie mu mikudu na bamamupalisa o yiduna yimamba. Jeremie anopala amatsana va dulombili dutsugu.

¹⁴Kaga Sedecias amasindiga mutu uyelanda Jeremie mubiyitsi, amabaruma umubega ombu gandi o dikotulu adimurieru diNdagu Nsambi. Kaga amatsingula Jeremie rie: Nyina diambu adi nyirondi uguwivula, guyansuega diambu.

¹⁵Jeremie amawivula Sedecias rie: Pa nyugutsingula adi vengu nyugutsingula gugomuembokisa? Na pa nyugulonsa dilongi gugodisinga.

¹⁶Kaga Sedecias amalevila Jeremie pesi o musuega rie: Fumu ejabi, jandi agumatuvega monyu! Ngogubokisa na ngoguwakisa ombu babaala bebaba aberondi uguboka.

¹⁷Mbana Jeremie amatsingula Sedecias rie: Fumu aguvu Nsambi Mabadi na Nsambi Israel jandi rie: Pa guwenda na kaga jiBabylone gugobokusu na musiengi egugu ugonyensu ne jenu na bisi ndagu agu.

¹⁸Tumba pa gugowenda nogu musiengi egugu uwakusu ombu bisi Babylone, jogu bogunyensa; na gugorina.

¹⁹Kaga Sedecias amatsingula Jeremie rie: Nyidumi baJuif abamavioga ombu bisi Babylone; bakekwakisa ombu gogu na bakendasa maguga.

²⁰Jeremie amawaka rie: Bagoguwakisa. Gulu diambu diFumu adi nsigutsingula; mbana guba buranga na gugoboku.

²¹Tumba pa gubusa upala gulu adi Fumu amandasa rie:

²²Bagetu botsu abetsani o ndagu kaga jiJuda bobegu ombu bagora bakaga jiBabylone. Boguwimbilila duimbu duedudu rie: Ndeʼ gumadunsu; gumarumu na jogu abamagutubulila duvotsu; na makulu mamagakama mu diobu bambatsi bamayenagabuga!

²³Bagatsi bagu botsu na baana bagu bobegu na bagora baBabylone na gugorina. Kaga jiBabylone ogugaanga na musiengi egugu unyensu.

²⁴Sedecias amatsingula Jeremie rie: Ne mutu mosi ayajaba yilombi yieyiyi, mbana gugoboku.

²⁵Pa bagora bami bogulu yiri nyimavosa nagu na pa beguwivuli rie: Tutsinguli ama gumatsingula kaga nesi ama kaga amagutsingula, guyatusuega diambu mbana jetu tugogubokisa.

²⁶Gukabawaka rie: Nyimalembiyila kaga yiri ayakabusa o ndagu Yonatan, ngeyefu guna.

²⁷Bagora botsu bakaga bamawenda ombu Jeremie na bamamuwivula bivu. Amabawagula dedi mosi nana kaga amamurumina. Kabogu bamavola sui na bamagusuga mu mbari yilombi yieni yisamavosu.

²⁸Jeremie amatsananga va dulombili dutsugu te na yilumbu ayi Jerusalem umabongu. Guluanu adimalabana ava Jerusalem umabongulu.