Read Punu Jeremie 50 Bible Online

Jeremie 50 - Punu bible

Jeremie 50

¹Mbigulu aji Jeremie mubiyitsi amavosila Fumu mu diambu dimusiengi uBabylone na bisi uonyi.

²Samunanu musamu egugu o malongu, utubulianu, matisanu bilimbu! Utubulianu, duyasuega ne dimosi! Dukavosa rie: Babylone umabongu! Bakosi bandi bavu tsokudu, dubungu dubansambi bamfurulu. Nyiina, Bel jivu tsokudu; Mardouk jimabulu!

³Bisi banda bewendi uyegutumuna, biari biotsu biukaluga mbura atsigaa na mamba. Batu bagomuetsana o Babylone. Batu na bibulu bamarina na bamatsiemuga.

⁴Fumu evosi rie: Muna bilumbu bieni baIsrael na baJuda bogabuga va mosi; boyenawendanga nolila ava boyenarombilanga Fumu Nsambi ogu.

⁵Bowivula nsila uwendasana o Sion. Boyetasuna uyevangana pangini jimutubu aji bagolibana via!

⁶Batu bami bavu nderi mugamba ubindombu abimatsiemuga. Babungulitsi bogu bamabitsiemusa na bamayenabipembusa nsila o mikongu. Bimayenawendanga va julu tsimikongu na bamalibana yivanga yiogu.

⁷Botsu abamabirasuna bamabijanganga na bavinitsi bogu bamavosanga rie: Tugaa na mbela mu dionyi; bamavayila Fumu ogu dibi, jandi aguvu dugobutsu duogu, aguvu ditasa dibataji bogu.

⁸Fumu evosi rie: Rinanu Babylone gusuganu o bulongu bueni; banu nderi balumi babinsabi abewendisi mugamba.

⁹Nyupalisa malongu mapuela mayiari yibanda uyetumuna Babylone. Bokunsama utoga divita nogu na bobabonga. Mbansa tsiogu tsivu nderi agumaguku utoga divita agugegabuyi miogu na miogu.

¹⁰Fumu evosi rie: Bulongu buBabylone bukindu; batu abobukinda bodila biwelimina nosangila.

¹¹Nyiina, jenu adumakinda disiala diami, labanu nsangu nobueji! Nyiina, yenadumuganganu nderi ngombi, vaganganu nduku nderi bakabala.

¹²Nguji enu yisonyi elabi, jandi agumadubura osundusu. Ugegusu va gari maiongu motsu, uvu kumu ajivu dukanga nesi bura ajigaa na mamba.

¹³Ugomuetsanunu mu diambu dikabu jiFumu, usiala mududu. Botsu abovioganga va mugula Babylone bokambulu na bosimina mu diambu dinsoruru tsiandi tsiotsu.

¹⁴Jenu barela badupalu kunsamanu utoga na Babylone! Maninanu mangolu ugunonga mbansa; umavayila Fumu dibi.

¹⁵Ugamuyilianu mugamu udivita yiari na yiari! Umakewakisa ombu mulungitsi; bibuga bimapansiga; bibaga bimarakuga. Ajina ia kabusulu pila jiFumu! Uvayilianu nana umavayila basusu.

¹⁶Bokisanu jandi oyivari nesi oyitsonsiyi va temu dutsonsugu. Mutu mutu agabuyi ombu batu bandi na mutu mutu o dilongu diandi uyenarinanga dijenga dimubungitsi.

¹⁷Israel avu nderi yindombu ayimatsiemuga ayi bimbungu bimabingisa. Kaga jiAssyrie amareyila uyiji; Nabucodonosor kaga jiBabylone agusita, amayiteba bivisi.

¹⁸La dibandu Fumu Mabadi aguvu Nsambi Israel amavosila rie: Guluanu nyukilisa kaga jiBabylone na dilongu diandi dedi mosi nana nyimakilisila kaga jiAssyrie.

¹⁹Nyugabusa Israel o mbura andi oyenalinganga o Carmel nesi Bacban; ogukuru o mukongu uEfraim nesi o Galaad.

²⁰Fumu amavosa rie: Muna bilumbu bieni boromba dibi diIsrael tumba digolabana nesi disimu diJuda tumba dionyi wandi digomuelabana. Nyutanda bansialutsu aba nyimasila.

²¹Fumu amavosa rie: Bawendi o dilongu adivu tindi mimbini, ombu batu abetsani o Pecod na bakilisi! Baduki, baboki, bagudisi! Dugusu maruma mami motsu!

²²Migamu midivita mimagulunu, na dubungu duvu duneni.

²³Ka muna diambu di! Babylone umapansu va gari malongu! Marto mabutamba bumfuimbila mamatabuga na mamagesumuga! Ka muna diambu di!

²⁴Babylone, nyimagurambila murambu, ndeʼ umawakululu na usamadijaba; umarasunu na umagaangu mu mbari umagagana na Fumu.

²⁵Fumu amadibula yisuegulu yiandi yibitogulu na amapalisa bitogulu bikabu andi. Ayina yivu yisalu yiFumu aguvu Fumu Mabadi o bulongu buBabylone.

²⁶Kotanu o Babylone mu mbura tsiotsu, dibulanu bisuegulu. Gukiganu abimakindu na bibungianu! Ne yima yimosi yiyasiala.

²⁷Bokanu bangogaga botsu batabulianu miuru! Ka muna diambu di bolaba, yilumbu yiogu yimatola; temu jimukilu ogu.

²⁸Guluanu migamu mibarinitsi nesi mijogu aberini o bulongu buBabylone abesamuni o Sion, kabusulu pila jiFumu Nsambi etu, pila jiNdagu andi.

²⁹Nengilanu barela badupalu uyetoga na Babylone. Bagutsiengisi milaku mogu ne mutu mosi ayarina! Bamugabusili dibi adi amavayila basusu! Mu mbari umakematisa na dunangu va gusu Fumu nesi va gusu Nsambi Israel.

³⁰La dibandu bafudu boreyila mu mansila na bagora bofu muna yilumbu yieni.

³¹Fumu aguvu Fumu Mabadi evosi rie: Mungo dunangu, nyina kueru nagu! Yilumbu yiagu yimatola; temu jimukilu agu.

³²Mungo dunangu otsietuga na oberuga, mutu agomusimbula. Nyunyensa misiengi amibambini na muji unyensa biari biotsu.

³³Fumu Mabadi evosi rie: BaIsrael na baJuda betsogusu va mosi; botsu abamababega bakoli bebasikiyi na bebusi ubajeyisa.

³⁴Menu mugabusilitsi ogu pila nyivu na tindi mangolu, diina diami divu Fumu Mabadi. Nyubatabulila bunsonsi novega bisi bulongu yivumu noreyimisa bisi Babylone.

³⁵Fumu evosi rie: Toga divita na bisi Babylone! Togadivita na bisi musiengi na barumitsi na bango diela.

³⁶Toga divita na babiyitsi bamfurulu! Babi nderi biduka! Toga divita na bangogaga! Babakimi mirima!

³⁷Toga divita na bakabala na makalu! toga divita na batu bamunongu na munongu abavu muna! Bakaluyi nderi bagetu! Toga divita na bilundulu bikindu!

³⁸Mamba makamuyi! Buvu bulongu bubakosi! Nsoruru tsibakosi tsimababivisa mirima.

³⁹La dibandu bibulu bikumu biutsananga muna va mosi na makoju na ba-otarisa. Ugomuebaganga na batu.

⁴⁰Fumu evosi rie: Nana dimabila na Sodome na Gomorrhe na misiengi amimabambana anana diubila na musiengi egugu, ugomuetsanunungu na ne mutu mosi agomuesikama muna.

⁴¹Batu uruga beruyi o yiari yibanda, bavu dilongu adivu na bakaga bamangolu abamarambuyila o masuka mabutamba.

⁴²Bagora beruyi na bapita na majenga; bavu na dikasi na bagaa na yingeba. Mufi mogu megumbi nderi nduku jimubti. Bamanangama bakabala, bavu bakunsama utoga nagu, Babylone!

⁴³Kaga jiBabylone amagulu musamu kabogu amadeda. Etsukimi na elabi maguga nderi mugetu agumagaangu na misongu.

⁴⁴Fumu evosi rie: Uruga nyiruyi ukinda mbura jibangogaga; nyivu nderi yimbungu ayimabingusu o malima maJourdain. Nyusundila urinisa bisi Babylone na nyuwarisa agu nyimasola. Anyi ebagunu nami? Anyi otuma? Kaga yi ogagana nami?

⁴⁵Fumu amagana mu diambu dibisi Babylone na amatabula mambu mogu! Nyiina, bobegu nderi bindombu abiuboku! Nyiina, mbura tsiogu tsiupansu.

⁴⁶Nduku jidubungu duogu jimagulunu butamba bumaregama; migamu mimagulu te no malongu motsu.