Read Punu Jeremie 52 Bible Online

Jeremie 52 - Punu bible

Jeremie 52

¹Sedecias amaba na magumabeji na yilima yimosi ava amabandila uba kaga jiJuda; amarumanga yigumi na yilima yimosi o Jerusalem. Diina dinguji andi Hamoutal muana mugetu ulrmeya muisi Libna.

²Amavaga amasamalasa Fumu ubueji, dedi mosi nana Joaquim amavayila.

³Adimalabana o Jerusalem no Juda dimarombisa Fumu unyoga te na amabusa tindi ubusa batu bandi. Sedecias amakaluga mumbini ukaga jiBabylone.

⁴Yilima yimufu bidurumu duSedecias mu yilumbu yimugumi yitsungi jimugumi Nabucodonosor kaga jiBabylone amawenda na bagora bandi botsu uvaga milaku bebeli na Jerusalem; bamaramba mirambu yiari na yiari.

⁵Musiengi umakandu te nayilima yiyigumi na yimosi bidurumu duandi.

⁶Nsala jimaba dungosu o musiengi na batu basamaba na biguji. Yilumbu yimufu yitsungi jimuina,

⁷bisi Babylone bamatoba diviogulu mu yivaga yimusiengi. Ava mukolu bagora baJuda bamarina. Diuleba bisi Babylone bamakanda musiengi, bamagusuga o Jerusalem ava bamavioyila va dikotulu adimaba va gari bivaga bibeji va mugula nungi jikaga. Mbana bamavioyila mu nsila jiyibususu yiJourdain.

⁸Tumba bagora baBabylone bamaduka kaga na bamamurasuna o kumu jiJericho na bagora bandi botsu bamamurina vala.

⁹Bamagaanga kaga na bamamubega ombu kaga jiBabylone o Ribla o bulongu buHamat avana Nabucodonosor kaga jiBabylone amatabulila Sedecias bunsonsi.

¹⁰Avana wandi kaga jiBabylone amatabusa baana bababaala baSedecias miuru va misu mandi; amatabusa miuru mibatu baneni baJuda wandi.

¹¹Mbana bamatoba Sedecias misu na bamamutunga na panga tsikunga, kaga jiBabylone amamubega o Babylone na amamukelisa o tsugu te na dufu duandi.

¹²Mu yilima yimugumi na yifu bidurumu duNabucodonosor kaga jiBabylone mu yilumbu yimugumi bitsungi jimuranu, Nebouzaradan yivunda yibagora bakaga jiBabylone amawenda o Jerusalem.

¹³Amanyensa Ndagu Nsambi na ndagu kaga na mandagu masusu maJerusalem; sinsa viri mandagu mabaneni.

¹⁴Bagora baBabylone abamaba na yivunda yibagora bamapansa bivaga biotsu biJerusalem.

¹⁵Nebouzaradan amabega batu abamatsananga o musiengi bakoli. Amabawakisa ombu kaga jiBabylone va mosi na batu abasialulu.

¹⁶Tumba yivunda yibagora amasila yika mua batu abamasalusu ukelisa nofutsanga manungi.

¹⁷Bisi Babylone bamapansa makutu makunga amamaba va dikotulu diNdagu Nsambi na mabandu na nsienga tsikunga abimaba o Ndagu Nsambi na bamayenabega kunga o Babylone.

¹⁸Bamabonga bisunsulu bimabufu na bapelu na mabaga na mamoyi na bisalulu biotsu bikunga.

¹⁹Yivunda yibagora amabonga bansienga na bisunsulu bimuji na mamoyi na bisunsulu bimabufu na mangasa na batasi na bambuta abimaba bilora na bilora jivema.

²⁰Basamarungula upitsa kunga jiotsu: makutu motsu mabeji na nsienga jineni na yigumi na bangombi babeji tsikunga atsimaba bisunsulu atsi kaga Salomon amanmgisa ukotisa o Ndagu Nsambi na bisalulu bieni biotsu bikunga; utsira ubionyi usamajabunu.

²¹Yirela yidikutu dimosi dimaba yifu yimetera na uroga udionyi umaba metera yisiamunu; jimaba jidonga na mugobu ujionyi umaba yifu yisantimetera.

²²Va julu dionyi vamaba yiviovi yikunga, yirela yiyiviovi yimaba metera beji na yibuku; yiviovi yimatsiengusu bima abimabagunu na migeranada abimanamugu mu mungongu, biotsu bimaba bikunga; bimaba dedi mosi mu dikutu adimubeji.

²³Tsimaba magumidufu na migeranada yisiamunu o kadi yiari, dutalu dumigeranada miotsu amimatsiengusu yima ayimabagunu na mbusa dumaba kama.

²⁴Yivunda yibagora amabonga Seraya na Sefania bivunda bibavagulitsi bapagu na bakelisi barieru bamakotulu.

²⁵Amabonga muvangu agumaba o musiengi agumarumanga bagora va mosi na yisambuali yibabaala abamaba milonsi mikaga na musonitsi uyivunda yidibadi agumasansama batu na magumasiamunu mababaala; botsu bana bamaba o musiengi.

²⁶Nebouzaradan amababegaombu kaga jiBabylone o Ribla.

²⁷Kaga jiBabylone amababokisa o Ribla o bulongu buHamat. Anana baJuda bamabegulu bakoli vala na bulongu buogu.

²⁸Adudu la dutalu dubatu aba Nabucodonosor amabega bakoli mu yilima yimusambuali: tosini yirieru na magumabeji na baJuda barieru;

²⁹mu yilima yiyigumi na yinana bidurumu duandi: yinana yikama na magumarieru na bisi Jerusalem babeji;

³⁰mu yilima yimagumabeji na birieru, Nebouzaradan amabega yisambuali yikama na magumana na baJuda baranu. Dutalu duotsu dumaba tosini jina na kama yisiamunu tsibatu.

³¹Yilima yimagumarieru na yisambuali bibuviga buJoakin kaga jiJuda, Evil-Merodak amabiatsu kaga jiBabylone. Mu yilumbu yimagumabeji na biranu bitsungi jiyigumi na beji mu yilima yitega yidurumu duandi amajeyisa Joakin kaga jJuda na amamupalisa o tsugu.

³²Amavosa nandi na buranga na amamuvega yitsiga yibukaga ayimaviolila bitsiga bibakaga basusu abamaba nandi o Babylone.

³³Amamuvinsila biduaru biandi bitsugu na Joakin amajanganga va mosi nandi yitsingu yiandi yiotsu.

³⁴Anana kaga jiBabylone amamuvayilanga kadi yilumbu te na amafu.