Read Punu Jeremie 7 Bible Online

Jeremie 7 - Punu bible

Jeremie 7

¹Fumu amaruma Jeremie rie:

²Vioga va dikotulu diNdagu Nsambi, avana gutubulila bulumbi buebubu rie: Jenu baJuda botsu abetsani va dikotulu diNdagu ejiji, gudamanu va gusu Fumu!

³Fumu Mabadi aguvu Nsambi Israel evosi rie: Sungiganu mansila menu nesi bifu bienu mbana nyudusingisa utsananga va mbura ejiji.

⁴Duyavayila posulu tsindunsulu yitu nesi jogu abevosi rie: Ndagu Nsambi ajiji aji Fumu etsanini, Ndagu Nsambi nyiina, Ndagu Nsambi!

⁵Pa duisungiyi mansila menu nesi bifu bienu, pa duilasi dusungugu ombu bamosi nombu basusu,

⁶pa dugekambisi muenyi na yisiana na mukuili pa dugewitili malungu ma-agugaa na mbela va mbura ejiji na pa dugeduki bansambi bangana abodubunga,

⁷mbana nyudusingisa utsana va mbura ejiji mu bulongu abu nyimavega ombu bataji benu te na mutubu.

⁸Tumba labatianu nana duivayili posulu tsindunsulu yitu yikulini.

⁹Je dudaga noboka novaga bumbembu noleva pesi jikulini novagulila Baal bima bimbunga jiboti noduka bansambi bangana aba dusamalejaba?

¹⁰Mbana duiruyi va gusu ami o Ndagu ejiji aji diina diami diyitsulu na duivosi rie: Tumawaku kalala! Va julu vana duimuevaga nsoruru tsieni tsiotsu!

¹¹Duitasi Ndagu ami jivu yisuemunu yibadayitsi? Fumu amavosa rie: Anaina nyilabili. Nyilabi nana duivayingi.

¹²Kabogu wendanu o Mbura ami o Silo agu nyimaletsaninanga. Rangiminanu nana nyimababubungila mu diambu dimbivulu tsibatu bami baIsrael.

¹³Fumu amavosa rie: Dumamuevaga mabi meni motsu diuleba nyimadulubusanga, dusamadikipa; nyimadunengila na dusamawagula.

¹⁴Kabogu nyuvayila Ndagu aji diina diami diyitsulu aji duivayili yitu na mbura aji nyimaduvega, jenu na bataji benu dedi mosi nana nyimavayila Silo.

¹⁵Na nyudukakasana vala nami dedi mosi nana nyimakakasa baana bataji benu botsu, nesi bategula botsu baEfraim.

¹⁶Ndeʼ Jeremie guyansambilila batu bebaba na guyakamuyila mu diambu diogu; ngogugulu, via!

¹⁷Ndeʼ gugelabi adi bevayi o misiengi miJuda nesi mu mansila maJerusalem?

¹⁸Baana beriabi mikansu, bataji bebangisi miuji na bagetu bevayi mapa uvagulila kaga jimugetu jijulu. Bevagulili bansambi bangana pagu tsiunu atsinyoyisi.

¹⁹Fumu amawivula rie: Je meʼ benyoyisi? Tsiri jogu beni na jogu beni abekelasa yisonyi?

²⁰La dibandu Fumu aguvu Fumu evosili rie: Nyuroyisa tindi uroyisa kabu ami ajiubasa mbura ejiji, ajiubemba batu nesi bibulu, nesi miri nesi milunda. Kabu ami jiuba nderi muji agugotsima via!

²¹Fumu Mabadi aguvu Nsambi Israel evosi rie: Buesanu pagu tsienu tsiunyensa va julu pagu tsienu na jianu nyama.

²²Ava nyimapalisila bataji benu o bulongu buEgypte nyisamalebavega ne diruma dimosi mu diambu dipagu tsiunyensa na dipagu.

²³Tumba guluanu diruma adi nyimabavega rie: Guluanu diufi diami na nyuba Nsambi enu, jenu duba batu bami; vioyilanganu mu mansila ama nyimadulonsa mbana dulabanga nsangu.

²⁴Basamagulu na basamaliga matuji; bamaduka matasa mamirima miogu mibi na bamaba biduka; bamasiala mansinsima, basamawenda o gusu.

²⁵Ubanda na yilumbu ayi bataji benu bamapalila o bulongu buEgypte te na namunyi nyimadutindilanga yilumbu na yilumbu basalitsi bami abavu babiyitsi.

²⁶Ne nana dusamakulu na dusamaliga matuji na dumagalisa mirima mienu, dumavaga mabi uviolila bataji benu.

²⁷Ndeʼ Jeremie gukabatsingula mambu meni motsu tumba bagogugulu; gukabanengila tumba bagoguwagula.

²⁸Kabogju baisinguli rie: Adidi la dilongu adigegulu diufi diFumu Nsambi adigerondi ugulu dilongi, ngensa jimatsiemuga, jigaa nogu.

²⁹Fumu amavosa rie: Jenu baJuda rebulilanu nanga tsienu; notsibuaga vala; duyenalilanga na manyonyi ojulu tsimikongu! Fumu amabusa tindi ubusa dukula duedudu adumamurombisa unyoga.

³⁰Fumu amavosa rie: BaJuda bamavaga amagendasi ubueji. Bamavaga nsoruni tsiogu o Ndagu aji diina diami diyitsulungu ujivaga nsoruru.

³¹Bamarungila Tofet mbura tsiduyitsu o yibususu yiBen-Hinnom uyenyensa baana bogu bababaala na babagetu pagu. Nyisamadiruma na nyisamaditasa ne utasa.

³²La dibandu Fumu amavosila rie: Bilumbu biuruga abi bagomuerangunina Tofet nesi yibususu yiHinnom, tumba bovosanga rie: Yibususu yiubokila. Avana botsiyilanga bamfumbi mu mbari vagaa mbura jisusu.

³³Bamfumbi bogu bododungu na batsoli na bibulu bimusiru biubajanganga; vagoba mutu ubabinga.

³⁴Nyuvotsa migamu minsangu nobueji o misiengi miJuda nesi mu mansila maJerusalem, nesi nyimbu tsimulumi na tsimugatsi mu mbari bulongu bukaluga mududu.