Read Punu Jeremie 8 Bible Online

Jeremie 8 - Punu bible

Jeremie 8

¹Fumu amavosa rie: Vana temu eni bopalisila bivisi bibakaga baJuda mu bangila bogu, nesi bivisi bibarumitsi bogu nesi bivisi bibavagulitsi bapagu nesi bibabiyitsi nesi bibisi Jerusalem.

²Bobiwanyiga va nyangu nesi va muetsa utsungi na ubambuelili, bivisi bibatu abamaronda bijalala bieni: bamabisalila na bamabiyitsa na bamabisambila nogudama va gusu bionyi. Bivisi bieni bigomuebolu nesi utsigu; biusiala va julu butamba nderi dibumbu.

³Fumu Mabadi amavosa rie: Dufu duiviolili monyu ombu bansialutsu tsibifumba bibi mu mbura tsiotsu atsi nyubabinga.

⁴Batsinguli rie: Fumu ewivuli rie: Je beberuyi tsiri umuegabuga?

⁵Kabogu dibandu yi bisi Jerusalem beketsiemusila mutubu? Bedukingi bansambi bamafurulu na bebusi ugabuga ombu gami.

⁶Nyivu limba; ugulu nyigulu ama bevosi. Bagevosi adivu diwelimina. Ne mutu mosi agekaluli diela na mbivulu tsiandi na agekewivula rie: Yi nyimavaga? Mutu mutu eduki amandi dedi mosi nana kabala edukili nduku jidivita.

⁷Nesi dilembi ejabi temu andi; na dikunda na ndelenga na yirueru bekipi temu atsi belabini; tumba batu bami bagejabi migaga miFumu.

⁸Tsie turungulila uvosa tuna diela, migaga miFumu mivu netu. Tsiri basonitsi benu abamakalusa migaga mavindugulu?

⁹Bango diela bamalaba yisonyi, bamabakama mirima na bamasutusu. Banolensa Mbembu Fumu diela dimunongu yi divu nogu?

¹⁰Fumu amavosa rie: La dibandu nyuveyila bagatsi bogu ombu basusu nesi manungi mogu ombu bafumu basusu. Ubanda na tindi ngebi te na tindi yivunda botsu besansi bansi va mambi; ubanda na mubiyitsi te na muvagulitsi upagu, botsu bediongingi.

¹¹Begengili mapura mabatu bami nderi migaruga, mbana bevosi rie: Duvotsu! Duvotsu! Tumba duvotsu dugatsi.

¹²Fumu ewivuli rie: Belabi yisonyi mu mbari bamavaga nsoruru? Bagelabi yisonyi, bagejabi yisonyi. La dibandu boberuyila va mosi na jogu abeberuyi; va temu eni nyubakilisa na bobetsu.

¹³Fumu amavosa rie: Mbe nyironda ugukiga batu bami nana mutu egukiyili digumba tumba bavu nderi mfuga ajigaa na mirayisan nesi mufiga agugaa na mifiga; kabogu nyimasingisa benyi ubapatula bulongu.

¹⁴Dibandu yi tutsana? Gukamanu, tʼwendianu o misiengi mikandu, uyefuila guna! Fumu Nsambi etu amatusolila dufu, etunuisi mamba amamalombu mu mbari tumavaga masumu va gusu andi.

¹⁵Tumaviva duvotsu tumba ubueji uka? Tumaviva dubelusu tumba tumalaba yika dunsiensi.

¹⁶Nduku jibakabala babavinitsi jigulunu o yiari yiDan butamba buotsu bumasisana na nduku tsibonyi. Beruyi, bemanisili bulongu na biotsu abivu muna nesi musiengi na bisi musiengi botsu.

¹⁷Fumu amavosa rie: Nyudutindila banyoga abagesansu; bodugaka.

¹⁸Munyongu umapiolila, anyi ombembiga? Murima ami yika ubakama.

¹⁹Guluanu migamu mibatu bami, migulunu o vala rie: Fumu esaa o Sion? Kaga andi agemuetsanina muna? Dibandu yi bamanyoyila na bakosi bogu nesi bansambi bangana?

²⁰Dutsonsugu dumavioga mangala jimasuka, jetu tusakawaku kalala!

²¹Nyimagulu buali mu diambu dipurulu tsi batu bami; munyongu nyilabii murima ami yika ubakama.

²²O Galaad uisaa bilongu? Uisaa mubuyitsi? Dibandu yi muvedi ubatu bami ugelabini?

²³Aa, mbe muru ubasa na mamba, mbe misu mami mavu yileka yimatsanga mbe nyulilanga bamfumbi babatu bami nyangu na mukolu.