Read Punu Jeremie 9 Bible Online

Jeremie 9 - Punu bible

Jeremie 9

¹Aa mbe nyina mbura jibalinsi usuemina o kumu mbe nyusila batu bami na mbe nyukakana vala nogu mu mbari jogu botsu bavu bimbembu; bavu dibuli dibasoyitsi badiela.

²Fumu amavosa rie: Jogu benatuli ndimi tsiogu nderi bapita na benyavisi mfurulu; mamfurulu mogu mebasi bulongu, tsiri ngensa. Befunisi yika mbivulu nambivulu na bagenjabi.

³Mutu mutu akebini na mbatsi andi na ayavayila muana nguji andi yitu; muana nguji uotsu erombi udionga muana nguji andi na mbatsi jiotsu enyavisi mfuengululu.

⁴Mutu mutu edunsi mutu nandi na bagevosi ngensa; bamawijisa ndimi tsiogu ufuranga na bamakewijisa uvaga mabi.

⁵Fumu amavosa rie: Yitsanunu yiagu yivu va gari batu abefuringi; na mamfurulu mogu bebusi unjaba.

⁶La dibandu Furtni Mabadi evosili rie: Gulu, nyubawansa na nyubaliomisa. Va disusu adi nyurungula uvaga mu diambu dimbivulu tsibatu bami?

⁷Ndimi tsiogu tsivu nderi mbansa atsiboki, bevosingi yika mamfurulu; na miunu bevosingi duvotsu na batu nogu tumba o gari tsimirima berambi mirambu.

⁸Fumu amawivula rie: Ngobakilisa mu mabi meni? Ngogabusila bisi dilongu dieni pila?

⁹Nyulila mu diambu dimikongu na nyunyonga mu diambu dimamanyi; nyuwimbila nyimbu tsimanyonyi mu diambu dikumu; mu mbari bimanyensu na batu bagomuevioyila muna na nduku tsimigamba tsigemuegulunu; batsoli na bibulu bamarina na bamatsiemuga.

¹⁰Nyuvaga Jerusalem diguki dibivongu abimapansu na yisuemunu yimakoju, nyuvaga misiengi miJuda nderi kumu aji batu bagomuevioyila.

¹¹Va mutu aguvu na dujabu uvindiga motsu mana? Pa Fumu amavosa nandi atubuli: dibandu yi dilongu dimabungulu na dibandu yi dimanyensulu nderi kumu aji batu bagemuevioyila?

¹²Fumu amabuesa rie: Motsu mana mavu mu mbari bamabusa migaga miami ami nyimabavega na basamagulu diufi diami na basamadikipa.

¹³Bamawarisa kanda tsijogu beni na bamakota mu muyitsa uBaal nana bataji bogu bamabalonsila.

¹⁴La dibandu menu Fumu Mabadi aguvu Nsambi Israel nyivosili rie: Gulu, nyulisila batu bebaba dugundu, nyubanuisa mamba amamalombu.

¹⁵Nyubapansa o malongu ama jogu basamalejaba, nyusindiga batu ubaduka na majenga te na bobaboka botsu.

¹⁶Fumu Mabadi evosi rie: Letasatianu na nengilanu balitsi; baruyi! Rombanu tindi balitsi, baruyi!

¹⁷Balensi notuwimbilila nyimbu tuimanyonyi! Matsanga mapali mu misu metu nesi mu bilila bietu bimisu.

¹⁸Migamu mimunyongu mimagulunu o Sion; yika tsie tumabungu! Tumabasa na yisonyi! Vengu tusila bulongu! Bamapansa yitsanunu yietu.

¹⁹Bagetu, guluanu mbembu Fumu na tsiyisanu adi evosi! Lonsanu baana benu babagetu ulila na lonsasananu nyimbu tsimanyonyi!

²⁰Dufu dumakota ombu getu, duvu nesi o mandagu metu maboti; uboka duiboki baana mu mansila nesi bafudu mu makasa.

²¹Ndeʼ Jeremie gukabuesa adi menu Fumu nyitubuli rie: Bamfumbi bavu layini te na butamba buba nderi budibumbu na bavu dedi na abibonduyi va nsima batsonsiyitsi abi mutu agelabi.

²²Fumu evosi rie: Mungo diela ayakedodisa na diela diandi, mungo mangolu ayakedodisa na mangolu mandi, yisina ayakedodisa na busina buandi.

²³Tumba oyirondi ukedodisa akedodisa mu mbari amajaba mambu mami na amanjaba na amajaba yiri menu nyivu Fumu oyiveyingi maboti na musuga na dusungugu va butamba. Fumu amavosa rie: Batu bamunongu eni bendasi ubueji.

²⁴Fumu amavosa rie: Bilumbu biuruga abi nyukilisila botsu abamarebu abavu na mirima amisakarebululu,

²⁵abetsani o Egypte no Juda no Edom na baAmmon na abetsani o Moab na botsu abefuyi biedu nesi abetsani o kumu. Bisi malongu meni motsu basarebu, na baIsrael botsu bana mirima amisakarebululu mu diambu diFumu.