Read Punu Mitatu 2 Bible Online

Mitatu 2 - Punu bible

Mitatu 2

¹Ka muna diambu di! Fumu na kabu andi amakubiga muana mugetu uSion o tsi mamungi. Jandi aguvu o julu amabuaga bundumba buIsrael o tsi. Asamamuerangimina yiri Sion uvu yisunsulu yimakulu mandi mu yilumbu yikabu andi.

²Fumu asamamulasa yingeba amapansa bitsanunu biotsu biJacob; na fuiri andi amaberusa bivaga biJuda amabibuaga va tsi na amasabula bufumu na barumitsi bandi.

³Na kabu andi jineni amapansa mangoiu motsu maIsrael. Amabusa ubawamusa va durugu dumuvinitsi. Amabangisa muji agumanyensa batu bandi, agumasielasana biotsu yiari na yiari.

⁴Amaduta pita andi nderi muvinitsi; amanangula gogu andi nderi mutumunitsi; o Ndagu Nsambi jiSion, kabu andi jimamata nderi muji.

⁵Fumu amaba nderi muvinitsi; amasielasana Israel nesi mandagu mandi motsu mabukaga, na amapansa bivaga; amabasa Juda na mitatu na bibimu.

⁶Amapansa ndagu andi dedi mosi nana bepansili mirorombi. Amabunga mbura aji tumabengunina; amarombisa bisi Sion ulibana bafeta nesi yilumbu yiuvuma.

⁷Fumu amabusa yinyensulu yiandi yipagu na amabuaga Mbura Nsambi; amawakisa bibaga bindagu kaga jiSion ombu bavinitsi! Kumfu jimagulunu o Ndagu Nsambi nderi jiyilumbu yifeta!

⁸Fumu amatabula diambu upansa bibaga biJerusalem. Amasimbula mukudu, asamatamba nofuriga gogu andi ubunga; amaduisa bibaga na bivaga yifuila, dubungu dumabanganga o biari biotsu.

⁹Biabutsu biandi bidibugu mu butamba; amabunga nesi upansa magongi. Kaga andi na barumitsi bamapansu o malongu. Migaga misatsi nesi babiyitsi bagemuelaba biriariamu biFumu.

¹⁰Bivunda biSion bamatsana va tsi, bavu mababa; bamakuka difufundu o julu tsimiuru miogu na bamaduara basiela. Batsiemi baJerusalepi bamagudama va tsi.

¹¹Misu mami yika pisama mu diambu dimatsanga, murima ami uvu o julu mu diambu didubungu dubatu bami: baana bageyi na abakivu va tulu bamafu mu mansila mamusiengi na puila.

¹²Bamawivula banguji bogu rie: Biguji bika? Bamaberuga mu mansila nderi jogu abamanemusu. Mivumu mimatabuyila va tulu tsibanguji bogu.

¹³Jerusalem, diambu yi nyuvosa nagu? Na nyi nyugubagusunu? Dubembugu dumunongu yi nyugubembiga? Dubungu duagu duvu duneni dedi mosi nana mubu uvu uneni. Anyi orungula ugubelusa?

¹⁴Babiyitsi bagu bamagubiyila mbigulu tsikulini na tsimfurulu; basamatubula mabi magu yiri gugogobulu; bamagubiyila mbigulu tsimfurulu na tsindunsulu.

¹⁵Baviosi botsu bansila begusiyili masuku, begusimini na bemuangisi miuru ugudesa ndeʼ Jerusalem. Je agugu la musiengi aguvu na tindi kembu na nsangu bibutamba buotsu.

¹⁶Botsu abeguvini begudesi. Besimini na befiotuli, ndeʼ Jerusalem. Bevosi rie: Tumamubetsa! Ayiyi yivu yilumbu ayi tumavivanga. Tumagudala na tuigulabi!

¹⁷Fumu amadugusu adi amatabula, amadugusu diambu adi amatabula kala kala, amagubunga tsiri utasa buali buagu; amarombisa muvi nitsi agu usangila mu diambu diagu na amawarisa mangolu mamukuanitsi agu.

¹⁸Jerusalem, migamu miagu na mitatu miagu migulunu na Fumu; witilanga mijamba mimatsanga nyangu na mukolu! Guyavola ne diweru dimosi; matsanga jnagu mayakamuga!

¹⁹Retsama nobimanga mukolu uotsu ubanda ava wisi etsimini! Dibula murima agu va gusu Fumu dedi mosi nana mueyi uipubuyili; musambili yiri baana bagu abefuangingi yiari na yiari na nsala bodila monyu.

²⁰Fumu labati, rangimina jogu aba guitsoyisi! Diwelimina yiri bagetu bejangingi baana bogu aba bamarondanga? Diwelimina yiri bavagulitsi bapagu na babiyitsi boboku o Mbura Nsambi?

²¹Baana na binunu bamasilama mu tsi muna nsila. Batsiemi bami na bafudu bami bamaboku na dijenga. Gumababoka yilumbu ayi gumanyoyila kabu, gusamabalasa yingeba.

²²Gumanengila bavinitsi bami nderi benengili batu uji feta. Mu yilumbu yikabu jiFumu ne mutu mosi asamarina, ne umosi asamadila monyu. Muvinitsi ami amabokisa botsu aba nyimalela nesi aba nyimabungula.