Read Punu Mitatu 3 Bible Online

Mitatu 3 - Punu bible

Mitatu 3

¹Menu nyivu dibaala adimalabanga maguga adimadimbungu na kabu jiFumu.

²Amakwendisanga nesi umbeganga va gusu andi o tsi pisama tsiri yijalala.

³Amandimbanga yilumbu na yilumbu.

⁴Amakasisa tindi ugasisa, amateba bivisi biami.

⁵Amakaga na amansiengisa nderi bibaga, diwendi rie: munyongu na purulu.

⁶Amansanisa o pisama nderi jogu abamafu kala kala.

⁷Amansiengisa yivaga yiri ngopala; amandangusa bapanga.

⁸Nyimalegamuga rie: Kwamusi! Amabusa dusambu duami.

⁹Amadibiga nsila ami na mamanyi mapaku; amarekiga mansila mami.

¹⁰Amaba ombu garni nderi magena ameleyi nesi yimbungu ayimasuema va mbura.

¹¹Amapembusa nsila uyepopula; waʼ pinsa nyivu.

¹²Amaduta pita andi na amansunsa nderi munengi andi,

¹³amandamusu mbansa tsidupalu duandi mu mipigu mi ami.

¹⁴Menu nyivu kwaku jibatu botsu, kadi yilumbu yika undesanga.

¹⁵Amatopusu munyongu na amandansa dugundu.

¹⁶Amalogula minu mami na mamanyi, amakotsa dibufu.

¹⁷Amapatula duvotsu, nyimalibana maboti.

¹⁸Nyimavosa rie: Mangolu mamansuka, ngemueviva yima ombu Fumu!

¹⁹Munyongu ami na purulu tsiami bivu nderi dugundu na ndombu.

²⁰Ava nyibirangimini murima ami yika ubakama.

²¹Nyina ditasa ava nyitasili rie:

²²Maboti maFumu magesuki, yingeba yiandi yigosuka, via!

²³Eyilasingi kedi na kedi. Ka muna usigama gu uvu nami!

²⁴Nyivosi rie: Fumu avu bungunu buami; la dibandu nyimutasili.

²⁵Fumu elasi maboti ombu jandi oyimuvivi nesi jandi oyimurombi.

²⁶Diwelimina uba sui utasila duwamusu duFumu.

²⁷Diwelimina yiri dibaala onangula yilala ava bufudu buandi.

²⁸Abi pinsa na abi sui ava Fumu omunangusila yionyi.

²⁹Adibiyi dikaka diandi va munu, tanguji Fumu omutasila.

³⁰Aliyi dibanga ombu jandi oyimudimbi, atopulu yisonyi.

³¹Fumu agaa va gari jogu abeliyili mutu nsima mutubu.

³²Pa enyongisi mutu emubembiyi wandi na yingeba yiandi yivu yineni.

³³Tsiri na kanda esundusi mutu na tsiri na kanda enyongisi batu. Fumu elabi

³⁴ava betsiarilili bakoli botsu babulongu,

³⁵nesi ava belensili Nsambi Aguvu Uneni nogandisa mutu umana munu andi,

³⁶nesi ava betabulili mutu bunsonsi bubi; je Fumu agelabi motsu mana?

³⁷Anyi orungula uvega diruma nodidugusu pa Fumu asamadisingisa?

³⁸Mabi na maboti mageruyili duganu duNsambi Aguvu Uneni?

³⁹Dibandu yi mutu otatilanga nsanunu andi jiotsu, diuleba avu mungo masumu?

⁴⁰Tuwijianu bifu bietu na tubikelulianu, tugabuyianu ombu Fumu.

⁴¹Tuidibuli mirima mietu na tuisambi makaka ombu Nsambi aguvu o julu.

⁴²Tumavaga masumu na tumaba mimbini, ndeʼ Fumu gusamatutanda.

⁴³Gumakesuega o gari kabu agu, gumatubingisa; gumatubokisa mbisu.

⁴⁴Gumakepieta dimungi yiri tsambu tsietu tsigogulunu nagu.

⁴⁵Gumatuvaga nsoruru na tuvu nderi dibumbu va gusu batu botsu.

⁴⁶Botsu abavu bavinitsi betu usimina betusimini.

⁴⁷Tumasutusu na dunsiensi na ngila na tumalaba dubungu na bivongu.

⁴⁸Tulu ami jimabasa matsanga mu diambu didubungu dubatu bami.

⁴⁹Misu mami mepalisingi matsanga nderi yileka ayigekamuyi.

⁵⁰Uviva nyivivi yiri Fumu aguvu o julu adokimini nolaba:

⁵¹adivu na baana babagetu bamusiengi ami, adina dinsoyisi.

⁵²Jogu abepini mavivina bamatomba nderi murela batsoli.

⁵³Bamaronda umbokisa o yiduna ava bamatindila mamanyi.

⁵⁴Mamba mamandiamisa. Nyimavosa rie: Nyimatsiemuga!

⁵⁵Aa Fumu, o gari yiduna, nyimagunengila.

⁵⁶Ndeʼ gumagulu diufi diami: kokolu tsiagu gulu bibimu biami nesi migamu miami!

⁵⁷Yilumbu ayi nyimagusambilila ndeʼ gumabambana nami na gumavosa rie: Guyalaba keri!

⁵⁸Fumu ndeʼ gumakwaka kalala na gumakobula.

⁵⁹Fumu ndeʼ gumalaba nana bamansoyisila; tabulili bunsonsi!

⁶⁰Ndeʼ gumalaba pila tsiogu tsiotsu, nesi fundu tsiogu atsi bamatungila.

⁶¹Fumu ndeʼ gumagulu bisiengu biogu nesi fundu tsiogu atsi bamatungila.

⁶²Posulu nesi kanu bibavinitsi bami bikaangi yilumbu na yilumbu.

⁶³Gengila motsu ama bepayilingi! Nyivu kwaku ogu.

⁶⁴Aa Fumu ndeʼ gubasaka nana bamasalila;

⁶⁵ndeʼ gugalisa mirima miogu, mulogu agu ubadala.

⁶⁶Gukababingisa na kabu agu; ndeʼ gukababokisa.