Read Punu Ezekiel 1 Bible Online

Ezekiel 1 - Punu bible

Ezekiel 1

¹Yilima yimagumarieru mu yilumbu yimuranu yitsungi jimuina ava nyimabila va gari bakoli va mugula mujamba uKebar, julu jimadibuga na nyimalaba biriariamu biNsambi.

²Mu yilumbu yimuranu yitsungi eni jiyilima yimuranu bibukoli bukaga Joakin,

³mambu maFumu mamansingulu, menu Ezekiel muana dibaala uBouzi muvagulitsi upagu o bulongu buBabylone va mugula mujamba uKebar; avana Fumu amalabinina nami na mangolu mandi.

⁴Ava nyimagengilila nyimalaba mungudi agumaruyila o yiari yibanda amuna nyimalabila dimungi dineni na yitutu yimuji ayimanyavisa yijalala yiari na yiari avana wandi nyimalabila nderi kunga ajiluli o gari muji.

⁵Avana gari nyimamuelabila bima abimaba na bibagunu bibatu.

⁶Kadi yima yimaba na binsi bina na mapapi mana.

⁷Makulu mogu mamaba masungama na birodi biogu bimaba nderi birodi bimuana ngombi; na mamavedamanga nderi kunga ajiluli.

⁸Bimaba na makaka nderi mabatu o tsi mapapi mogu o biari biotsu bibina; na biotsu bibina bimaba na binsi na mapapi.

⁹Mapapi mogu mamabembasana; bisamageluganga ava bimawendilanga; bima-wendanga sungingi.

¹⁰Mu diambu dibinsi biogu: yima yima yimaba na yinsi yimutu; yima yima yimaba na yinsi yiyimbungu o mabaala; yima yima yimaba na yinsi yingombi o magetu; yima yima yimaba na yinsi yimbira.

¹¹Binsi biogu na mapapi mogu bimaba bikakana; mapapi mogu mabeji mamadukusunu na mabeji masusu mamakubiga nyuru tsiogu.

¹²Bimawendanga sungingi; bimawendanga agu yinyunyi yimabirumanga uwenda na bisamageluganga.

¹³Bibagunu bieni bimalabana nderi magala mamuji nesi nderi bitutu abimaviunsu yiari na yiari va gari bionyi. Muji eni umavedimisanga yijalala yineni na o gari muji eni umapalila tsiemu.

¹⁴Na bima bieni bimawendanga mambangu na bimagabuganga nderi kaki.

¹⁵Nyimagengila bima bieni na nyimalaba dikulu didugongula va tsi va gusu yima yima.

¹⁶Makulu meni mamaba mana; mamasalu na tsiengi; motsu mamana mamaba dedi; mamasalu nderi dikulu dikulu o gari dikulu nandi.

¹⁷Ava mamawendilanga mamawenda mu biari biotsu bibina na masamageluganga.

¹⁸Mamaba dungongula dumosi na mamaviolila usakama, motsu mamana mamaba yika misu na misu.

¹⁹Ava bima bieni bimawendilanga makulu mamawendanga va mosi na bionyi; ava bima bieni bimamatilanga makalu mamamatanga wandi.

²⁰Bimawendanga agu yinyunyi yimabirumanga; makulu mamaretsamanga va mosi na bionyi mu mbari yinyunyi yibima bieni yimatsana muna makulu.

²¹Ava bimawendilanga makulu mamawendanga wandi; ava bimamatilanga makulu mamamatanga nogu wandi; yinyunyi yibima bieni yimatsana muna makulu.

²²Va julu tsimiuru mibima bieni vamaba nderi dualu dudusiengi adumaveda.

²³O tsi dualu dueni mapapi mogu mabeji mamadukusunu na mabeji masusu mamakubiga nyuru tsiogu yiari na yiari.

²⁴Nyimagulu nduku jimapapi mogu ava bimawendilanga ajimaba nderi nduku jimubu nesi diufi diNsambi Aguvu Uneni; nesi nduku jibagora bapuela. Ava bimasikimina bimasundusa mapapi mogu.

²⁵Vamagulunu diufi adimaruyila o dualu adumabanganga o julu miuru mibionyi. Ava bimasikimina bimasundusamapapi mogu.

²⁶Vajulu dualu adumabao julu tsimiuru miogu vamalabana yima ayimabagunu na dimanyi disafira adimaba na yibagunu yiyitsiga yibufumu na vamalabana yibagunu yimutu ayimayetsana.

²⁷Nyimamuelaba nderi kunga jiluli, nderi muji na o gari uonyi umaba mutu eni agumakadamanga te no makulu; muji, nesi yijalala yineni yimamutsiengila.

²⁸Nana muyama uilabinini mu mamungi yilumbu ayi mfula jinoyili anana yijalala yieni ayimamutsiengila yimalulila. Yimaba yibagunu yibundumba buFumu. Nyinoyilaba nyimagudama va tsi na nyimagulu diufi dimutu agumavosanga.