Read Punu Ezekiel 10 Bible Online

Ezekiel 10 - Punu bible

Ezekiel 10

¹Nyimagengila o julu na nyimalaba dualu va julu miuru mibibagunu bibiansa na dimanyi disafira mu yibagunu yiyitsiga yibufumu.

²Mbana Nsambi amaruma dibaala adimaduara matsanda maboti rie: Vioga va gari makulu madugongula o tsi bibagunu bibiansa. Basa makaka magu magala mamuji ama gubonga va gari bibagunu bibiansa; gukamapansa o musiengi! Amayenawenda va misi mami.

³Bibagunu bibiansa bimaba diteli va mabaala maNdagu Nsambi ava amakotila; dimungi dibundumba dimabasa dulombili adugari.

⁴Bundumba buFumu bumamata va julu bibagunu bibiansa na bumawendasana o yilemondi yiNdagu Nsambi na Ndagu Nsambi jimabasa na buonyi na dulombili adugari dumabasa na yijalala yibundumba buFumu.

⁵Nduku jimapapi mabibagunu bibiansa jimagulunu te no dulombili dukana. Jimaba nderi diufi diNsambi Aguvu Uneni.

⁶Fumu amavega diruma diedidi ombu dibaala adimaduara matsanda maboti rie: Bonga muji aguvu va gari makulu madugongula va gari bibagunu bibiansa.

⁷Mbana yibagunu yimosi yiyiansa yimasamba dikaka va gari bibagunu bibiansa o yiari yimuji agumaba va gari bibagunu bibiansa; amagubonga, amagusunsa va makaka madibaala adimaduara matsanda maboti. Dibaala dieni amagubonga na amayenawenda.

⁸Kabogu makaka amamaba nderi mabatu mamalabana o tsi mapapi mabibagunu bibiansa.

⁹Nyimamuegengila na nyimalaba makulu mana madugongula va mugula bibagunu bibiansa, diwendi rie: dikulu dimosi didugongula va mugula kadi yibagunu yiyiansa; na makulu meni mamaba madusiengi.

¹⁰Motsu mamana mamaba dedi; mamasalu nderi dikulu dikulu dimaba o gari dikulu nandi.

¹¹Ava mamawendilanga mamawenda mu biari biotsu bibina na masamageluganga. Tumba mamawendanga sungingi, masamageluganga.

¹²Nyura tsiotsu tsibibagunu bibiansa nesi nsima tsiogu nesi makaka mogu nesi mapapi mogu bimaba yika misu na misu dedi mosi na makulu motsu mamana.

¹³Nyimagulu yiri bamanengila makulu madugongula rie: yimbongila.

¹⁴Kadi yibagunu yibiansa yimaba na binsi bina: ayitega yimaba yinsi yiyibagunu yiyiansa; ayimubeji yimaba yinsi yimutu, ayimuriera yimaba yinsi yiyimbungu ayimuina yimaba yinsi yimbira.

¹⁵Mbana bibagunu bibiansa bimaretsama. Bimaba bima abi nyimalaba va mugula mujamba uKebar.

¹⁶Ava bibagunu bibiansa bimawendilanga makulu mamawendanga va mugula ogu wandi; ava bibagunu bibiansa bimasalisila mapapi mogu upurumuga makulu meni masamamuetsiengila.

¹⁷Ava bimasikimina mamasikama wandi; ava bimamatila mamamata wandi mu mbari yinyunyi yibima bieni yimatsana muna makulu.

¹⁸Bundumba buFumu bumagusuga va yilemondi yiNdagu Nsambi na bumavinga va julu bibagunu bibiansa.

¹⁹Bibagunu bibiansa bimasalisa mapapi mogu na bimamatila va misu mami va mosi na makulu. Bimasikama va dikotulu diNdagu Nsambi o yiari ayi wisi epalili; bundumba buNsambi Israel bumaba o julu va julu ogu.

²⁰Bimaba bima abi nyimalelaba o tsi Nsambi Israel abimaba va mugula mujamba uKebar; mbana nyimajaba yiri bimaba bibagunu bibiansa.

²¹Kadi yima yimaba na binsi bina na mapapi mana na makaka nderi mabatu mamalabana o tsi mapapi mogu.

²²Binsi biogu bimaba dedi na bibagunu abi nyimalaba va mugula mujamba uKebar; kadi yiba-gunu yiyiansa yimawendanga o gusu.