Read Punu Ezekiel 12 Bible Online

Ezekiel 12 - Punu bible

Ezekiel 12

¹Tumu amansingula rie:

²Ezekiel, ndeʼ guitsani va gari mukuta umimbini! Bavu na misu tumba bagelabi; bavu na matuji tumba bagegulu; bavu mukuta umimbini.

³Ndeʼ muana mutu kunsa mifuna miulinga; gukasogama nyangu va misu mogu; rambuga ava guvu uyenawenda o yiari yisusu; tanguji bolaba yiri bavu mimbini.

⁴Nyangu va misu mogu, palisa mifuna miagu dedi mosi nana mupambuyitsi evayili; gukasogama tsisiga va misu mogu.

⁵Gukatoba yivaga va misu mogu na avanagupalisila mifuna miagu.

⁶Gukanangula mifuna va disambaka va misu mogu; gukamipalisa mukolu. Gukakekubiga yinsi yiri gugolaba agu guiwendi. Anana nyigurumini ulubusa baIsrael adi bolaba.

⁷Nyimavaga adi nyimammu; nyimapalisa mifuna miami nyangu dedi mosi nana mupambuyitsi; ava tsisiga nyimatoba yivaga. Batu bamandaba ava nyimapalila o tsi pisama na mifuna va julu disambaka diami va misu mogu.

⁸Ava kedi Fumu amansingula rie:

⁹Ezekiel, baIsrael abavu mukuta umimbini boguwivula rie: Yi guivayi?

¹⁰Gukabatsingula rie: Fumu Nsambi jandi rie: Mbigulu ejiji jivu dilubu ombu kaga jiJerusalem na baIsrael botsu abetsani guna.

¹¹Gukabatsingula yiri gumavaga nana ubalasa adi bolaba: bobegu bakoli nesi baviga.

¹²Kaga oyibarumi onangula mufuna andi va disambaka o tsi pisama na oyenawenda; botoba yivaga umupalisa. Okekubiga yinsi yiri agolaba agu ewendi.

¹³Menu Fumu nyumubuayila mbusa ami na owakululu mu murambu ami; nyumubega o Bauylone tumba agobulaba aguna oyefuila.

¹⁴Nyupansa botsu abemutsiengili na bavu bawamusi bandi na bagora bandi botsu yiari na yiari na nyubaboka na divita.

¹⁵Mbana bojaba yiri menu nyivu Fumu ava nyubapansila o malongu mapuela.

¹⁶Tumba nyusila bansialutsu bogu bamosi abagoboku na divita nesi na dungosu dunsala nesi na yivunga yiri bosamuna nsoruru tsiogu tsiotsu o malongu ama bowenda. Mbana bisi malongu meni bojaba yiri menu nyivu Fumu.

¹⁷Fumu amansingula rie:

¹⁸Mbe ka ndeʼ Ezekiel, guji biguji biagu noregama na gunu mamba magu nokambulu na munyongu.

¹⁹Tsingula bisi bulongu rie: Guluanu ama Fumu aguvu Fumu amavosa mu diambu dibisi Jerusalem abavu o bulongu buIsrael rie: Bojanganga biguji biogu na munyongu na bonuanganga mamba mogu na goma; bulongu buogu bukindu mu mbari abetsani muna bamabubasa dikasi.

²⁰Misiengi amimaleba na puela batu miupansu na bulongu bubungu. Mbana dujaba yiri menu nyivu Fumu.

²¹Fumu amansingula rie:

²²Ezekiel vavu nongu aji bevosulilingi o bulongu buIsrael rie: Bilumbu uvioga bivioyi na mbigulu tsiotsu tsigaa na tsongu!

²³La dibandu gukabatsingula rie: Fumu Nsambi jandi rie: Ngomuesingisa uvosulila nongu eni na jigomuebuagungu o Israel. Tumba gukabatsingula rie: Bilumbu uruga biruyi abi mbigulu tsiotsu tsiudugusulu.

²⁴Mu mbari vagomueba biriariamu bikulini nesi mbigulu tsindunsulu va gari baIsrael.

²⁵Menu Fumu nyivosi; na adi nyivosi diulabana na diulabana namapapa. Nyiina, menu Fumu nyivosi rie: Jenu mimbini mu bilumbu bieni nyuvosa diambu na diulabana.

²⁶Fumu amansingula rie:

²⁷Ezekiel, gulu adi baIsrael bevosi rie: Biriariamu bimubiyitsi biulabana o gusu; mbigulu tsiandi tsigolabana namapapa.

²⁸Menu aguvu Fumu Nsambi nyivosi rie: Batsinguli rie: Ngomuetsikadana udugusu mambu mami; ama nyimavosa molabana namapapa.